Isaya 35 - Bible en Guidar

Əmilye metiŋgin net mə Israyelɗe

¹ Kapta-muyã də dələv mukuro dənnekeŋgi! Muyã dəsan babyak babyakə dəffuy va kidorgom.

² Uffuyõ adaffuyõ! Dəsan addəv ənnek kpakə, gəm addəv gəlya na ənneke! Gagdak na mossorgo na Liban wasan səni məpsəni yi lelew na mossorgo Karmel gəm na təki məpəlayya na Saron. Naway pak wawla gagdak na Yawe, memetiŋ na Maŋgəlva namə.

³ Məsɓan va ɗəf an dəyə, gəm məsɓan takkpra ɗəf an ləɓayləɓayə.

⁴ Mənah sit ɗiy en mekret dəɓoh na: Məsok zukum, kəgeslne'eŋ ɓa, Maŋgəlva nokum yaŋka. Əmpəlkiya wagapə Maŋgəlva wamndan harat huloŋguk sit məzuzelɗe nokum, wade wəkõhgukum.

⁵ Asna deŋgerɗe wawlaŋgə, sləmet goryomɗe wakolu.

⁶ Asna vədal wazlah va mune məs hərzlumən mərman waŋgəsl vaŋvəl sən ənneke. Vi iŋkile wagilyoŋ a kapta-muyã, lolohẽɗ wadawaŋ aka dələv məklakani.

⁷ Hoyoŋko məs pay azan slahslah wakkpaŋ bobok net iŋkile, dələv məs iŋkile tahəŋ adak ɓa ka heret iŋkile miyma. Təki nawtaɗ net wawayɗe na, ndəni təki naffet nani, vəlarɗe gəm eflere wagilyoŋgu.

⁸ Adak tive adawsani kawyani na tive salala məs mambray adaw akan ɓa, adəbərkiyit ɗiy na Maŋgəlva, dərweŋge zlaŋ azaŋ na akan ɓa.

⁹ Aka tive vani, ɓoolu; zəga darawən, assoŋ na akan ɓa. Adaki ɗiy en Daya akõhgit adadawaŋgə.

¹⁰ Ɗiy en Yawe akõhgit wamilyoŋ adaka. Wagapaŋ a Siyon də əŋzla vaŋvəl sən ənneke. Wassoŋ pay pak addəv ənneke. Ənnek waknihe, əhəm gəm əya net waggrakə.