Isaya 40 - Bible en Guidar

Əpel temtem naffeten makra Israyel ( 40:1—55:13 ) Məsɓet ɗiy nawa

¹ Məffeten mekreti, məffeten mekret ɗiy nawa, vas Maŋgəlva nokum anahə.

² Məzzayan makra Yerusalem, məprəman sən na wəza tatwãh nan agrakka, vi afaɗək mambray nani, arahək tatwãh təl sula səva Yawe aket mambrayɗe nan pakə.

³ Ɗəf tay ənzla vaŋvəl a kapta-muyã: «Məzaɓan tive na Daya, məzeɓet tiveɗ na Maŋgəlva nam dəssoŋgən sarara.

⁴ Walaŋ pak dəsan məndəkən səɗalə, mossorgo metiŋ də mossorgo pak dəssoŋ pəlayə, təki ɗoggro'o dəkkpaŋ pəlayə, təki məzlip-zlip dəkkpaŋ fidihi.

⁵ Asna, gagdak na Yawe warbə, ɗiy pak wawlanən na, Yawe apelke.»

⁶ Ɗəf tay ənəh na: «Atəl ma.» Yaŋ nəzlan na: «ətəlma na miy di?» Ɗəf titir pak tay va kevile, lelew nan pak va əffuyo awray.

⁷ Kevile wakələ, əffuyo waɓətə, an əmpəs na Yawe affuk akani. Ɗiy pak vaskəŋ va kevile.

⁸ Kevile wakələ, əffuyo waɓətə, ya əpel na Maŋgəlva nam wasan hã faɗə.

Alabara nenek nawtəlma nani

⁹ Nok apeŋ aka mossorgo metiŋ məɓayən is Siyon, mərbə alabara neneke. Aslan wəlok dayadaya, is Yerusalem, mərbə alabara neneke, aslan wəloko, geslne aduk ɓa. Anah sit walaŋgəleɗe gugriɗ na Yuda na: Maŋgəlva nokum yaŋka.

¹⁰ Yawe Maŋgəlva yaŋka Tay əzzan də gbəgboŋgo, gbogboŋ nan dədawrəh sən məlyã. Əfaɗ na iya na wəza tay avani, zəga nawfet aka ɗəf tay abani.

¹¹ Wataɗ gazlaŋ nan va məzutaɗa adawtaɗ gazlaŋ nani, waslet kirit timeŋgiɗ də vani, wambu' a makrani. Walmet timeŋgiɗ məzəweɗgitin kirtit də maɗɗula.

Memetiŋge gəm maɗɗula na afən dələv gboŋgu

¹² Naway dəsle iŋkile nammba dələv də gədəv vani, dəsla təki a disiŋ dit kirtin van paparə, dəsla burɗuk na dəlvafuŋ addəvət huloŋku, dəsla gagdak net mossorgoɗe gugirɗe gəm net mossorgoɗe də zəga nawsla gagdak di?

¹³ Naway dəsən kpukpum na əɗɗum na Yawe dədarban sən zəga gəm nawsəɓ sən di?

¹⁴ Də nawa azgə meŋ dəprəman sən gəm dəyagan sən tive na təstəsə, dəyagan sən əsəna gəm tive nawsən zəga di? Naway dəyagan sən tive na təstəs di? Naway dəyagan sən əsəna gəm əprəm gabba zəga di?

¹⁵ Ɗiy-ɗar yeŋ təlem va iŋkile dədawbətaŋ sə gagiya, va burɗuk aka zəga nawsla gagdaka. Mətəwəraɗe yeŋ folfol va ologudum ndeŋge.

¹⁶ Wəleŋɗe rəɓ na Liban dəgap naknəh wəray nasɗa offo ɓa, zəgeɗ memeyẽɗ nan dəgapaŋ əvəl nawzla kurmbuɗuk ɓa.

¹⁷ Ɗiy na dələv pak tahəŋ va zəga ɗar ama harani, tay ulet ɗar foŋlorro ɗarə.

Maŋgəlva aslə na də zəga mbərən ɓa

¹⁸ Nawa kədawslanən Maŋgəlva dəndən di? Foto mi kədawslanən dəndən di?

¹⁹ Zəgamaŋgəlva sa? Məzaɓ-zəga dəhə̃sa, yaŋ məhə̃s təbəz akkəɗ sən meleŋge, abaysən gawla dit everzleɗ na təbəz babar məhə̃sən.

²⁰ Ɗəf an məssahã aɓapna əɗɗa zəga vas ɓa, wəlaŋga məs aŋgənan ɓa adawele, məs kokono nawzaɓ zəga adawkaya dəzaɓgən zəgakamaŋgəlva nawziw ŋgbiki.

²¹ Kəsən ɓa sa? Kəprəmən ɓa sa? Mənah sukumi səza ətəŋ nan ɓa sa? Kəprəmən gabba ətəŋ dəlvafuŋ ɓa sa?

²² Ndəni dəsan a disiŋ ki dəlvafuŋgu, məs ɗiy nakan assoŋ va heyɗeŋɗe. Ndən dəpak disiŋ va gabaga, tay əpparən va gizlirke vi kassa adaka.

²³ Tay əvviren gagdak net ɗiy gugriɗ naka dəlva. Akkpeŋgetik mətawaŋwən naka dələv va zəgeɗ ɗarə.

²⁴ Məggraki əmpet ɓa ləŋgə, məggraki əzlget ɓa ləŋgə, weleŋgit dəmpa suwerin aka dəlvafuŋ ɓa ləŋgə, yaŋ afu' səmyã aketi, adaŋkəlaŋgə yaŋ barkataŋ asilgit a disiŋ va kevile.

²⁵ Də nawa kədawsləwən ka nəsawgən va ndən di? Salala anahə.

²⁶ Məslan horokum a disiŋ, mula, naway dəzəmiɗ zəgeɗ vet di? Ndən dədawgilgin dula net gədakə, dədawyet pak də iya neti, vi tay də əɓap diyɗa, gbəgboŋ nan nanəhi ɓa, taka tay dəzə ɓa.

Gbogboŋ meleketen sit ɗiy dəddakaŋgə

²⁷ Vimi is Yakob kədawnəhã, gəm Israyel kədawpel na: «Tive naw aɗamək sə ma hara Yawe, gesiŋ naw tay əɗam sə mahara Maŋgəlva nawa di?»

²⁸ Kəsən ɓa sa? Kəprəm na Yawe na, Maŋgəlva an faɗi yi, ndən dəzəmiɗ meŋge na dəlvafuŋ, addak ɓa, awya ɓa, keket tay nakgbeŋ əsən nan ɓa ɓa sa?

²⁹ Tay əpsən əɓap sən ɗəf dəddakə, gbogboŋ sən mələɓayləɓayə.

³⁰ Gewleɗ addakaŋka, ayaŋka; kirin aka seyit əzbər adazbəraŋgə.

³¹ Ɗiy en dəɗiyənən əɗɗum net aka Yawe tahəŋ əmsak ərəh gbogboŋgo; Tahəŋ əppar persleket va gazlaɗe. Ənzoŋgu, awyaŋ ɓa. Əddoŋgu, addakaŋ ɓa.