Isaya 24 - Bible en Guidar

Ətawwən na Maŋgəlva aka dəlva ( 24:1—27:13 ) Dələv bayman arayka

¹ Daya tay əraygən dəlva, tay əkkpaŋgan kapta-muyã, tay əkkpaŋgani, tay ətraygit ɗiy nakani.

² Əray məstaka dədawrəh məsdəlva va ɗiy-ɗarə, daya va ɗəf məgəɗ wəza nani, dayakə va balamək nata, məvəl zəga va məlbah zəga, məpsən dəmən sən ɗəfa va məŋgəl dəməna, məs dəmən nan nawfaɗ də iŋkile akan aka ɗəf va ɗəf məzban dəməna.

³ Əray dələv adawraya, əmõhon adawmõhonəni. Vi Daya yi dəpel əpeləska.

⁴ Dələv tay addəv əska morkoyo, tay əddak telle. Ənziya egge akəlka, tay əddak telle. Ɗiy tektek net ɗiy naka dəlvafuŋ tay əddakaŋgə.

⁵ Dəlvafuŋ arnokuk səmmbet ɗiy nakani, vi amzlahaŋgək səka an Daya ayagan siti akkaɗaŋgək ki mahenziŋ, apələnək wənmiyna, an dəsan faɗə.

⁶ Vini əray azəm dəlva ɗiy nakan dəraygənəni, vini ɗiy naka dələv van azlaŋgə, ɗəf titir siɗɗike dəpəl ɗarə.

⁷ Mbazla na meketepe tay əggraka guli na megezlembirke tay əɓəta, məs zit nek pak tay əɓuhnən meti.

⁸ Ənnek net dəgəleɗ aɓətka, gogoyo net məzəɗɗəlaŋ aggrakka, ənnek də gaŋgara aɓətka.

⁹ Awsaŋ mbazla dawya gəlya ɓa, mbazla məhəsən akkpaŋgək kiyɗak-kiyɗak a met məzusanəni.

¹⁰ Walaŋgəla-metiŋ seŋseŋ aɓəzlka, məmsani met gəleɗe ətoŋ tay adak ɓa.

¹¹ Aket tiveɗi, ɗiy tahəŋ əɓuh met ammba mbazla tay ɓa. Ənnek pak tay ɓa, ənnek alək səka dəlva.

¹² An dəpəl a walaŋgəla-metiŋgin na əray yi gəm əza, metive nan məbzluwni.

¹³ Vas adawsan aweleŋgit ɗiy naka dəlva, zəga tay nawsan tektek ɓa, va hereme məzlbani, va megezlembirkeɗ mətaw mokkoy nani pay məhorun gərakə.

Salalay daabəŋ ki wəzləra

¹⁴ Net tahəŋ əslan wəlet əŋzla vaŋvəl na ənnek əgagdakan Daya; tay əŋzlaŋ vaŋvəl hã a disiŋ hã sə kəlammba pay na moskoyo.

¹⁵ Vini adawgagdakanən Daya ammba pay nampum. Aket mətuwəraɗe na pehe, tahəŋ əya iya na Daya Maŋgəlva na Israyel.

¹⁶ Mənam tat əprəm gəlya, əzzan sə metteɓ ma dəlva: Gagdak aza an Təstəsə! Naw nənahək hara na: naw məzaw nani, naw məzaw nani, əray akawa! Məzəmaŋ kiya tahəŋ əzəmaŋ kiya, əzəm kiya net məzəmaŋ kiya tay əzəm kiya.

¹⁷ Geslne', vovu, gəm mazzaɗə, as dədawgukum, munokum ɗiy naka delva.

¹⁸ Ɗəf məzənzan səba vaŋvəl məɓoh makra ɗəfa waskot addəv vovu. An məzugilyen sə vovu, warəm aka mazzaɗə. Vi met iŋkile na disiŋ akolko, gabba dəlvafuŋ aɓəlka.

¹⁹ Əwiɗi dəlvafuŋ awiɗiyi, əpɗak dəlvafuŋ apɗakə əɓla dəlvafuŋ aɓələ.

²⁰ Geŋgeɗ-geŋgeɗ dəlvafuŋ aɓəl va məs mbazla abayə, tay əɓla va gizlirge nawga. Mambray nan tay gədak akani, askotko, asil na əmpa ɓa.

Əggrak net məlyeŋge, ətəŋ əzəm məlĩ na Maŋgəlva

²¹ Pay dəpaska, Daya watawwən net məzəlpaŋ na disiŋ a disiŋ, wən net milyeŋge naka dələv aka dəlva.

²² Əkkal adakkeletin va məfərsəneɗ a vovu, wamsan met addəv tuzoŋ na gəla na fərsəna. Sədərɓaga əvoŋɗe diyɗa, kawtawni wən neti.

²³ Wil wadanən təla, paya warbə wili. Vi Daya Məzuɓappak məlĩ yi aka mossorgo metiŋ na Siyon gəm a Yerusalem. Gagdak nan warbə a ma heret ɗiy məsɓet nani.