Isaya 41 - Bible en Guidar

Ɗəf məs Daya arɓahə

¹ Mətəwəraɗe, məɓət sləɓək abawa, ɗiy məsok zukum, mədder aŋka, məpeli. Mədam a təki ətawən sap mulagəni.

² Naway dəsilgin ɗəf an təstəs sə dəmmba pay nampum aya dəzbangənəŋ di? Məs absin ɗiy ammba vani gəm akkpeŋget milyeŋɗe ammba təlni. Məs masalam nan adakkpeŋget va burɗuku, bəle nan adawtrayet va kevile məs səmyã adawkaŋ di?

³ Tay əzbeti, ndən ətoŋ zay dəka tive məs tələn dəndap ɗah ɓa.

⁴ Naway dəɗɗum dəɗɗa di? Ndən dəya sayit ɗiy aka də wətəŋ nani. In Yawe tə daabəŋ, dit ɗiy nadirɓe, intə'e.

⁵ Ɗiy naket mətuwəraɗe awlanənka yas ageslne'eŋgi; ɗiy nakki dələv abaymani tay əkkereŋgi tay əzzoŋ də əkkere.

⁶ Ɗəf pak əbbah sən ɗəf mbərən, tay ənah sən məlmən na, asok zuko!

⁷ Məzaɓ-zəga tay əpsən gbogboŋ sən ɗəf məhəs meleŋge; məziyan təbəz də ndəvəl tay əpsən gbogboŋ sən məzəkapən aka mamovoto. Tay ənah aka an antep na: kapi yi. Ndən əkkpa'ən də pente vi ndən əɓla.

Kakaŋ na geslne' aduk ɓa

⁸ Ya isi Israyel, məgəɗ wəza nawa, Yakob məs nəweli, mahəlfa na baynaw Abraham;

⁹ Is məs nəkoyok hã sə təki dələv abaymani, sə təki dələv abayman nəyuko, yas nənah suk na: Istə məgəɗ wəza nawa, nəwelkuko, nəzgok ɓa.

¹⁰ Kəgeslne ɓa, vi in tat də isi. Kədassok horok kilili ɓa, vi intə Maŋgəlva noko, nəsɓokuko, ha'aw, nədek kabbah suko, wanəpa'uk də va dəzəŋ na təstəs nawa.

¹¹ Ya məs dədaŋ gədəv akok pak wil wadenini, warbaŋ wili! Ɗiy dəkayanən mok pak wazaŋgə, wakkpaŋgaŋ va zəga ɗarə!

¹² Wakəkeyet məzəɗaŋ ŋgãŋgã də is pak ya kərih na ɓa. Məzugayaŋ də is wakkpaŋgaŋ va zəga ɗarə, va tahəŋ ɓa.

¹³ Vi intə Yawe Maŋgəlva nok məs dərma vok dəzəŋ, ndəni yi dədawnah suk na: Kəgeslne ɓa, naw nədek əbbah suko.

Nədek əbbah suko

¹⁴ Kəgeslne ɓa is Yakob tentiwilge, Israyel, dəsan kakaŋ zəga məmtəni naw nədek əbbah suko Yawe aɗiymani, məs dədawkõhguk na Salala na Israyeli yi.

¹⁵ Awla nəɗikuk va mawta narga haya, məs slayən meleketeni. Wakəsir mossorgoɗe gugriɗe, wakətekeɗe, wakəkkpeŋget mossorgoɗe va eslesle.

¹⁶ Wakəndolet a disiŋ, səmyã wake, barkataŋ wandoleti. Ya nok wakəsok addəv ənnek vi Yawe, zuk wasan babyak babyakə, vi Salala na Israyel zuk wasan neki.

Kapta-muyã akkpaŋgək met iŋkile

¹⁷ Məssẽhẽŋɗe dit məzurayɗe wakayaŋ iŋkile, ya tahəŋ ɓa. Met tay təpatəpa sit meme. In Yawe, wanəzlan siti, in Maŋgəlva na Israyel, wanəzget ɓa.

¹⁸ Wanənter məlpaɗe a təki pəɗalpəɗal, gəm heret iŋkile miyma, addekit walaŋɗe, wanəkkpaŋgan kapta-muyã ka met iŋkile dələv məkuro ka təki məs iŋkile adantəsaŋgə.

¹⁹ A kapta-muyã wanəɗi wəleŋɗe lelewɗe, duvurnohõ, wəlaŋga mirtə gəm hereme. A təki məs wəleŋɗe tahəŋ ɓa, wanəmpə, muguguleɗi, wəlaŋga adawyaŋ na pin gəm zigã.

²⁰ Vi dulanəngəni, dəsənnəngəni, dəɗinəngəni, dəprəməngən sap na va Yawe dəɗɗa as vani, Salala na Israyel dəzəməɗa.

Mərbə siti wil sit meŋgilveɗi

²¹ Məki wən nokum Yawe anahə; mərban əɗɗum nokum məlĩ na Yakob anahə.

²² Məde mənah səm zəgeɗ naɗɗa. Zəgeɗ nazzoŋ daabəŋ, an kəpeleŋ akan pak waməɗi kiyəm akani. Mərbet səm zəgeɗ nazzoŋ abe məsəngən va adaɗɗaŋgə.

²³ Mərbet səm zəgeɗ nazzoŋ abe, aməsən na meŋgilveɗ kənanaŋgə. Məgəɗ moggoni awaniɓa zəga daryaw kaka'ə, Ka məsəŋgləkangən mulagən sapə.

²⁴ Awla, kəgapaŋ zəga gapsa ɓa, wəza nokum zəga ɗari. Ɗəf an dəwelkum na, awelik zəga daryawə.

²⁵ Sə tapaslay pay kəla disiŋ nəsilginik ɗəfa, tay əgapa. Sədəmmba pay nampum, niya də iya nani. Tay əndepet deyeɗe va ndərɓa, awaniɓa, va məzərka adawɗan dəlva.

²⁶ Naway dərban səza wətəŋ nan ka məsəngən di? Naway dənah far ka mənahgən na: Gesiŋgi yi di? Ɗəf tay dərban ɓa, ɗəf tay dənah ɓa, ɗəf tay dəprəm əpel nokum ɓa.

²⁷ An dəgap daabəŋ a Siyon amna: Awle, awle yeŋki. Nəslənək maslən a Yerusalem.

²⁸ Nuwəlka, ɗəf təttaka tay ɓa ɗəf tay səmmbet məzugilgin əɗɗum nawsəɓ ɓa, ɗəf tay nazlan an nəttokuk ɓa.

²⁹ Beymeti, məɗɗaŋ mbəraynəŋ, wəza neti, zəga ɗari yi. Zəgakamaŋgəlva neti, səmyã mekeleŋgi yi!