Isaya 32 - Bible en Guidar

Məlĩ məgəɗ moggoni

¹ Məlĩ nawzəm məlĩ təstəsə yaŋka; deyeɗe warbanən gagdak net də wədaw an dəslə.

² Nawaydi pak səret wasan, va təki nawɗam sən barkataŋ va zlava aba buwən maŋgalaw, va iŋkile mədawaŋ aka təki məklakani va zəŋgile milɓe gagdak aka dələv məs pay adazla sla'sla'.

³ Haret ɗiy en dəsərəkaŋ ula amsaŋ na ɓa sləmet ɗiy en dəsərək əprəm wazgə sləma.

⁴ Məs met waɗumoŋ kawrah əprəm gabba wəna məs dədək amet wapeleŋ kakara gəm təstəsə.

⁵ Kawyani dərwa əmpa na ɗəf gagdaka ɓa, kawnahi na ɗəf matakataka na ɗəf təstəsi ɓa.

⁶ Vi dərwa tay əpel na dərwa, makran aka mbərayni yi, kaɗɗa an dədah ɓa gəm kawran Yawe. Wappan ɗəf an də may addəv maya, watak məs meme adawdaŋ dawsa iŋkile.

⁷ Məmak ɗəf na ərba nan mbərayni, tay əkay keket vi kawzet məssehẽŋɗe də əpel tepelke, də məssahã adawpel təstəs zlaŋgə.

⁸ Ɗəf tektek na tay əɗɗum aket wəzeɗe tekteki, tay əziw aket wəzeɗe tekteki.

Əsəɓ sit gil na Yerusalem

⁹ Gil məzulanən zit va zəga tay dəmbər sit ɓa, misili məprəmwa. Kirin muguluŋgit məzulanən ziti məsla zukum nəpelke!

¹⁰ Addəv wəzva də siɗikke abeŋ na, wakəkkereŋgi mənokum məzulanən zukum, wakəɗɗumoŋgu, vi əhor megezlembirke agrakka, zəga tay nakkal əmpa ɓa.

¹¹ Məkker kana mənokum məzulanən zukum va zəga tay dəmbər sukum ɓa, məgeslne'i, mənokum məzulanən zukum. Məppet zəgeɗ nawgul nokumu, məgbuku, minan gabaga na gəlabay addakkum.

¹² Məɓuh mokum də ərga mokrokum, viyit gulyenge lalawɗe gəm megezlembirkeɗ məzuwaŋgə.

¹³ Degirgeɗ dit tintifɗe atafənən dələv net ɗiy nawa, aket gəleɗe məzənnekeŋgi gəm walaŋgəleɗe məzəkaɓaŋgə.

¹⁴ Ɗiy wappanən kigəla na məlyã, walaŋgəla məs vanday addəvən wasan sləɓəkə, kigəla Ofel gəm gəla nawga assoŋguk ka təki ɗar faɗə, a təki korɗe nawra adawrahən ziti gəm təki nawtaɗ net wasliɗe.

Wən addəɗək gədakə

¹⁵ Hã gap əmpəs əpirken sə disiŋ akamə, gəm kapta-muyã adakkpaŋ guli net wəleŋɗe nawzəma guli net wəleŋɗe nawzəm tam ka wəleŋɗe ngərəɓə.

¹⁶ Asna ədaw təstəs wasan a kapta-muyã təstəs wampə addəv guli net wəleŋɗe nawzəma.

¹⁷ Təstəs waki zazaya, tatwãh asan na ɓa, əɗɗum afeyet na ɗiy ɓa.

¹⁸ Ɗiy naw wassoŋ a təki na zazaya, wassoŋ məza tatwãh ɓa, addəv əffet məza əɗɗum ɓa.

¹⁹ Viyit ɓeɓrezle, wəleŋɗe ngərəɓ waɓzlaŋgə, walaŋgəla-metiŋgin waɓəzlə.

²⁰ Ənnek wasan sukum, wakəzlgaŋ a təki iŋkile assoŋ pakə, wakəppetin medgeɗge awaniɓa koro də met ndolu!