Isaya 37 - Bible en Guidar

Hizkiya alək ula məskəleŋ Isaya

¹ Səza məlĩ Hizkiya aprəma, eŋgeretik lukutɗe nan karban na addəv tatwãhi, ndən gəm lukut na gəlabay azan kulo'u, yas ammbat addəv gəla na Yawe.

² Yaŋ aslin may Eliyakim, daya naka gəla na məlyã, Sebna məzuvere gəm ɗiy məsɓet net məsdəlveŋge aza məskəleŋ Isaya wətən Amos dit lukutɗe na gəlabay azeti,

³ dənah sənəngən na: Vaŋki Hizkiya anahə: Dəpaŋki pay na tatwãh gəm nawzəmsahã, pay net wili yi, vi muzliya go'o yi nawgilyeni, gbogboŋ nanɗəsən kawan tay ɓa.

⁴ Awsən ɓa, kuzuŋ Yawe Maŋgəlva nok waprəm əpel na daya net məzəlpaŋ na məlyã, məs məlĩ na Asiri daya nan aslən vi kawran Maŋgəlva madarani. Awsən ɓa, kuzuŋ Yawe Maŋgəlva nok watawwən aka əpel an aprəmə. Akkam ammbet ɗiy en dəppaŋgə.

⁵ Səza gewleɗ na məlĩ Hizkiya azzoŋ aza Isaya,

⁶ Isaya anah sit na: Vaŋ kədawnah sənən daya nokum: Aŋki an Yawe anahə: Kəgeslne vi kəprəm əpel məs gewleɗ na məlĩ na Asiri arawənəŋ ɓa.

⁷ In yakəŋ əslən əmpəs akani, waprəm wəna; wamil aka dələv nani. Wanəɗɗa ka kawbayən də masalam aka dələv nani.

Əbay gagay na Senakerib meleketeni

⁸ Daya net məzəlpaŋ na məlĩ nak mili, arəh məlĩ na Asiri alək sə Lakis kaɗɗa əgay də Libna azban adaka.

⁹ Səza aprəm wən aka Tirhaka, məlĩ na Etiyopi na: «Agilik kawgay dənduko.» Adan aprəm alabaraska, məlĩ na Asiri slən ɗiy aza Hizkiya dawnah sit na:

¹⁰ Mənah sən Hizkiya məlĩ na Yuda na: Maŋgəlva nok məs kədawbay vok akanəŋ ambəɗok dawnəh na, Yerusalem abət na ava məlĩ na Asiri ɓa ɓa.

¹¹ Tak kəprəmək an milyeŋge na Asiri aɗɗaŋ sitin dəlveŋge pakə, va azetini. Ya nok wakəɓap əkõh kan sa?

¹² Gala efiŋgiɗu azanən Gozan, Haran, Resef gəm kirtin Eden na Telasar na, meŋgilveɗ net akõhgitinik sa?

¹³ Ŋgahəŋ may məlĩ na Hamat, məlĩ na Arpat da, məlĩ na Layr, Sefarwayim Hena gəm Iva di?

Əkkam na Hizkiya

¹⁴ Hizkiya letər səvet maslənɗe nek tafə, aŋɗani, atoŋ addəv Gəla na Yawe, appar aba Yawe.

¹⁵ Hizkiya akkaman Yawe, amna:

¹⁶ «Yawe Maŋgəlva na Israyel, istə aket kerubaɗe, istə kaka' Maŋgəlva aket milyeŋge naka dələv pakə, istə kəzəməɗ disiŋ də dəlvafuŋgu.

¹⁷ Yawe apak sləmok aprəma, akol horoko Yawe awla, aprəm əpel məs Senakerib aslənəŋ pak vi kawran Maŋgəlva madarani.

¹⁸ Gesiŋ, Yawe, məlyeŋge na Asiri azetinik ɗiy naka dələv pak də dələv net pakə.

¹⁹ Azgetik meŋgilveɗ net akoffo, vi meŋgilveɗ net Maŋgəlvaŋ ɓa, wəza na ɗəfəŋ kaka'ə, məzeɓit dit wəleŋɗe gəm girmeŋgeŋ. Azetinke.

²⁰ Ya kakaŋ na Yawe Maŋgəlva namə akõhgəm səvani, milyẽŋge naka dələv pak dəsənnengən na, istə Yawe kaka'ə.»

