Isaya 38 - Bible en Guidar

Gbəgba'a gəm əmbla na Hizkiya

¹ Aka pay nani, məlĩ Hizkiya azgək gbəgba' va namta. Məskəleŋ Isaya wətən Amos pay ulani, yas anah sən na: Aŋki an Yawe anahə: Aman mok sən gəla noko vi akəmtə, kəmbəl na ɓa.

² Yas Hizkiya akkpaŋgan haran dəza gəla akkaman Yawe,

³ Amna: «Kamə Yawe, kamə aɗɗum na nədawək abok də gegesiŋ gəm makraw taka, gəm nəgəɗək moggon ama horoko.» Hizkiya ahəmək sawɓa.

⁴ Ndəni Yawe apel sən Isaya, dawnəh na:

⁵ Doko, kənah səngən Hizkiya na: Aŋki an Yawe Maŋgəlva na afuk Davit anahə: Nəprəmək əkkam noko, nulek sin noko. Nəpsukuk wəzva kəlaw kiyən sle' azani.

⁶ Wanəkõhguko, is də walaŋgəla-metiŋginəŋ səva məlĩ na Asiri, wanəga walaŋgəla-metiŋginiŋka.

⁷ Aŋki zəga dəde səza Yawe narban suk na, Yawe waknahan əpel an apeli.

⁸ Aka hara təki nawpeŋ na Akaz məs dəsan ara paya, zeŋgile aprikeŋke. Wanəmndeget dirɓe zəga na təl ɗəf zlakzlak kəlawə. Yaŋ pay amndan aka hara təki məs zeŋgile apirkoŋ akan nak zəga na təl ɗəf zlakzlak kəlawə.

Əkkam na Hizkiya dərɓaga əmbla nani

⁹ An Hizkiya məlĩ na Yuda aver səza ambəl səka gbəgba' nani:

¹⁰ Naw nənahək na: pəɗak na ənziya naw mərslani, aslək nəmmbatgəni nətoŋgən a təki nanziya net ɗiy mimtit kaggrek madammbirgit əzvaɗe nawa.

¹¹ Nənahək na, nula na ɗah Yawe aka dələv net ɗiy mederet ɓa, nəwəl na ɗah ɗəf əmpa səret ɗiy naka dələv ɓa.

¹² Ənziya egge naw aggrakka, məkani faraɗa səzawa, va gizlirke na məzutaɗa. Nəktəmək ənziya naw va məzuhõ gabaga adaktəmni, aɓuhuk gaɗmay faraɗa. Təŋ səza kapay hã dəfəɗ na wakəgrak də ina.

¹³ Nəɓəsək hã təki dadaŋgə, aŋzletik slesleŋɗe naw pak va ɓoolu. Təŋ səza kapay hã dəfəɗ na wakəgrak də ina.

¹⁴ Nəhəmək va papatawkə, nəhəmək va mukuɗuŋguloku. Haraw ayək dawla a disiŋ. Addəv əzəmsahã naw na Yawe, atərwa.

¹⁵ Mə nədawpel dəzlan sugən di? Vi ndəni dəɗɗa. Əzvaɗe naw pak wanədaw addəv ədagədəv nawa.

¹⁶ Yawe tay azeti. Wassoŋ medereti, Əmpəs nan wakkpaŋgan an nazet pak madarani wakəvay gbogboŋgo, wakəmbəlguwa,

¹⁷ Yaŋ na tatwãh naw akkpaŋgək əzaɓa, ya nok kəŋgluwəka kəzarguwək faraɗa səza vov nawza; vi mambray naw pak kəzganək dərɓogoko.

¹⁸ Vi təki nanziya net ɗiy mimtiti, agagdakok na ɓa; əmta zək nan aɗi na kiyuk ɓa. Ɗiy en dətoŋgoŋ addəv magamas tahəŋ də əɗɗum nawga səza təstəs nok ɓa.

¹⁹ Ɗiy mederet kaka' nawgagdakokuni, va in pay dəpaŋka, efit kirin waprəman sit təstəs noko.

²⁰ Yawe, kəkõhguwəka. Waməgagdakan Yawe pay na ənziya egge nam pak addəv gəla nani.

²¹ Yas Isaya anah na: «Məki uwa na sokoyo məklakani, mətip aka ənsla na məlyã,» wambələ.

²² Ndəni Hizkiya attok na: Mi dədarban su na wanəpeŋ addəv gəla na Yawe di?