Isaya 19 - Bible en Guidar

Əttəlet mə Eziptiɗe

¹ Əpel aka Eziptə. Daya yaŋka tay əzzan a Eziptə, də kakara aka slaybuwna. Meŋgilveɗ na Eziptə tahəŋ əzbəraŋ səbani. Mekret ɗiy na Eziptə aɓohko.

² Wanəsilgit mə Eziptə aket mə Eziptə, wagayaŋ naway pak də məlməni, ɗəf pak də meggeni, walaŋgəla-metiŋ də walaŋgəla-metiŋ, məlĩ də məlyã.

³ Maɗɗuleɗ mə Eziptiɗ wazlzlaɓə, wanəzan keket neti. Waskaŋ heligi gəm waddoŋ azet ɗiy məyaŋ zeŋgilet ɗiy mimtiti, awaniɓa məɗɗaŋ tetele.

⁴ Wanəppan Eziptə ammba va daya an məsdaraw; məlĩ tatrah nawsan akani. Daya Yawe Məzuɓappak aɗiymani.

⁵ Iŋkile sə pehe wakkpa'aŋgə, məlpa wakkpa'ə, wasan məklakan palpalə.

⁶ Milpeŋge waffokoŋgu, waso'õtoŋgu; lolohẽɗ na Eziptə, wakkpa'aŋgə. Eflereɗ dit vəlarɗe waɓətaŋgə,

⁷ Kevile net iŋkile na ma Nil naka məslere na Nil. Guli minsen a ma Nil waŋkələ, wazə. Zəga tay napla ɓa.

⁸ Mərmaŋ kilif waɓuhnən meti, ɗiy məzəzganən teklem net a Nil pak wahəmaŋgə, mekret məzəzganən zəva net aket iŋkile, wamtə.

⁹ Wil wadenin məɗɗaŋ wəza na helege na ngərayã məzlerən. Gəm en məzuhoŋ gabaga babara.

¹⁰ Ɗiy en dədəkeɗ na wəza nan waddakaŋgə, məɗɗaŋ wəza ka nawrəh hanza pak gidivit wadə.

¹¹ Deyeɗe na walaŋgəla-metiŋgin na Sowan kiyit tay kpak ɓa; məsmaɗɗulet məsəɓaŋ sənən Farawən tay əkiyaŋ əsəɓ məs ətər nan tay ɓa. Mbar kədawnahaŋ sən Farawən na: kirtit məs maɗɗulet mənani, kirtit məlyeŋge en lahəŋka di?

¹² Ŋgahəŋ məs maɗɗulet nok vet di? Dəboton sukun gəm dərban sukun kan an Daya Məzuɓappak aziwgin aka wən na Eziptə!

¹³ Deyeɗe na Sowan kiyit tay kpak ɓa, məmaketi deyeɗe na Memfis tay əzanən Eziptə ndəɗaŋ dədəkeɗ net mahəlfaɗe nani.

¹⁴ Daya akiyək əmpəs nawza aweleŋti: Tay əzanən Eziptə addəv an adaɗɗa pakə. Va məs mbazla abay adawkəɗəŋgəl aka əpar nani.

¹⁵ Təŋ sə disiŋ hã afuŋgu, ɗəf tay nawsəɓ sən Eziptə ɓa, gogozlo ɓa eflere ɓa.

Əssa na Eziptə an nabe

¹⁶ Pay dəpaska, Eziptə wasan va gili; wakker kpokpo an Daya Məzuɓappak aslanək van də əɓlan akani.

¹⁷ Dələv na Yuda wasan ka nawgeslnegən Eziptə. Va pay məpel wən nan aban pakə, wakker vi an Daya Məzuɓappak aziwgin akani.

¹⁸ Pay dəpaska, walaŋgəleɗe gugriɗ a Eziptə sle' wassoŋ məs adawpeleŋ ma Ibriɗ adaka gəm məsway nazban Daya Məzuɓappakə. Iya na an taka səmmbet na Ir-Haheres va ənah na: «Walaŋgəla na Paya.»

¹⁹ Pay dəpaska, addak walaŋgəla na Eziptə na gəlamatuya wasan sən Daya gəm serek məmpan sən Daya amaŋgava meŋge na dəlva.

²⁰ Kawsan zəga an dədarban na Daya Məzuɓappak tay a Eziptə yi. An mə Eziptiɗ ayanənək Daya ka dəkəgən wən ammbet viyit məsərnən met na, asna waslən sit məzəkõhgiti, ɗəf nawtərit gəm nawbitti.

²¹ Asna Daya warban zən a Eziptə, pay dəpaska mə Eziptiɗ wasənnən Daya. Waɗɗaŋ sənən wəza də wəzaɓ-Maŋgəlva gəm əvəla. Waynanən met taŋtaŋ sən Daya, wazbanəni.

²² Daya warga Eziptə, wambəlgiti: Ndəɗaŋ dəveti wamilyoŋ aza Daya, wataf əhəm neti gəm wambəlgiti.

²³ Pay dəpaska, tive wasapan Eziptə də Asiri. Mə Asiri waddoŋ a Eziptə, mə Eziptiɗe tamə a Asiri. Mə Eziptiɗ wagagdakanən Daya sap dit mə Asiri.

²⁴ Pay dəpaska, Israyel wasan mohoko Eziptə gəm Asiri, zazay yi aka dəlvafuŋgu.

²⁵ Vi Daya Məzuɓappak waɗɗa əzaɓ akan də ənah na: «Əzaɓ dəsan aka Eziptə, ɗiy nawa, Asiri an nəzəməɗ də vawa, gəm Israyel, haran an dəsan su moggoni.»