Isaya tay əmndagan əzlan na Yawe

²¹ Yaŋ Isaya wətən Amos aslən aza Hizkiya wənah sən na: Vaŋ Yawe, Maŋgəlva na Israyel anahə, vi kəkkamawək aka wən na Senakerib məlĩ na Asiri.

²² Aŋki an Yawe apəl akani: Waŋ gbuɓɓo na Siyon tat əzeloko, tat əmas akoko Senakerib, Yerusalem tat əɓlan kiyən galagala dərɓogoko.

²³ Nawa kərə gəm nawa kərəm mama azan di? Aka nawa kəslan wəlok gəm kəslan horok a disiŋ di? Aka Salala na Israyel yi.

²⁴ Də met maslənɗe nok kəran Daya. Yas kənah na: Də diya net mawteɗ nawgay naw nəpeŋ aka dadwar kiyit mossorgoɗe gugriɗe addak Liban, vi kawbəl wəleŋɗe ɓəɓəlɗe məɓeyti kawbəl wəleŋɗe məwele lelewɗe. Wanəgap a metteɓere, anet wəleŋɗe nan ngərəɓə.

²⁵ Nəso'ək vov net iŋkile, iŋkile na guw nəsə dawɗi təlu nədakkpe' iŋkile səket tiveɗ na Eziptə.

²⁶ Kəprəm ɓa sa? Fari nəzaɓan as vani. Addivit əvoŋɗe dətoŋgoŋgu, kakaŋ na nəɗɗaka. Nəkika, vi kakkpeŋget walaŋgəleɗe gbogboŋɗe ka kpew net kiməskiɗe.

²⁷ Ɗiy dəssoŋ adak tahəŋ vet ngalɓay-ngalɓayə, geslne armeke tahəŋ dit wil areti. Tahəŋ va kevile nawra, gəm va kəvile dəgil aket təgbalkeɗe, dədakla məza əsɓa ɓa.

²⁸ Ya an kəsokko, an kəgilke, an kədeke, gəm an kədəkgədəv akawa, nəsənka.

²⁹ Adan kədəkgədəv akawa, əkaɓ nok aprəmək a sləmawa, asna wanəgul ogono naw a məŋkunko gəm helze naw a moko wanəmndogok dəka tive an kəde akani.

³⁰ Aŋki dədarban suko Hizkiya: Əzvaŋka wakəzəmaŋ menteɗe, əzva masulani, wakəzəmaŋ zlalwã. Əzva ma hoko'ən, wakəzlgaŋgə, wakəkkalanəni, wakəmpaŋ megezlembirkeɗ nokum gəm wakəzəmənən uwa neti.

³¹ En dəndəwəɗaŋ səddəv Yuda wassoŋ va suwer wəlaŋga afuŋgu, wawaŋ a disiŋ.

³² Ɗiy dəppaŋ wagilyoŋ sə Yerusalem gəm en dəndəwəɗaŋ aka gərəm na Siyon. Aski Yawe Məzuɓappak adaɗɗa addəv əŋgla nani.

³³ Vini Yawe anah vaŋ aka məlĩ na Asiri na: Atoŋ na addəv walaŋgəla-metiŋginin ɓa, ahon na har adak ɓa, aziw na aban də baray ɓa, akkpot na dələv aban ɓa.

³⁴ Dəka tive an ade, wamndan dəkani. Atoŋ na addəv walaŋgəla-metiŋginiŋ ɓa, Yawe aɗiymani.

³⁵ Wanəga walaŋgəla-metiŋ gəm wanəkõhgəni, viwa gəm vi gawla naw Davit.

Əmbat net mə Asiriɗe, əmta na Senakerib

³⁶ Maslay na Yawe argak dibirgiɗik na Asiri, abeyik ɗiy gabal səkat də kaklaw dodopoɗo kiyit sle'i. Səza addaŋgə, ɗiy asilyoŋ na, təki pak kigəbayit ɗiy mimtiti.

³⁷ Senakerib məlĩ na Asiri, asimke, amndanək asan a Niniwe də gəla.

³⁸ Adan adappu' addəv gəla na maŋgəlva nan Nisrok, kirtin abaynən də masalam, may Adrammelek də Sareser, ndəɗaŋ ɓak ənzoŋ aka dələv na Ararat. Asarhadon, wətən dəkkpaŋ məlĩ a gəlani.