Isaya 30 - Bible en Guidar

Kəkayaŋ əbbah sə Eziptə ɓa

¹ Yawe aɗiyman na: əray aket kirin məɓoŋti! Minaŋ wən məza dəde səzaw ɓa; minaŋ wənmiyna, məs tay addəv əɗɗum naw ɓa vi kakkalan mambray aka mambraya.

² Ndəɗaŋ məpurkoŋ a Eziptə, məza əttokon maw ɓa, vi kawɗam ara Farawən, gəm kawsor ara zeŋgile na Eziptə.

³ Əɗam a maŋgava Farawən wakkpaŋ sukum ərba wili, əsor ara zeŋgile Eziptə wasan sukum ərba wili,

⁴ Də ɗiy gugriɗ nokum assoŋ a Sowan səkay zlaŋ gəm maslənɗe nokum agapaŋgək a Hanes səkay zlaŋ,

⁵ warbaŋ wil azet ɗiy məs atəraŋ sitin na wəray ɓa. Abbahaŋ sitin na ɓa, atəraŋ sitin na wəray ɓa, wassoŋ sitin ka zəga net wili də zəga narba wili.

Ɗiy en nalbah əbbah net mə Eziptəɗe

⁶ Wəpel aket zəgeɗ memeyẽɗ na Negev. Aka dələv na tatwãha gəm nawzəm sahã, na ɓoolu mugolun də məzilin, na barway də bomtoro məzuveŋge. Tahəŋ əka aryeɗ gəm əzaɓ net aket korɗe gəm aket zlogomeɗ sit ɗiy məs tahəŋ də ətərwəray ɓa.

⁷ Əbbah na Ezipte zəga ɗari, ətər nan tay ɓa. Vini nəya na Rahab məs aɓla sə gəlan ɓa.

Əssak aka an nabe

⁸ Kakaŋ na, aver as van a maheret ɗiyi, aka kalaɓ nawver akani; aver addəv ɗerewel. Abe na wasan ka narban an nazzan hã faɗə.

⁹ Ɗiy mətemtiŋgə, kirin muwaŋ wənəŋgə, məs aprəmən mahenziŋ na Yawe ɓaŋgə.

¹⁰ Tahəŋ ənah sitin, məzulaŋ na kədawlaŋ ɓa, sit məskəleŋɗe na «Kədaɗɗaŋ səmən kəleŋ an təstəs ɓa!» Məpel səm əpel neneke məssoŋ də ula nawmbəɗan ɗəfa.

¹¹ Məkkpaŋ səka tive, məmzlah faraɗa səka tive an təstəsə kədawpeleŋ səmən wən na Salala na Israyel ɓa.

Əɓzla məs azaɓ na ɓa

¹² Aŋki an məs Salala na Israyel anahə: Adan kəzeleninik əpeləŋka, kəppanən maɗɗulokum sən ɗarɗar gəm əraya gəm kəmpanən təlkum akani.

¹³ Vini kana, mambray vanəs wasan sukum va əpɗak na zlava məɓayən asna ndən ədakɗaya gurzik na ndən əɓzla aka ma taka wow.

¹⁴ Əɓzla nan, wasan va əkrap na mesteɓe məs dəkrapə azaɓ na ɓa kawrəhni kasli nan a təki akrap kawgəm offo dəndən sə gulo ɓa, gəm kawmbaɗ iŋkile dəndən sə bobok ɓa.

Məssoŋ ɓatɓatə, məɗi əɗɗum nokum akawa

¹⁵ Vi aŋki an Yawe Maŋgəlva salala na Israyel anahə: əɗi marava gəm wəssa ɓatɓati yi wəkõh nokumu. Gbogboŋ nokum na, wəssa ɓatɓati yi gəm əɗi əɗɗum nokum akawa. Ya kəŋgəmaŋ ɓa.

¹⁶ Yaŋ kənahaŋ na: vaski ɓa dit pilseŋge mədazzamə. Ndəni kədanzoŋgu. Pilseŋge nam tahəŋ də kakara azeti. Ya məzərɓohkumən wassoŋ kakara day kikum!

