Isaya 29 - Bible en Guidar

Yerusalem tay va məzani yaŋ akõh girzik

¹ Əray aka Ariyel, Ariyel, walaŋgəla-metiŋ akki məs Davit ampa dibirgidiki! Agəɗ əzva aka əzva də əkkpaŋ net əzləreɗi.

² Wanəsər ma Ariyel. Ənɗəs də əhəm dədawsan addəvən, wasan su va Ariyel, va ənah na gazway napsa slu aka təki nawzaɓ-Maŋgəlva.

³ Wanəmpa dibirgidik akok kiyuk tərwəsl nawgay də isi, wanəgulko, wanəsil akok də əkot dələv ɗigiti.

⁴ Wakəbətə, wakəpel səmmba dəlvafuŋgu; əpel nok wasan hədəkə ammba burɗuku. Wəlok wasan va wəla məzgep, dawgilyen sə fuŋ, əpel nok wasan sekeseke əgilyen səmmba burɗuku.

⁵ Dula net məzuzelkun wasan va rizze na hologudumu, Dula net məsdarawɗe wasan va eslesle ammba səmyã. Gurzik na,

⁶ Yawe Məzuɓappak wade uluk də əhay na buna, də əɓla na dəlva, də vẽŋvil də barkataŋ gəm də nzilimnzilim na offo məzəm təkiya.

⁷ Dula net ɗiy-ɗar pak məs dədaɗɗaŋ əgay də Ariyel, ɗiy en duguluni, dəkaraŋ kiyən də əbit gebbet dirɓe gəm məzəzəmgukənən sahã wassoŋ va əssine, va ula addəv dəfɗa.

⁸ Wasan va ɗəf məs may adawda ndən əssine na tay əzəm waya; ndən fəɗah na gədəvən foŋgo. Awaniɓa va ɗəf məs meme adawdaŋ ndən əssine na tay əsa iŋkile; ndən fəɗah na, məyani, ma wəlan məklakani. Vas adawsan sən dula net ɗiy məɗɗaŋ əgay də mossorgo metiŋ na Siyon.

Ətip daŋgar gəm əbay na mbazla

⁹ Məzgətə, məggətə, mətip harokum, məssoŋ vaska, Tahəŋ gərəŋgərəŋ, məza sən mbazla na megezlembirke ɓa, tahəŋ turok-turoku, məza zəga tay asaŋ ɓa.

¹⁰ Vi Yawe aggbo'uk əmpəs nawleŋ kpum akokum; atipik horokum, mənokum məskəleŋɗe, asərətənək kiykum mənokum mulaŋ heligi.

¹¹ Hənhən bayman asan sukumək va əpel naddəv ɗerewel mətip man məs adapsənən ɗəf məs dəsən əŋɗan əver də wənah sən na: «Aŋɗan ɗa» yaŋ azlan na: «Nəɓap na ɓa vi mətipni mani.»

¹² Yaŋ məpsən ɗerewel nak sən ɗəf məs dəsən ənɗaŋ əver ɓa də wənah sən na: Aŋɗan ɗa; yaŋ azlan na: Nəsən əŋɗan əver ɓa.

Zəgeɗ midigurzike dəggrakaŋ ɓa

¹³ Daya amna: ɗiyiŋ tahəŋ əzzoŋ azaw də met ɗarə, də met adagagdakawən kaka'ə, mekret farafaray səzawa. Əgeslne adawgeslne suwənəŋ na mahenziŋ məs ɗiy ayegetini yi.

¹⁴ Vini kana, wanəzban əɗɗe sekeneɗ naggət aket sit ɗiyiŋki sekene aka sekene. Vi maɗɗula net məsmaɗɗulet dəzəgəni, əsən net məs əsən aket dəɗamgəni.

Ka nawa kədawɗiynən Daya di

¹⁵ Əray wasan sit ɗiy məɗamaŋ sləkəɗ sə mahara Yawe, vi kawɗaman əɗɗum neti gəm kaɗɗe wəzeɗe net ara guzliyo. Mənahaŋ na: «Naway dədawləm di? Naway dəsənəm di?»

¹⁶ Əkkpaŋ mazarndaya nokuməŋka, kawgəmni məzərka ka dələv məkdəkan sa? Zəga mərkan wanah sən ɗəf məs dərka na: «Ndəni dəzaɓuh ɓa sa?» Zəga mərkan wanah sən məzərka na: «Zəga tay asən ɓa sa?»

Əddəɗ metiŋgini addəv ənziya

¹⁷ Abe siɗikke na, liban akkpaŋ na guli net wəleŋɗe nawzəma, guli net wəleŋɗe nawzəm tam ka wəleŋɗe ɗar ɓa sa?

¹⁸ Pay dəpaska, goryomɗe waprəmən an adaŋɗaŋ səddəv ɗerewel, deŋgerɗe wakolən haret wawlaŋ səra guzliyo gəm səra təki titire.

¹⁹ Məssehẽŋɗe wannekeŋ diyɗa də Yawe; məzurayɗe wassoŋ babyak babyakə, aka hara Maŋgəlva Salala na Israyel.

²⁰ Vi məsdaraw wazə, əzelen ɗəf wabay mani, məkayaŋ əɗɗa mambray wazaŋ pakə.

²¹ Məzəmaŋ ki ɗəf də əpele, tay əmpaŋ mazzaɗ aba mətawwən na walaŋgəla-metiŋ vasna ndəɗaŋ əzgan ɗəf təstəs addəv əza.

²² Vini Yawe anah vaŋ aka gəla na Yakob, ndən məs dəkõhgən Abraham: Yakob arbə na wil ɓa haran apok na bar ɓa.

²³ Vi an kirtin awlanənək an vaw agəɗ aweleŋti, wanəhaŋ na iya naw salalay yi wanəhaŋ na Salala na Yakob Salalay yi wageslne' eŋ sənən Maŋgəlva na Israyel.

²⁴ Ɗiy məsmaɗɗulet azlzlaɓ warahaŋ əsəna; ɗiy məs kiyit ɓəl watafnən iyaka.