Isaya 11 - Bible en Guidar

Davit an meleketeni

¹ Gbugburzlo Yesse wandəfə, meggeɗe na slalwayən wawə.

² Əmpəs na Daya wasan akani, Əmpəs na maɗɗula gəm na əsəna, Əmpəs napsa əsəɓa gəm napsən gbogboŋgo, Əmpəs nawsən Daya gəm nawgeslne' səni.

³ Wasan addəv əgeslne' sən Daya. Ataw na wən də əziw aka an haran adawla ɓa, aziw na aka an sləman adaprəm ɓa.

⁴ Watawwən aket məssehẽŋɗe təstəsə, gəm wasan təstəs azet məzurayɗe naka dəlva. Əpel na mani, ndəni zleŋge məs adawvər dəlva, də səmyã na man adawbay məsdaraw zamə.

⁵ Təstəs gəm an dəslə wassoŋ sən va maslapa naynan dadakni.

⁶ Dəpaska kəramuyã də wət time wassoŋ akki taka, balgam wavoŋ də wət haw akki taka. Wət wasli gəm wət ɓoolu wazəmaŋ akki taka, wiyən muzliya wateɗe.

⁷ Wasli də zəga darawən adawyaŋ na ursə wataɗaŋ matakə, kirtit wavoŋgoŋ a maŋgava ziti. Ɓoolu va wasliya wazəmaŋ tərɗa.

⁸ Wiyən məzuwaɗ wasmay ama vov na barway, wiyən muzliya waɓap əgul van a vov na barway.

⁹ Aɗɗaŋ na mambray ɓa, tay məs adawraygənən səka mossorgo metiŋ salala naw ɓa, vi dəlvafuŋ waknah də wəsən gagdak na Yawe va iŋkile adaknahənən pehe.

¹⁰ Dəpaska, slalwãy Yesse yi nawsan va gabaga nawsən ɗiy azani, ɗiy naka dələv temtem wakayanəni. Təki nassa nan wasan də gagdaka.

Əmilye net ɗiy məsimgiti

¹¹ Pay dəpaska, Daya wappar van təl masulani vi kawmet ɗiy en dəppaŋ net ɗiy nani, ɗiy en dəndəwəɗaŋ sə Asiri, gəm sə Eziptə, sə Patros, sə Etiyopi sə Elam gəm sə Babilon, gəm sə Hamat gəm səket mətəwəraɗe na pehe.

¹² Waslan gabaga narban dəlva wakkelet en mərɓehit sə Israyel gəm kakkelet en mətrayet na Yuda wakkelet sə tapaslay poɗogən na dələv pakə.

¹³ Asna kotorok na Efrayim wabaymani, məsərnən ma Yuda wazaŋgə Efrayim asan na də kotorok na Yuda ɓa, Yuda arəm na mama aza Efrayim ɓa.

¹⁴ Wazlahaŋ a ma wəlet mə Filistiɗe nammba pay na moskoyo wappohetin ɗiy nammba pay nampum matakə. Edom gəm Mo'ab wassoŋ zəga nammba veti, mə Ammonɗe wassoŋ belemɗe neti.

¹⁵ Yawe wakkpe' iŋkile na heleleŋ na pehe na Eziptə. Addəv gagdak nawda gədəv nani waɓlan van aka məlpa, warslan ka lolohet buhul waɗɗa ka ɗəf dəkkaɗgən dit hensek aka tələn palpalə.

¹⁶ Vasna tive tay abet ɗiy nan dəppaŋgə, en dəppaŋ a Asiri, va appaŋ lahəŋ a Israyel gala adawgilyoŋ səka dələv na Eziptə.