Isaya 39 - Bible en Guidar

Hizkiya atefik maslənɗe na Babilon

¹ Pay dəpaska, Merodak-Baladan, wətən Baladan, məlĩ na Babilon, aslənək ɗerewelɗe gəm əvəl sən Hizkiya, vi aprəmək na azgək gbəgba'a ya ambəlka.

² Hizkiya annekik də əzza neti. Arban sitik gəla nawzaɓan ərəh nani, təbəz babara, meleŋge, tursanɗe gəm mẽl məs məŋgənən moggoni may gəla nazeɓet gulomɗe nani. Zəga tay təttaka səddəv əzaɓ nan məs Hizkiya dərban sit siŋgil ananda may səka dələv nan ɓa ɓa.

³ Məskəleŋ Isaya ade ərəh məlĩ Hizkiya yas attokon na: «Mi ɗiy vet anahaŋ di? Səŋga azzoŋ di?» Yas Hizkiya azlan na, daga səka dələv faraɗa, sə Babilon azzoŋgu.

⁴ Isaya anah kan na: Ya mi awlaŋ addəv gəla nok di? Hizkiya azlanək na, zəga an dəsan pak awlanənka. Zəga naddəv əzaɓ naw tay məs nərban sit ɓa ɓa.

⁵ Yas Isaya anah sən Hizkiya na: Aprəm əpel na Yawe Məzuɓappakə:

⁶ Pay wade, zəga an dəsan addəv gəla noko də an efiŋgiɗuk akkalaŋ pak kawkani a Babilon. Zəga tay təttaka nappa ɓa, Yawe anahə.

⁷ Wagəmaŋ simmbet kirtuk məs dəgilyoŋ səddəvko en kəwə, karget dəssoŋgən məɗɗaŋ wəza ana məlĩ na Babilon.

⁸ Hizkiya aɓsən Isaya na: «Əpel na Yawe kəpeləs na lewi.» Anah əmpa na: «Ya aka pay naw na, zazay də əssa fendeŋ dədawsan ɓa sa?»