Isaya 36 - Bible en Guidar

Məlĩ Hizkiya na Yuda gəm mə Asiriɗe ( 36:1—39:8 ) Məlĩ na Asiri tay əbay gəgay sən Yerusalem

¹ Aka wəzva makəlaw kiyən poɗo na Hizkiya aka məlyã, Senakerib məlĩ na Asiri, ade aket walaŋgəleɗe na Yuda mərka kiyit pak amohẽ.

² Məlĩ na Asiri aslənək daya net məzəlpaŋ də dula nalpa ammban diyɗa a Yerusalem aza məlĩ Hizkiya daga sə Lakis. Aziwik amabuzgum na məŋkpara məs dədaggbo' a məlpa metiŋ aka tive na guli na məskoɓ lukutɗe.

³ Ndəni Eliyakim, wətən Hilkiya daya naddəv gəla na məlyã, Sebna, məzuvere gəm Yo'a wətən Asaf daya naba məlyã, agilyoŋ ələmsəni.

⁴ Daya net məzəlpaŋ aɓsit na: Kamə məka əpel na məlĩ metiŋgiŋ, məlĩ na Asiri sən Hizkiya, mənah sən na: Mi məs kəɗi əɗɗum nok akan di!

⁵ Nəmna, əpel na ma ɗəf na əsəɓi gəm apsa gbogboŋ addəv əgaya. Kakaŋ na aka naway kəɗi əɗɗum nok kəɓoŋgən akawəŋ di?

⁶ Yaŋ kəɗiyək əɗɗum nok aka eflere məŋzləwən, ana Eziptə. Ɗəf dədappan zən akan na, wampa, watilik vani. Vaski Farawən məlĩ na Eziptə asan sit ɗiy en dəɗiynən əɗɗum net akan pakə.

⁷ An kənah suwək na: Aka Yawe, Maŋgəlva nam məɗi əɗɗum namə, namna ndəni məs Hizkiya akrap gəleɗe-nettuyeŋge nan gəm matuyaɗe nan gəm anah sit ɗiy na Yuda də na Yerusalem na: Aba gəla matuyaŋ kaka' kədappu'oŋgu ɓa sa?

⁸ Ya kakaŋ na arəm makra də daya nok məlĩ na Asiri kana, wanəpsuk pilseŋge gabal sula, an wakərah ɗiy nawpeŋ aketi.

⁹ Ya mbambar kədawɓap ərɓəh taka naret deyeɗe nalpa, ya kəta dəsan məddakən nammbet deyeɗe nalpa na daya naw dayday zlaŋ di? Yas kəɗi əɗɗum nok aka Eziptə vi kawrah mawteɗ net pilseŋge gəm mepeŋgeŋ pilseŋge!

¹⁰ Ya as lah na, Məza Yawe dənah su ɓa nəpeŋ wəlpa də dəlvəŋ gəm kawzan sa? Yawe zək nan dəɗi wən nan dawnah su na, dok aka dələv vani, azani.

¹¹ Ndəni Eliyakim, Sebna gəm Yo'a anahaŋ sən daya net məzəlpaŋ na məlĩ nak na: Kamə apel sit gewleɗ nok də ma Aram, vi maprəm əpel vani. Kədawpel səm də ma Yuda ɓa, ɗiy naka zlavaŋ waprəmnəni.

¹² Daya net məzəlpaŋ na məlĩ nak amna: Aza daya nok gəm azoki daya naw aslənu əpel wənəŋ sa? Awəl sitik ɗiy dəssoŋ aka zlavaŋka'e, namna net van wazəmnən pilwiti, wasenin kine neti, məstaka va nokum ɓa sa?

¹³ Ndəni daya net məpsən əsa sən məlĩ asil aŋgəsl vaŋvəl dayadaya də ma Yuda dawnəh na: Məprəm əpel na məlĩ metiŋ, məlĩ na Asiri:

¹⁴ An məlĩ anah yaŋka: Hizkiya ambəɗokum ɓa, vi aɓap na wəkõhgukum ɓa.

¹⁵ Hizkiya adaɗɗa ka kəɗiyəngən əɗɗum nokum aka Yawe dawnah sukum na: Yawe əkõh adawkõhgəmə, appan na walaŋgəla-metiŋgin ammba va məlĩ na Asiri ɓa ɓa.

¹⁶ Kədaprəmən Hizkiya ɓa, an məlĩ na Asiri anah yaŋka məsler də iyna: məppan kiykum suwa asna ɗəf pak wazəm megezlembirke gəm sokoyo nani, wasə iŋkile na vov nani,

¹⁷ də wəga əzza naw əndukum kawkukum aka dələv maɓɓan va zev nokumu, dələv na haykəmari dadabya gəm na mbazla na meketepe, dələv na zəga nawzəma gəm na megezlembirke.

¹⁸ Hizkiya adawmbəɗokum dawnəh na: Yawe wakõhgəmə ɓa. Meŋgilveɗ naket dəlveŋge, tay an dəɓap əkõhgən dələv nan səva məlĩ na Asiri ɗah sa?

¹⁹ Ngahəŋ meŋgilveɗ na Hamat gəm na Arpat di? Ngahəŋ meŋgilveɗ na Sefarwayim di? Akõhgənənək Samari səmmba vaw sa?

²⁰ Naway səmmbet meŋgilveɗis pakə, məs dəkõhgən dələv nan səmmba vaw ka Yawe dəkõhgənəgən Yerusalem səmmba vawəŋ di?

²¹ Ɗiy pak assoŋguk ɓataɓata'ə; dəpeleŋ sənən əpel təttaka dayday ɓa, vi aski an məlĩ aɗi wən nani, kədawzlanaŋ sənən ɓa.

²² Ndəni Eliyakim wət Hilkiya daya naka gəla na məlyã, Sebna məzuvere gəm Yo'a wətən Asaf məzərma an məverin pak azzoŋ aza Hizkiya lukutɗe net məŋgereti karban na addəv tatwãhəŋ, anah sənən əpel na daya net məzəlpaŋ na məlĩ naka.