Isaya 26 - Bible en Guidar

Walaŋgəla-metiŋ gbogboŋ

¹ Pay dəpaska, kawyani gəlyaŋ aka dələv na Yuda: Mənam tat də walaŋgəla-metiŋ gbogboŋgo. Daya atərwəslək dit zlavaɗe temtem sula.

² Məkol metiveɗi, ɗiy təstəs məs akkpaŋganən met ɓa dətoŋgoŋgu.

³ Daya də zuk soksok kədazga sləma aka zay na ɗəf məs makran barə, vi appanək kizən suko.

⁴ Məppan ki zukum pay pak sən Yawe, ha'aw sən Yawe, Yawe milɓe an faɗi yi.

⁵ Vi azgetik ɗiy en dəssoŋ aket mossorgoɗe; aslaŋgənək walaŋgəla-metiŋ məɓayən afuŋgu, aslaŋganək hã gap aka dəlvafuŋgu. Avərək hã aka burɗuku.

⁶ Məzurayɗe dit ɗiy məddekit wandapanən ammba tilti.

Əkkam pay madidirɓe

⁷ Tive na ɗəf təstəs na, sararay yi; kəziyanək tive na ɗəf təstəs sarara.

⁸ Gegesiŋ aka tive an ətawwən nok antarə, akoki məɗi əɗɗum namə Yawe. Əya iya noko, əɗɗum akoko, ndəni an ɗəf aŋgələ.

⁹ Magenegenew tay va dəɓoh ammbok də dəfɗa, in tat əkoyok addəv əmpəs nawa gəm addəv kpukpum na makrawa. Ha'aw, an is tat ətawwən aka dəlvafuŋgu, ɗiy nagge wayaganən ədaw va an dəslə.

¹⁰ An mulay sãhã aka məsdaraw, ayagan na əɗɗa təstəs ɓa, aka dələv an təstəs zlaŋ, agəɗ na zəga təstəs ɓa, awla na gagdak na Yawe ɓa.

¹¹ Yawe, vok tay tiliwwe aka ərga, ya awlanən ɓa. Wil wadenin dawla əŋgla nok kiyuk boŋ viyit ɗiy noko! Offo dətarne məseŋgiɗko!

¹² Yawe, is tat əpsəm zazaya, vi wəza nam pakə, istə kəɗɗa vimə.

¹³ Yawe, Maŋgəlva namə, deyeɗe mbirit azəmaŋgək məlĩ akamə. Istə kaka' mədawgagdakan iya noko.

¹⁴ Adan ɗiy mimtit amsakaŋ na əmbla ɓa, ɗiy mimtit asilyoŋ na ɓa. Vini kəslan wən nani, kəzeti, is kədawzan zəga an əɗɗumeti.

¹⁵ Kənzlərgitik ɗiy namə Yawe, kənzlərgitik ɗiy namə, kərbanək gagdak noko; kəzlzletetik meŋgeɗe na dələv pakə.

¹⁶ Addəv əzəmsahã, Yawe, aɗiyənək əɗɗum net akoko; an kəzlotuk bereti ndəɗaŋ əkkamokuni.

¹⁷ Va guluk dədaway go'o aza uwa, tədawsat ɓalwãy-ɓalwãy, tədawɓuh mat sən əssa vaski məsam aboko Yawe.

¹⁸ Məɗiyək daway, məsamək ɓalwãy-ɓalwãy yaŋ məwə səmyã. Məki əkõh aka dələv ɓa, məwə ɗiy en nassoŋ aka dələv ɓa.

Əsilye net ɗiy mimtiti, əzlot galiyit ɗiy aka mambray neti

¹⁹ Ɗiy nawa, ɗiy mimtit nokum wamblaŋgə kigəbeyit ɗiy nokum wasilyoŋ səka əmta. Ɗiy muvoŋgit addəv burɗuku məfɗahə, məŋgəsl vaŋvəl sən ənneke, vi minɗe nok minɗe na əkasakəŋgə, dələv wagilgit ɗiy mimtiti.

²⁰ Ɗiy nawa, mətoŋ eŋgili, məmset maddambeɗe akokum. Məɗam vi pay siɗikke hã gap ədagədəv na Daya toŋgu.

²¹ Vi Yawe tay əgilyen sə təki asan yaŋka, kawsilyen aka mambray net ɗiy naka dəlva. Dələv warbet mbel an aɗemet appaka, wappan gabba əɗemet ɗiy en məbeyit əmpa.