Isaya 17 - Bible en Guidar

Əttəlan Damas

¹ Wən mətawən aka Damas. Awle Damas aŋgəɗ na aweleŋgit walaŋgəleɗe gugriɗe əmpa ɓa wasan dagərgiya net gəleɗe miɓzliwti.

² Məzgeti walaŋgəleɗe na Aro'er teki nawtaɗ net zəgeɗ memeyẽɗi adassoŋgu wassoŋ adak məza ɗəf əfeyẽt ɓa.

³ Korgu na Efrayim asan na ɓa, məlĩ na Damas asan ɓa Aram asan na əmpa ɓa, gagdak net wazə va an net mə Israyelɗe. Daya Məzuɓappak aɗiymani.

⁴ Pay dəpaska, gagdak net ɗiy na Yakob waddakə, əkər nan waɓɓəkə.

⁵ Kawlani va mawala, an məbəlni palga gəm əpet ki haya. Wasan va pay nawpet hay a təki məpəlayya na Rafayit.

⁶ Əffek dəpəl ananda va pay naslba uwa net heremeɗ də əzləmbirit də zleŋge: uwa sula awaniɓa hoku səka wəlaŋga gəm poɗo awaniɓa sle' səka kivani. Aski an Daya Maŋgəlva net mə Israyelɗe aɗiymani.

⁷ Pay dəpaska, ɗəf wakkpaŋgan haran aka an dəzəməɗa, haran wawəl kəlaka Maŋgəlva Salala na Israyel.

⁸ Awəl na dəket matuyaɗe məs arkə ɓa, gəm awəl na aza an agəɗ də van ɓa, anet tuyeŋge Astereɗi gəm təki nawzla tursan.

⁹ Pay dəpaska, kappeti walaŋgəleɗe gugriɗ net korguɗe nani, va məppet walaŋgəleɗe net mə Hivviɗe gəm net mə Amorɗe lahəŋ aka əgap net mə Israyelɗe. Tatwãh metiŋgini yi.

¹⁰ Vi kəzgətək ki Maŋgəlva məs dəkõhguko, kəɗɗum aka milɓe nawɗam nok ɓa. Vini is tat əmpa guli net wəleŋɗe moggeti kəzləgək uwa na wəlaŋga na guwa.

¹¹ Pay nazlga zeŋve noko, də mompumo is tat ula an kəzlgə əgilye, is tat əɗɗa dəffuygəni. An mekkalən hara na tay əza an pay nawza adeke, əzəmsãhã məza miha nan ɓa.

Əttəlet ɗiyi

¹² Haya mi di haya, gogoyo net ɗiy diyɗa! Va ɓaɓəlma pehe. Ŋgbititi net ɗiy tay va wooo net iŋkile gagdakɗe.

¹³ Ŋgbititi net ɗiy məstakay də wooo na pehe. Daya tay əheyeti yaŋ adanzoŋ səzan faraɗa, tay əɓɓehit va eslesle məs səmyã naka mossorgo metiŋ adawka, va herɗe ŋgav məs vẽŋvil adalma.

¹⁴ Də moskoyo geslne yi, tak təki əddaŋga zəga tay dədappa ɓa. Aski haran net ɗiy en məzəppətməni, aski an nawrih ɗiy məzəmõhoməni.