Isaya 14 - Bible en Guidar

Əmilye net ɗiy məsimgiti

¹ Ha'aw Daya wawla sasah Yuda, wamsak əwel Israyel əmpa. Wamndeget ɗiy nan aka dələv neti, molhõyẽɗ wasapaŋ azeti gəm kawsapaŋ azet ɗiy na Yuda.

² Israyel watef molhõyẽɗi, wamndeget aka dələv neti. Aka dələv na Daya na, Israyel wagim ɗiy veti, zel dit gil ka belemɗe nani. Warme ɗiy en dirmetin a fərsəna, waɗi a fərsəna, wasan daya aket ɗiy en dəsərnən mani.

Əttəlan məlĩ na Babilon

³ Pay Daya adapsuk əffet sədərɓaga tatwãh gəm əzəmsahã nok metiŋgini, gəm wəza ɓəɓəl na balam məs kəgəɗə,

⁴ wakəyə gəlya nawmas aka məlĩ na Babilon wakənah na: Mbarmbari məsər ma ɗəf abayman di? Mbarmbari əɓaygən kiya nan agrak di?

⁵ Daya aŋzlanək zleŋge net məsdarawɗe, gəm tandaŋ net məpsənən tatwãh sən ɗəfa.

⁶ Ndən məs dədarge ɗiy lahəŋ addəv ədagədəv məza sosokko ɓa, agəɗ sitik vavyak sit ɗiy maslsla aman ŋgbofŋgbofu ərɓehet məza iya ɓa.

⁷ Dələv bayman addəv əffeti arahək zazaya, ɗiy tay ənzlaŋ vaŋvəl sən ənneke.

⁸ Wəleŋɗe lelewɗe tay ənnekeŋ viko. Muguguleɗe na Liban tay ənahaŋ na: «Daga kətoŋ addəv magamasə, ɗəf tay dədawbələm ɓa.»

⁹ Ezlezle nok armak təki net ɗiy mimtit ammba dəlvafuŋ vi kawləmsuk dazza. Tay əfɗehet ɗiy dəmtaŋgə, ɗiy en dəssoŋ milyẽŋge aka dələv pakə; tay əsilgit milyẽŋge net ɗiy-ɗar pak səka mazaŋga na məlĩ neti.

¹⁰ Ndəɗaŋ pak wazlanangə, wanahaŋ sukun na: Is vat tamə, is yakəŋ məddakuk va mənamə, məstaka dəndəmə!

¹¹ Məzgani lalaw nok afuŋ addəv təki net mimtiti, ɓaɓəlmet gəzləŋtəndəŋɗe noko. Tavay zəga nafna noko, tentiwilgeɗiŋ zəga nawpak akoko.

¹² Mbarmbari is ngərzla na ba pummo kəbət hã sə disiŋ di? Məzgok afuŋ is gurom məzet ɗiyi!

¹³ Nok kənahək a mokrok na: wanəpeŋ hã a disiŋ, aket ngərzleɗ na Maŋgəlva, wanəmpa mazaŋga na məlĩ nawa wanəsaw aka mossorgo metiŋ a təki nakkal net meŋgilveɗi, addəv kpukpum na disiŋ.

¹⁴ Wanəpeŋ balsən slaybuwna, wanəsaw məstaka də Maŋgəlva Məsəɗəɗə.

¹⁵ Mbaraka na a təki net ɗiy mimtit hã gbu' aza gabba vov kəpirki.

¹⁶ Ɗiy en dulaŋ kəlazok wasəŋgləkokən də maɗɗula, dawnəh na: Aŋki ɗəf dəɓlan dəlvafuŋ dəkkergit milyẽŋge naka,

¹⁷ məzəkkpaŋgan dələv va kapta-muyã, məzəkrep walaŋgəleɗe gugriɗe gəm məzəɓoŋ dappet ɗiy en mərmetiŋ sa?

¹⁸ Milyẽŋge na dələv pakə, ndəɗaŋ pak tay əffeteŋ də gagdaka ɗəf pak addəv magamas nani.

¹⁹ Ya nok na, məzgoki səddəv magamas nok appaka, va daway məlotən məs ɗəf aŋgla kawlan ɓa, dohoŋ ammbet ɗiy məbeyti məmbokit də masalamə. Məzget aket gərmeŋge addəv vovu va kigəbay məndapani.

²⁰ Kəsap na dənɗaŋ a təki nawndik ɗiy mimtit ɓa, vi kəraygənək dələv noko, kəbeyik ɗiy noko. Kawyani sləma gebbet məɗɗaŋ mbərayən ɓa hã faɗə.

²¹ Məzaɓan wən nawbay kirni vi mambray net efigiŋɗti, vi adawsilyoŋ kawtaf dəlva, kaknəh mammba dələv dit walaŋgəleɗe gugriɗe ɓa.

²² «Wanəsil dənɗaŋgə Yawe Məzuɓappak aɗiymani, wanəzet ɗiy gagdakɗe, ɗiy en dəppaŋ a Babilon kirtiti gəm kirtit naddəvti, vas Yawe aɗiymani.

²³ Wanəkkpaŋgan bobok ka təki nassa net tovvoɗe. Wanəfaɗ də sulhõ nawzet ɗiyi, Daya Məzuɓappak aɗiymani.»

Əttəlet mə Asiri

²⁴ Daya Məzuɓappak asselik də wənah na: gegesiŋ an nəziwgini, ndəni dədaɗɗa; an nəynə, ndəni dəddaɗa!

²⁵ Wanəŋzlu gbogboŋ na Asiri aka dələv nawa; wanəndapan aket mossorgoɗe gugriɗ nawa. Wanəprət zuk səma wəleti, gəm wanəzgan zəga nawsla nan səka kiyveti.

²⁶ Aski an aziwgin naɗɗa aka dələv pakə, aski əssa van təlla aket ɗiy pakə.

²⁷ Vi an Yawe Məzuɓappak aziwginik an naɗɗa na, naway nawtakən di? An van tay təlla na, naway dədawɓap ətak kiyən di?

Əttəlet mə Filistiɗe

²⁸ Wənəŋ aka əzva Akaz amtə yi.

²⁹ Filisti, kədanneken zuk vi məŋzluni tandaŋ na ɗəf məzərguk ɓa. Vi səza zev dohõ, barway adawgilyeni. Səza barway tamə dohõ an də muhun day əmpa.

³⁰ Asna ɗiy en dəddakaŋ diyɗa wataɗaŋgə, ɗiy en dəssoŋ na sãhã waddoŋ əvoŋ kiyit foŋgo. Is hara na wanəzan slalwayuk də mayã, wanəbey ɗiy nok en dəppaŋ medereti.

³¹ Maddamba na walaŋgəla-metiŋ, aŋgəsl vaŋvəla aɓuh moko walaŋgəla. Filisti də wən nan pakə addakka: vi enene va slaybuwən tahəŋ əzzoŋ hã sə kəla disiŋ. Ɗəf tay nawɗoh zən səddəv ədor nan ɓa.

³² Kawzlan mbar sit maslənɗe di? Vi Daya dəvani dəmpa Siyon; adaki məssehẽŋɗe net ɗiy nan adawkayaŋ təki nawɗama.