Isaya 25 - Bible en Guidar

Daya, təki nawɗam net ɗiy en təstəsə

¹ Yawe, istə Maŋgəlva nawa, wanərban gagdak noko wanətibiren iya noko. Vi kəgəɗək zəgeɗ naggət aketi. Ɓəlɓələŋ farə, aɓlaŋ ɓa.

² Vi kəkkpaŋganək walaŋgəla-metiŋ ka girmeŋge kpewi, walaŋgəla gbogboŋ ka kiməskiya. Kəzetik gəleɗe gbogboŋɗe net molhõyẽɗ assoŋ na va walaŋgəla-metiŋ ɓa. Kamsaki ərkan ɓa hã faɗə.

³ Vini ɗiy gbogboŋɗe adawgagdakokuni walaŋgəla net ɗiy-ɗar məsdarawɗe adawgeslne suko.

⁴ Vi təki nawɗam net ɗiy məddekit, gəm net məzurayɗe kənani, an tahəŋ addəv tatwãha. Təki nawɗam sən buwən maŋgalaw kənani, zeŋgile nasa ammban sən əzla na paya. Vi ədagədəv net məsdarawɗe tay gədak va əzi na buwən maŋgalawə.

⁵ Va təki kakãh a kapta. Kətakək gugoyo net məɓaygən kiziti. Va zeŋgile slaybuwən adaffeten təki kakahã, gəlya net məsdarawɗe adawsan semsemi.

Waynabaya

⁶ Aka mossorgo metiŋgin vanəska, Yawe Məzuɓappak wapsit waynabaya slu məs səlhã də mbazla ammbani slu nenek məs səlhã, mbazla məɗɗoto moggon fõtfõt ammbani.

⁷ Aka mossorgo metiŋ vanəska wator zəga na gəlabaya məs ɗiy aguloŋ pakə, waggbuk lukutɗe na gəlabay məs dəssoŋ azet ɗiy-ɗarə.

⁸ Tay əzan əmta ka faɗə. Yawe, Maŋgəlva wappay sin səret ɗiy pakə. Wazargən ərba wil səket ɗiy nan səka dələv pakə. Ha'aw Yawe dəpeli.

Ənnek vi Israyel, əray aka Mo'ab

⁹ Pay dəpaska kawnahi na: Aŋki Maŋgəlva namə. Akan məɗɗi əɗɗum namə ndəni dəkõhgəmə. Yawe yi məɗi əɗɗum nam akani. Waməgəɗ iyã'-iyã' wamənneken zəm vi sən əkõh nani!

¹⁰ Va Yawe tay əga mossorgo metiŋ vanəska! Ya Mo'ab wasan məndapan a gəlan agəlani, va kpew na marbaza məndapan aka dagərgiya.

¹¹ Mo'ab van waɓlan vani, va məzəŋkor adaɓlan van daŋkoro. Va adawgay kawkohəs pak Daya wazan əkaɓ nani.

¹² Aɓzluwik zlavaɗe nok na korgu məɓeytiŋki, asleŋgetike, azgetik hã afuŋ.