Isaya 3 - Bible en Guidar

Əttap addəv əzəm məlĩ a Yuda

¹ Daya, Yawe Məzuɓappak tay ətak zəga nawrəha, əzəma gəm iŋkile pak sə Yerusalem gəm sə Yuda.

² Gurom gəm ɗəf nalpa, mətawaŋwəna, məskəleŋɗe, məskaŋ heligi gəm ɗiy məsɓeti,

³ Daya net məzəlpaŋ gəm ɗəf tekteki, məsəɓaŋ sənən ɗəfa, məs sekeneɗi gəm miffenge.

⁴ Wanəɗi kirin memeɗeŋɗe ka milyeŋge neti, wadawgitin va aza əŋgla neti.

⁵ Ɗiy wazəmgənən sãhã na ziti, ɗəf wazəmgən sahã na məlməni gawla wazəmgən sahã na mazza, ɗəf an va ziwir wazəmgən sahã na ɗəf an tekteki.

⁶ Vi ɗəf wazla sən məlmən eŋgil ana afənda: nok lukut məsilip nok tay məlĩ nam kədasoko, kiməskiɗeŋ ammba vokuŋgə.

⁷ Pay dəpaska, ɗəf nan wasil kawnah na: miynə huwa nan ɓa; way tay anawda ɓa, lukut məsilip ɓa. Kəɗiwən məlĩ ɓa.

⁸ Vi Yerusalem askotko, Yuda aɓəslka. Əpel neti gəm wəza neti əɓoŋgi aba gagdak na Yawe.

⁹ Əkəw net tay ərba wən aketi. Tahəŋ ərbanən mambray net va ɗiy na Sodom aɗɗaŋgə dəɗamanən ɓa. Aw əraya, məɗɗaŋ əray ka kiyti.

¹⁰ Mənah na: dəɗah net ɗiy en təstəs vi wazəmən ətərwəray na wəza neti.

¹¹ Aw əray vi məsdaraw! Warah tatwãha; warah ammba vani.

¹² Kirin memeɗeŋɗeŋgə məzuzəmgətin sahã net ɗiy nawa; giliŋ dəzəmaŋ məlĩ aketi. Ɗiy məzədawgitin ɗiy naw tahəŋ əmzlahaŋ səka tive, gəm tahəŋ əraygən tive neti.

Ətawwən aket ɗiy gugriɗe

¹³ Yawe asilik də dolgoy, aziwik vi kawtaw wən aket ɗiyi.

¹⁴ Yawe atoŋguk ətawwən aket ɗiy misɓet net ɗiy nani gəm deyeɗe: mənokumtə kəzletin megezlembirkeɗi; gəleɗe nokum tahəŋ mbe'mbe' də zəga an kəhalaŋ səvet məssehẽŋɗe.

¹⁵ Vimi kədawndepin ɗiy naw gəm kədawbayaŋ gəgay sit məssehẽŋɗe di? Daya Yawe Məzuɓappak aɗiymani.

Gil gamaralɗe na Yerusalem

¹⁶ Yawe amna: kirin muguluŋgit na Siyon məzuguzloŋgə tay ədawaŋ wəlet ɗiliwwe, gəm ulaŋ də məslembeɗ hina; ədawaŋ telle, əɓletin weweɗe səka tilti.

¹⁷ Yawe waɓoɓrot muhur kiyit səket kirin muguluŋgit na Siyon pakə wappət muhur sə mirbizti.

¹⁸ Pay dəpaska, Daya watak zəga na gawla: weweɗe, zəga narma muhur kiya gəm ndama digil va təla a ma gərma;

¹⁹ metendeŋɗe, miypa'a gəm məmbəka.

²⁰ Mətərkiya, senɗe, helege na gize, bəbər na tursan gəm miha mərmahən.

²¹ Ndemeɗi gəm ogonoɗi;

²² lukutɗe na sləma kuɗkuɗu, maswar na ma wəla ɗəfa, məsərət kiya gəm gabal nammba vet gili;

²³ zəgeɗ nawla hara ɗəf dəndəni, lukutɗə va gbəŋtəŋɗe məsilipɗe, kulpupu nat ma'ãykə gəm məsərət kiya.

²⁴ A gəla tursan na zəga məŋgənən, a gəla helege nagze helege ɗarə. A gəla ətroɗ kiya təstəs na, kiya məklãhəŋ; a gəla lukut silip na sləma, lukut na gəlabaya. Əzla noffo a gəla gəɓa zə ɗəf lekeɗeklekeɗəki.

Gil net gəbayɗe na Yerusalem

²⁵ Ɗiy nok ama masalam adaskotoŋgu, məzəlpa gurom nok ama əgay adamta.

²⁶ Asna, ɗiy naddəv walaŋgəla-metiŋ nok pak wanɗəsaŋgə, wassoŋ addəv gəlabaya, wasan seŋseŋgi, wasan gubok afuŋgu.