Isaya 2 - Bible en Guidar

¹ Wəpel məs Isaya, wətən Amos awəl aka wən na Yuda gəm Yerusalem.

Ɗiy pak taddoŋ a Yerusalem

² Addivit əvoŋɗe nabe na mossorgo metiŋ naddəv gəla na Yawe wasan aket mossorgoɗe gugriɗe, waday kiyit mossorgoɗe. Asna ɗiy naket dilveŋge pak wazzoŋ sapsap akani.

³ Ɗiy diyɗa wambataŋ adaka; wanahaŋ na məndam əpeŋ aka mossorgo metiŋ na Yawe addəv gəla na Maŋgəlva na Yakob. Warbet sim tiveɗ nani, mədawgən aket tiveɗ nani vi sə Siyon gi mahenziŋ na Yawe adazzani əpel nan tam sə Yerusalem.

⁴ Wataw wən net ɗiy-ɗarə, wasan məzətər net ɗiy diyɗa. Dit masalamɗe neti, wavotoŋ gulekɗe, də tulhõ neti, wazaɓaŋ slogoyɗe. Dələv maɓɓan asil sən na maɓɓan ɓa, ayaganən na əgay əmpa ɓa.

⁵ Ɗiy na Yakob, məndamə mədawsəm addəv əkeɗeɗe na Yawe.

Pay na Yawe, pay nawtaw wəna

⁶ Kəzgetik ɗiy nok kirtin Yakob, vi meŋgilveɗ net ɗiy nammba pay nampum aknahaŋgək aka dələv neti wəɗɗaŋ tetele va net mə Filistiɗe, tay əslereŋ dit ɗiy-ɗarə.

⁷ Dələv net aknahək də meleŋge gəm də təbəz babara arya net agrak ɓa. Dələv net aknahək dit pilseŋge gəm dit mawteɗ net pilseŋge.

⁸ Dələv net aknahək dit meŋgilveɗ en ɗarə, tahəŋ əppu'oŋ aba wəza na veti, aba zəga an va ɗəf agəɗə.

⁹ Ɗəf pak waɓe'i waɓe' hã aka burɗuku kədavvuyon sit ɓa.

¹⁰ Dok a popor gərma aɗam a vov səba ədagədəv na Daya, faraɗa səba gagdak nani.

¹¹ Ɗəf məs awla ɗəf azan va ɗəf ɓa waɓegin harani, məɓaygən kiyzən kawɓegəni kini. Pay nani, Yawe yi kaka nawɗi kini.

¹² Vi pay tay Yawe Məzuɓappak adawɓegin məɓaygən kiyzən gəm məzula zəni. Wasil sən məslan kiyən vi kawɓegəni.

¹³ Wasil aket muguguleɗ na Liban məs əɓay net ləkləkə, gəm aket korvoŋɗe na Basan pakə.

¹⁴ Wasil sit mossorgoɗe gugriɗ meɓeyit pakə, gəm mossorgoɗe en ɗiŋgliŋ-ɗiŋgliŋ pakə,

¹⁵ wasil sən gəla məɓayən kpik pakə gəm zlava gboloŋgboloŋ pakə

¹⁶ wasil sit bəlayɗe na Tarsis pakə dit bəlayɗe en na sləma pakə.

¹⁷ Əkaɓ na ɗəf wazə məɓaygən kiyzən kawɓegəni kini. Pay nani, Yawe yi kaka nawɗi kini.

¹⁸ Meŋgilvet en ɗar pak wazaŋgə.

¹⁹ Asna watoŋgoŋ addəv bətəŋ aggərma, addivit vovɗe ənzagəslne səba ədagədəv na Yawe faraɗa səza gagdak na məlĩ nan pay adawsilye əki geslne' aka dəlvafuŋ!

²⁰ Pay nani, ɗiy wazgetin meŋgilveɗ ɗar məs azaɓan na təbəz babara gəm na meleŋge vi kappu abet nak sit maŋɗaŋɗe gəm sit dabargeɗi.

²¹ Vi kawtoŋ apoporit gərmeŋge gəm aweleŋgit gərmeŋge səba ədagədəv na Yawe, faraɗa səza gagdak na məlĩ nan pay adawsilyen əki geslne' aka dəlvafuŋ.

²² Məppan gabba əɗi əɗɗum nokum aka ɗəfa, əmpəs na məŋkən ɗəfi ɗarə. Miy ətər nan di?