¹⁷ Masokum taka waɓɓah ɗiy gabal abani; abet meseŋgiɗkum sle' wakənzoŋ pakə. En dəppaŋ mederet kawbitgiti va wəlaŋga məmpan aka mossorgo metiŋ, va zəga narba azan aka mossorgo.

Pay na əkõhõ

¹⁸ Vi vaski Yawe waga pay nawgəɗ sukum mbəlembəle, wasil vi kawla sãsãhkum. Vi Yawe Maŋgəlva təstəsi. Zazay azet ɗiy en məzuganən pakə.

¹⁹ Vi is vanday na Siyon, is məs kəsok a Yerusalem, əhəm kədawhəm ɓa. Ama əŋzla vaŋvəl noko wagəɗ suk mbəlembəle. An aprəmkuko, wazlan suko.

²⁰ Addəv tatwãh gəm əsərma nokum Daya wapsukum way dit iŋkile. Məzuyagok aɗam na səma horok əmpa ɓa, horok wawla məzuyogoko.

²¹ Sləmok waprəm əpel dərɓogok an is tat əddok dəka dəzəŋ awaniɓa dəka zlaɓay dawnəh na: «Tive yaŋka, azbani.»

²² Wakulenin tuyaɗe nokum məkkəɗ təbəz babar aketi, va də heslepe zəga məzaɓən dirnik na meleŋge məhəsən, wakəzget va zəga mərga'ən: wakənah sən na, agili.

²³ Daya wapsuk buwən vi zeŋve an kəzlək afuŋgu, dəlvafuŋ wawə suk zəga nawzəm diyɗa. Pay dəpaska, zəga mamayã nok warah təki nawtaɗ fiktuwi.

²⁴ Wasliɗ dit korɗe nanse marbaza lelem adawzəmaŋgə, məs adawtrayanən afuŋ də wəlaŋga nawtahan zəga.

²⁵ Pay na əŋgroɓ ɗiyi, an gəleɗe məɓeyit aɓzlaŋka, lolohẽɗ wazlalbayaŋ aket mossorgoɗe gugriɗ gəm mossorgoɗe.

²⁶ Pay Yawe adaynan huwa net ɗiy nan, an anzeɗik huweɗi, təla wakasak va paya, ya pay wawiɗ təl buhul va əkeɗeɗe na pay təl buhul.

Daya tay əzzan əɓolkot gali Asiri

²⁷ Yawe sən kiyən yaŋka, tay əzzan sə faraɗa, tay məknahən sən ədagədəva. Metteɓ man tay ərban ədagədəva, əpel na mam tay va offo məzlə təkiya,

²⁸ əmpəs nan tay va guzlo məknahən məzəgap ama wəla ɗəfa. Tay əzzan əgul ɗiy naket dəlveŋge də əɓlet na dərwa, gəm kawgul wawar nawza a met ɗiyi.

²⁹ Wakəyaŋ gəlya, va dəfəɗ naddaŋ na wəzləra. Wakənnekeŋgi va ɗəf adadaw əsla tələn də pozloro, vi kawmbat aka mossorgo metiŋ na Yawe, milɓe na Israyel.

³⁰ Yawe warban wəlan də gagdaka; warban va mbar van adawpirken vi karga ɗəfa. Warban gagdak na ədagədəv nani, addəv offo mətarnah təkiya, aka pay buwən adawziya gəm maŋgalaw dit ɓeɓrezle.

³¹ Asiri wageslne' sən əprəm wəla Yawe gəm sən van də tandaŋ an adargani.

³² Wərga də zleŋge pak, əzga na Yawe yi akani, waka sap də ɓaɓəlma gaŋgeɗe gəm gəzləŋtəndəŋɗe. Də əɓlan van adawgay dəndəni.

³³ Məkkpuɓtiŋ motoffoɗe dafsən a təki net ammba məlĩ vani məzaɓani, kpumi, sloproki diyɗa offo dit wəleŋɗe tahəŋ diyɗa əmpəs na Yawe tay va lolohõ na busuk məzuzla addəvən. Ndəni əmpəs na Yawe adawɗi offo, va offo məzuziya.