Isaya 42 - Bible en Guidar

Məgəɗ wəza na Daya Gəlyanalva maddaabəŋ: Maŋgəlva tay ərban gawla nani

¹ Gawla naw məs nədarma van yaŋka, əwel nawi yi, in tat ənnek dəndəni, nəɗiyək əmpəs naw akani, waki ətawwən təstəs sit ɗiy naket dəlveŋge.

² Aŋgəsl na vaŋvəl ɓa, aslan na wəlan ɓa, kaprəmni wəlan aka tive ɓa.

³ Aŋzlu na eflere an dədoknok ɓa, amtan na lalam məs go'o aza əmta ɓa. Warban gegesiŋ na tive təstəsə.

⁴ Nan awzimbi ɓa, ayə na londor ɓa, hã gap ndən ziwgin təstəs aka dəlvafuŋgu, ɗiy-naguw diyɗa tahəŋ əganən əyak nani.

Əkeɗeɗe viyit ɗiy naka dəlva

⁵ Vaŋ Yawe Maŋgəlva məs dəzəməɗ disiŋ aweɗe, dəppar dəlvafuŋ dit zəgeɗ akani dəpsit əmpəs sit ɗiyi əmpəs sit məzədawaŋ akani.

⁶ Intə Yawe, nəyuk na addəv təstəs nawi yi. Nərmak voko, nəgukko, nəɗiykuk kəssokgən wənmiyna sit ɗiy nawa əkeɗeɗe net ɗiy naket dəlveŋge.

⁷ Wakəkol heret deŋgerɗe, kawgilgit məfərsəneɗ sə fərsəna, kawpəl ɗiy nara guzli səka əzəmsahã neti.

⁸ Intə Yawe, vaski iya nawa. Nəpsən na gagdak naw sən ɗəf maɓɓan ɓa, əɗi kiya naw sit zəgeɗkamaŋgəlva ɓa.

⁹ Awle, zəgeɗ məzvet aɗɗaŋgək səkayə; zəgeɗ meleketet nədawnaha, nəpel sukumuk aket tak adaɗɗaŋgə.

Daya tay əbbaha

¹⁰ Məgagdakan Yawe, məyəgəlya meleketeni. Gagdak nan dəyə hã a təki dələv abaymani, mənokum mədawaŋ a pehe, dit məs dəknahəni, Mətəwəraɗe dit ɗiy naketi.

¹¹ Kapta-muyã dit walaŋgəleɗe gugriɗ nan dəslanən wəlet a disiŋ, vaska'e walaŋgəleɗe net ɗiy na Kedar! Ɗiy naka milɓe dəŋzlaŋ vaŋvəl sən ənnek təŋ səka dadwar kiyit mossorgoɗe gugriɗe.

¹² Dəgagdakanən Yawe, dərbanən əɗi kiyən aket mətəwəraɗe.

¹³ Yawe agilik va gambara; tay ədaw də makra va məzəlpa. Aŋgəslək vaŋvəl nalpa aŋgəslək vaŋvəl aket məzuzelɗe nani, tay ərban gbogboŋ nani.

An Daya aynan naɗɗa

¹⁴ Farfar nəsaw ɓatɓatə, nawpel ɓa, nərmak ki zuwa, kakaŋka, in tat ənɗəs va guluk dawa, in tat hompokhompok gəm əmpəs də tatwãha.

¹⁵ Wanəburkuɗ mossorgoɗe gugriɗe dit kiyit mossorgoɗe, wanəŋkəlu zəga məddəkan naket pakə, wanəkkpeŋget məlpeŋge ka mətəwəraɗe wanəkkpe' iŋkile məs po'o.

¹⁶ Wanədawgit deŋgerɗe dəka tive məs dəsənnən ɓa gəm də tive gargar məs dəsənnən ɗah ɓa. Wanəkkpaŋgan guzli nabet ka əkeɗeɗe'e gəm kawziyan təki mə giɗikgiɗik dakadaka. Anan nədaɗɗa, nəppet na ɓa.

¹⁷ Wil aket ɗiy məzaɓaŋ zəgakamaŋgəlva, aket məzuyenin zəgeɗ məhəsit na: meŋgilveɗ neti wamndoŋ dərɓe addəv ərba wili.

Ɗiy mətip hereti gəm goryomɗe

¹⁸ Goryomɗe, məprəma; deŋgerɗe, mula, məsəŋgləkani.

¹⁹ Naway daŋgar an gawla nawi ɓa di? Naway goryom va maslən məs nəslən di? Naway daŋgar va ɗəf məman di? Naway daŋgar va gawla na Yawe di?

²⁰ Kulaŋgək zəgeɗ diyɗa, kərmenin ɓa hara; sləmokum akolko, kəprəmaŋ ɓa hara.

²¹ Ndəni, Yawe arban memetiŋ gəm lalaw na mahenziŋ addəv təstəs nani.

²² Ya ɗiy məmõhẽtingə, məppətetəŋgə. Mərmetiŋ aka mazzaɗ a fərsəna beymeti, məmseti vi kawmõheti, ɗəf nawmõhit səma əzəmsahã tay ɓa, ɗəf tay nawnah na: məmndegeti ɓa.

²³ Naway səmmbokum nawpak sləman ka kazga sləma, gəm kaprəm an nazzan pay nabe di?

²⁴ Naway dəppan Yakob ka kappətən di? Naway dəppan Israyel vi kappohõn di? Namna Yawe məs məgəɗ sən mambray yi ɓa sa? Dətafənən ədaw aka tive naw ɓa dəprəmən mahenziŋ naw ɓa.

²⁵ Ndəni aggbo' ədagədəv nan gəm gəgay nawgay aketi. Aɗisənək offo kiyit suləkə, ya dəsənən ɓa; azleke, ya dəɗinən aket ɓa.