Isaya 43 - Bible en Guidar

¹ Ya kakaŋ na, Yawe məs dəzəməɗko Yakob, məs dəɗɗuko Israyel amna: Kəgeslne ɓa, vi nəbitkuko, nəyukuk də iya noko, naw kənani.

² An is tat əkaɗ kiyit iŋkile, wanəsaw də isi; addivit məlpeŋge, iŋkile atəpgukunən na ɓa. An kətoŋguk akoffo, ahhətuk na ɓa, nzilimnzilim na offo azluk na ɓa.

³ Vi intə Yawe, Maŋgəlva noko, Maŋgəlva Salala na Israyel, məzukõhguko. Nəppanək Eziptə nawmok dəndəni, Etiyopi gəm Seba a guloko.

⁴ Adan ɗəf na sləma kənan a maharawa, məɗi kiyuk kənani naw nəŋglukuko, ndəni nədawfaɗ də ɗəf titir a guloko, gəm dit ɗiy naket dəlveŋge aguloko.

⁵ Kəgeslne ɓa, vi in tat də isi, wanəmilgit kirtuk hã səmmba pay nampum, wanəkkelet ɗiy nok hã səmmba pay na moskoyo.

⁶ Wanənah sən tapaslay pay na disiŋ na: dəppetgin ədda, sən dohoŋ na: Kətek ɓa. Məmilgit kirtu mezeŋgleket hã sə faraɗa, kirtu muguluŋgit sə təki dələv abaymani;

⁷ Məs məyan də iya naw pak in nəzəməɗa, nərka ammba gagdak nawa, ha'aw in nəɗɗa.

Munokumtə məziwweɗe nawa

⁸ Migilgit ɗiy deŋgerɗe, də heret asan zlaŋgə, gəm goryomɗe də sləmet asan zlaŋgə.

⁹ Ɗiy pak dəkkalaŋgə, ɗiy naket dəlveŋge dəsapaŋgə! Sə weleŋgit na, naway narban an dədazzan di? Dədawpel səm aket zəgeɗ maddaabəŋ di? Dəkinin məziweɗe neti karban na təstəsəŋgə! An məziweɗe vet aprəmənka, dənahaŋgən na: Gegesiŋgi yi!

¹⁰ Mənokumtə məziweɗe nawa, Yawe aɗiymani; məɗɗaŋ wəza nawa, məs nəweli. Vi kəsənnəngəni, kətafwəngəni gəm kəprəməngən na, naw intə Maŋgəlva. Daabəŋ kiwa, maŋgəlva tay mərkan ɓa, tay nassan abbəru ɓa'a.

¹¹ Naw intə Yawe, məzukõhgən ɗəf tay abbəru ɓa.

¹² Naw nənahək wən nawkohõ, nəkiyka, Intə nəprəman wən nani maŋgəlva malakan na walaŋkumi ɓa; mənokumtə miziweɗe nawa Yawe aɗiymani: naw intə Maŋgəlva.

¹³ Farfar, naw intə Maŋgəlva. Ɗəf tay nawmõh zəga səvaw ɓa, an nəgəɗ na, naway nakkpaŋgan di?

In tat əslən ɗəf vikum

¹⁴ Aŋki an Yawe anahə, ndən məzukõhgukum, Maŋgəlva Salala na Israyel: Aka batamkum in tat əslən ɗiy əgay a Babilon wanərɓehet beymeti, mə kaldiyeɗ dədannekeŋ aka bəlayəŋki.

¹⁵ Intə Yawe, Salala nokum, məs dəzəməɗ Israyel, məlĩ nokum.

Tive meleketen a kapta-muyã

¹⁶ Aŋki an Yawe anahə, ndən məs dəkol tive addak pehe məs dəntar tive gargar addekit iŋkile məsgagayɗe.

¹⁷ Ndən məs dəgilgit mawteɗe net pilseŋge dit pilseŋge neti, məzəlpaŋ dit guromɗe neti. Tahəŋ ɓəlohɓəloh asilyoŋ na əmpa ɓa, azlaŋgək va gabaga na lalam. Amtaŋgək gipi.

¹⁸ Kədaɗɗumetin zəgeɗ en daabəŋ ɓa, kədazlgaŋ sləma aket zəgeɗ en dətoŋgoŋ ɓa.

¹⁹ In yakəŋ əɗɗa zəga meleketeni; kakaŋ na tay ərba, kəsənnən ɓa sa? Ha'aw, wanəkol tive a kapta-muyã, a muyã wanəɗɗe məlpeŋge.

²⁰ Zəgeɗ nawra, wawayɗe dit herkeseŋɗe wagagdakawəni vi nəɗiyik iŋkile a kapta-muyã, məlpeŋge a muyã, vi ɗiy naw məs nəwel dəsaŋgəni.

²¹ Ɗiy məs nərkə viwiski, warbanən gagdak nawa.

Ətawwən na Maŋgəlva də Israyel

²² Kəkkamaw ɓa Yakob! Israyel kəyək də iyna!

²³ Kəkisu time nawzaɓ-Maŋgəlva nok na əvəl nawzla kurmbuɗuk ɓa, kəgagdakaw də əzaɓ-Maŋgəlva mədan nok ɓa. Nəska wəlok nawkisu əvəl ɓa, ya nəyok də əttok tursan ɓa.

²⁴ Kəzan dala nok kalbasu eflere nawda ka tursan kəbaw də səlhã na əzaɓ-Maŋgəlva mədan nok ɓa. Dit mambrayɗe nok dərən kəyawa, kəyawək dit heslepeɗe noko.

²⁵ Naw, intə navvuyon əɓoŋ nok də əŋgla nawa nəɗɗum na aket mambrayɗe nok əmpa ɓa.

²⁶ Afɗahan su an nəraygəni, atawan səm matakə; aŋɗani, karban na təstəs kənani.

²⁷ Afuk agəɗək mambraya; maslənɗe nok atemeŋgik akawa.

²⁸ Ndəni nərnoket deyeɗe naddəv gəla Salala, nəppanək Yakob addəv əraya, gəm Israyel addəv əra.