Isaya 23 - Bible en Guidar

Əttəlan Tir

¹ Əpel aka Tir. Bəlayɗe na Tarsis, məɓuh mokum, vi zəga pak azəka, gəla tay dəpəl ɓa. Dawmilye sə Kitim wən van arbə azeti.

² Məɓətə, mənokum ɗiy na ma pehe, mənokum məzumanən vokum na Sidon, məs maslənɗe nokum adakkaɗaŋ ki pehe

³ kiyit iŋkile kpukpumɗe əki zəga na mabardaw mənsen ama məlpa Sihor gəm ama Nil, ndəni zəga nawrəh nani; ndəni lumu net ɗiy ɗari.

⁴ Wil aroko, Sidon, gbogboŋ na pehe, vi pehe amna: Nəgəm na əzəmsãhã nawɓay uwa ɓa, nəwə na ɓa, nəɓeygit na gewleɗ ɓa may nəzgəl na gorɗeŋge ɓa.

⁵ Pay wənəs agap a Eziptə ɗiy wakkereŋ sən an dərəh Tir.

⁶ Məkkaɗ hã a Tarsis, məɓuh mokum, mənokum ɗiy na ma pehe.

⁷ Aŋki walaŋgəla-mətiŋ nokum məs ənnek addəvnəŋ sa? Walaŋgəla-metiŋ məs dətəŋ na maguwa, məs dəzəm təki hã faraɗaŋ sa?

⁸ Naway diynan wənəs aka Tir ndən məs dədawɗak mətərkiya di? Məzumanən vet nan dayeɗeŋ məs adaŋɗetin məvəlaŋ zəga nan aweleŋgit ɗiy gagdakɗe naka dəlva.

⁹ Daya Məzuɓappak diynani, vi karbə sit wil sit məŋglaŋ əkaɓa, kawraygit ɗiy məs ɗiy negge adawgagdeketini.

¹⁰ Anse guli noko Tarsis, vi təki nawziwgit bəlayɗe tay əmpa ɓa.

¹¹ Va Daya tay təlla aka pehe, ageslnegitik milyeŋge, aɗiyək wən nan sən Kana'an dəzergitgin korguɗe nani.

¹² Anahək na: Sidon kəmsak na ətəŋ ənnek əmpa ɓa, waŋ mərayguk kənani. An kələk balsən walaŋgəla Kitim, adak zlaŋ, əffet tay viyuk ɓa.

¹³ Awla dələv net ɗiy na Kaldiya: ɗiy net tahəŋ ɓa. Asiri appanək dələv van sit zəgeɗ nawra, neti arketinik gəleɗe məɓeyit nawga, məŋgrofti gəleɗe na məlyã, akkpaŋgetik va kiməskiya.

¹⁴ Bəlayɗe na Tarsis, məɓuh mokum, vi məzani təki nawɗam nokum.

¹⁵ Pay dəpaska, kazgəti ki Tir əzva kaklaw buhulu, əzva na ənziya egge na məlyã. An əzva kaklaw buhulis agrakaŋka, an gəlya adawyaŋ sətən məpolkoyok adawnah nak warəh Tir:

¹⁶ Agəm gaŋgara, atərwəsl ki walaŋgəla-metiŋgini, məpolkoyok məzgətata. Abay gaŋgara nok təstəsə, ayə gəlya, ayə gəlya əmpa, ka ɗiy dəɗɗumokungəni.

¹⁷ Də əggrak na əzva kaklaw buhul na, Daya warban gagdak nan a Tir. Wamndan aka ərəh nan naka, wagəɗ polkoyo dit milyeŋge naka dələv pakə.

¹⁸ An arah gəm an məfaɗ səni, kepsini sən Daya. Kakkeleti ɓa, kawzeɓeti zaɓ ɓa, ərəh nan wasan ka nawzəm kpe' gəm əgul na sləma sit ɗiy məɗɗaŋ wəza aba Daya.