Isaya 33 - Bible en Guidar

Əray aka məraygən təkiya

¹ Əray wasan suko, is məzan zəga pakə məza nan məzani ɓa məzəm kiyit ɗiyi məza məzəmni kiyən ɗah ɓa! An kəgrakək əraygən zəga na, kawrayguki tamə. An kəgrakək əzəm kiya, kawzəmni kiyuk tamə.

² Yawe arban səm mbəlembəle noko, akok məɗi əɗɗum namə. Asok gbogboŋ nam də mompumo pakə, məzəkõhgəm pay na tatwãha.

³ An ɗiy aprəmənək ɓaɓəlma əhãy noko, vandayɗe wanzoŋgu, vi an kəsilke, ɗiy naket dəlveŋge watrayaŋgə.

⁴ Kawndani ərah na ma wəgay nokum va adawndaŋ zaray. Kaɗɗay popoho aka zəga nawrəh səma əgaya va rəpək-rəpək net heyɗeŋɗe.

⁵ Yawe metiŋgini vi a disiŋ asani aknahək Siyon də wədaw sarara gəm wəɗɗa təstəsə.

⁶ Əɗɗa moggon wasan zəga napsuk zazay addəv pay noko. Əssa də maɗɗula gəm əsəna, ərahiy addəv wəkõhõ; ageslne sen Yawe, aski əzaɓ noko!

Daya wagəɗ zəga

⁷ Gamberet net aŋzlaŋgək vaŋvəl appaka yaŋka. Maslənɗe na zazay tahəŋ əmilyoŋ də əhəm aketi.

⁸ Tiveɗ tahəŋ sləɓək sləɓəkə, məzətoŋgoŋ tahəŋ aka tive ɓa. Apələk wənmiyna, azeletik walaŋgəleɗe gugriɗe, azga sləma aka ɗəf ɓa.

⁹ Dələv tay addəv əhəma, tay əŋkəla; Liban arbək wili, wəleŋɗe nan aɓətaŋka Saron tay va miktik na Araba, wəleŋɗe naka Basan də naka karmel tay əyyonən veti.

¹⁰ Kakaŋ na nəsili, Yawe anahə, kakaŋ na nəziwi, kakaŋ na gagdak naw dərbə.

¹¹ Əɗɗum nokokum kevile məklakani yi, kuwaŋgək marbaza. Əmpəs nokum offo mətarnakumi.

¹² Ɗiy wassoŋ məhhətit va ɗama, degirgeɗ məbilit wazlaŋ akoffo.

¹³ Mənokum na faraɗa məprəm an nəgəɗə. Mənokum məs go'o, məsən gagdak nawa.

¹⁴ A Siyon məs mambrayɗe ageslne'eŋke, məɗɗaŋ ɗarɗar akkereŋke. Naway səmmbam nawɓap əssan gu'o də offo mətarna təki di? Naway səmmbam nawɓap əssan addəv movoro offo məzlə pay pakəŋ di?

¹⁵ Ɗəf məzədaw də wəɗɗa an təstəs gəm məzəpel sarara məzuzelən wən na vərum məzəɓoŋ dawtaf zəga na mekeleŋ məzəsuk sləman vi adaprəm wən na əbay gəbay ɓa məzəɗup haran vi adawla mambray ɓa.

¹⁶ Ɗəf nani wasan a təki məɓayən, milɓeɗəŋ nassoŋ təki nawɗam nani, way nan wasani iŋkile nan akkpapaŋ na ɓa.

Məppani Yerusalem

¹⁷ Wakulanən məlĩ addəv gagdak nani harok wawla dələv foroyforoy.

¹⁸ Wakəɗɗumon geslne an lahəŋka, wakəttok na: Ŋgahəŋ məzənɗaŋ di? Ŋgahəŋ məzuslaŋ zəga di? Ŋgahəŋ məkosetin gəleɗe məɓeyit di?

¹⁹ Kəmsak na ula ɗiy məɓaygənən kizitiŋ ɓa, ɗiy ma məzlaɓən, məs meslekelɓe a meti, məs met aprəm ɓaŋ ɓa.

²⁰ Awla Siyon, walaŋgəla na wəzləra namə. Horok wawla Yerusalem, təki nawtaɗa, gizlirke məs kawzargəni ɓa; kaptiwti məmpaɗe nan ɓa faɗə, kawpəlni helegeɗ nan ɓa.

²¹ Yawe warban səm gagdak nani. Məlpa wasan adaka, məlpa fədi fədiyə, bəlayɗe məs adaŋkoretin də wəlaŋga addoŋ na kəla dak ɓa, bəlayɗe gugriɗe akkaɗaŋ na ɓa.

²² Vi Yawe yi mətawwən namə, Yawe yi akamə. Yawe yi məlĩ namə, ndəni məzəkõhgəmə.

²³ Məgosloretiŋ helegeɗ noko, tahəŋ ɓəlɓəl ɓa, awɓap əziwgitin gebbet dədəkeɗ na bəlay ɓa, apparən gabaga ɓa. Asna kawɗakni zəga nawra səma wəgaya; vədalɗe zlaŋ wappohonən wərəh na mawgaya.

²⁴ Ɗəf tay nawnah na zu tay əssawa ɓa. Ɗiy na walaŋgəla-metiŋgəs warahaŋ əvvuy mambray neti.