Isaya 31 - Bible en Guidar

Mə Eziptiɗe: ɗiyəŋgə'e

¹ Əray aket ɗiy en məzəddoŋ a Eziptə ammba əbbaha! Tay əɗɗumoŋ aket pilseŋge, aɗiyənək maɗɗulet aket mawteɗ net pilseŋge, vi assoŋ diyɗa, gəm aket məpeŋgeŋ pilseŋge vi tahəŋ də gbogboŋ diyɗa. Awlaŋ aza Maŋgəlva Salala na Israyel ɓa, awkayanən Yawe ɓa.

² Ndən pak məs maɗɗulay: yas aki tatwãha, dəppan gagay nan ɓa. Asilik aket ɗiy məɗɗaŋ mambraya, gəm aket ɗiy en məzəɗɗaŋ an dəslə ɓa.

³ Mə Eziptiɗ na ɗiyəŋgə, meŋgilveɗiŋgə ɓa; pilseŋge net pilseŋgeŋgə, tahəŋ də əpsa day ki an məsərək ɓa. Daya əppar van kaka na: məzutər waskotu, ɗəf məs adawtər tamə, wazbərə, sulegit pak wagrakaŋgə.

Daya məzutər na Yerusalem

⁴ Aŋki an Yawe anah suwa: An ɓoolu awaniɓa wət ɓoolu tay əhay ammba zəga nampər nani, awgeslne sən vaŋvəl net məzuteɗeŋɗe məs dərɓəzlaŋ akan ɓa, appan zən sən ərga net ɓa. Vas Yawe Məzuɓappak adawpirken aka mossorgo metiŋ na Siyon gəm aka mossorgo kaɗɗa əgaya.

⁵ Va bəŋga məs dəppar perslekeni, vas Yawe Məzuɓappak adawtər Yerusalem. Watəra, wabite, wakõhgəni, wapəla.

⁶ Məmndoŋ aza ɗəf məs kuktuhun dəɓokum səni mə Israyelɗe.

⁷ Vi pay dəpaska, ɗəf pak wazget tuyeŋge na təbəz babara awaniɓa na meleŋge məs vokum mambray azaɓiŋki.

⁸ Asiri waskot ama masalam məs na vet ɗiyi ɓa; masalam na ɗəfi ɓa nawzani. Səba masalam vanəska, mə Asiriɗe wanzoŋgu, dula net gewleɗ net kappeti sən wəza na vavyakə.

⁹ Məzəmpəsən ɓəɓəl wanzan sən gəslne, məs dəmpanən tilit wanzoŋgu, deyeɗe wakkereŋ sən gabaga narban dələv azani. Yawe aɗiymani, ndən məs offo nan mərman a Siyon, offo məzuzla a Yerusalem.