Isaya 22 - Bible en Guidar

Əttalan Yerusalem

¹ Əpel aka walaŋ na hənhən. Miy dərəhuk di? Vimi ɗiy nok beymet apeŋgeŋ aket gəlaɗe məggba'a di?

² Is walaŋgəla-metiŋgini məknəhən də geŋgere, də ənneke gəm də əzləra. Ɗiy nok ama masalam amtaŋ ɓa, ama əgay məbeyit ɓa.

³ Deyeɗe net məzəlpaŋ nok pak anzoŋguk baymeti, gulom akkpeŋgetik ka məfərsəneɗi. Ɗiy na nokda pak məkkpeŋgeti ka məfərsəneɗi, ɗiy en dəzoŋ faraɗa daydayə.

⁴ Vi vaski nənah na: Kədawlaŋ azaw ɓa, məppaw əhəm haraw pəreŋgi sin zletzleti. Kəyanən zukum əɓətgu aka əray na walaŋgəla net ɗiy naw ɓa.

⁵ Vi pay na gərəŋgi, nawzəmsãhã gəm na geslne na Daya Maŋgəlva Məzuɓappaki. Məɓzluni zlava vaŋvəl nabbah tay əŋzla aka mossorgo metiŋ, aka walaŋ na hənhən.

⁶ Elam andak gulom; məpeŋgeŋ pilseŋge dit pilseŋge məzəlpaŋ na Kir agilyoŋguk də baray neti.

⁷ Walaŋɗe məs kəwel aknahaŋgək dit məpeŋgəŋ pilseŋge dit pilseŋge aziweŋgik a maddamba.

⁸ Atoruk zəga nazzəɗ səka Yuda. Pay dəpaska, kəɗiyənək əɗɗum nokum aket zəgeɗ nawgay naddəv gəla adawyaŋ na Wəleŋɗe-Rəɓə.

⁹ Kulanənək əbzla na walaŋgəla-metiŋgin na Davit tay diyɗa. Kəkkeletinik iŋkile a mozgoy nafuŋgu.

¹⁰ Kəŋɗetinik gəleɗe na Yerusalem, kəbzliwinik en mbirti dəbbahgən ətak əkkaɗ ki zlava.

¹¹ Kəso'oŋguk bobok aweleŋgit zlavaɗe sula sit iŋkile naddəv mozgoy məzvan naka. Ya kulaŋ dəza ɗəf an dəɗɗa ɓa; kulanən ɗəf an dəzaɓ farfar ɓa.

¹² Pay dəpaska, Daya, Maŋgəlva Məzuɓappak wayukum kəhəmaŋgəni kəskaŋgən morkoyo, kəfaɗəngən kiykum gəm kəguloŋgən lukut na gəlabaya.

¹³ Mbaraka ənnek kədannekeŋgi: kətawaŋgək wəlet wasliɗe, wəlet gilewi, mənokum tat əmpəraŋ sluwa, mənokum tat əsa mbazla məzəm səmə, məsə səmə, vi mazayən waməmtə.

¹⁴ Daya Məzuɓappak aprəman suwək a sləmawa: sesel kavvuyon sukumi mambrayəs ɓa hã mənokum zamə. Daya Maŋgəlva Məzuɓappak anahə.

Əttəlan Sebna

¹⁵ Vaŋki Daya, Maŋgəlva Məzuɓappak anahə, dok ərah Sebna daya aka gəla na məlyã, anah sən na:

¹⁶ Mi nok aŋ di? Naway nok aŋ di? Ka kawso' magamas nok aŋka, magamas məso'ən a disiŋ aka mossorgo addəv milɓe ka təki nassa nok di?

¹⁷ Awla, Daya warɓohoko ɗəfa, iyna adaynok lewlewi.

¹⁸ Əktəm adaktəmuk vurgbu va mətəma kazgok aka dələv sloproku. Adaki kədamta, adak dit mawteŋɗe na gagdak noko, is məraygən gəla net deyeɗe noko!

¹⁹ Wanərɓahuk sə təki kəsoko, wanəprikguk sə gəla wəza noko.

²⁰ Pay dəpaska, wanəya gawla naw Eliyakim, wətən Hilkiya.

²¹ Wanəgul sən lukut misilip noko, waniynan sən gabaga na wəza noko, wanəpsən gagdak nok avani. Wasan efit ɗiy na Yerusalem gəm aka gəla na Yuda.

²² Wanəpsən zəga nawkol ma gəla na Davit avani. An akoluk maddamba, ɗəf tay namsan ɓa, ya an amsanəka, ɗəf tay nawkolən ɓa.

²³ Wanəmpa va wəlaŋga məkkpa'ən a təki ɓəɓəla. Wasan mazaŋga an də gagdak na gəla na afəni.

²⁴ Gagdak na gəla na afən pak vasna kirtini, mahəlfa nani, walawaŋ azan va zəgeɗ na mogulo, kasliɗe gəm hinziŋgiɗi adawɗiyin aka matəgari!

²⁵ Daya Məzuɓappak aɗiymani, pay dəpaska, wəlaŋga məmpan a təki ɓəɓəl nak waŋgəslə. Kaptuni, waɓəslə, kaŋgrofti zəgeɗ nazan lawlaw neki. Vaski Daya apelke.