Isaya 10 - Bible en Guidar

Məsilginin ədagədəv na Maŋgəlva

¹ Əray yi azet ɗiy məɗiyaŋ wən an tay təstəs ɓa, məgəmən zit əver mahenziŋɗe məzəkiyaŋ əzəmsahã

² Vi kawɓoŋ sit məssehẽŋɗe dawtaw wən net təstəsə, ka kawtak təstəs net məssẽhẽŋɗe naret ɗiy nawa. Ka gil net gəbayɗe dəssoŋgən ka zəga nawrəh na mawgay ka neti gəm keppit mitiweɗi.

³ Mə kədaɗɗaŋ pay wəzəmsahã adazzan daga sə təki faraɗa di? Aza nawa kədanzoŋ əɗam kawrəh əbbah di? Nga kədaddoŋ əzaɓan arya nokum di?

⁴ An dəmmbər na, ndəni əɓe' aret məfərsəneɗi, gəm əskot aret ɗiy məbeyti. Də as pak zlaŋ na, dəppan ədagədəv nan ɓa, van tay təlla aka ərga.

Asiri atoŋguk ki meŋge

⁵ Əray aka Asiri, tandaŋ na ədagədəv nawi, zleŋge navanəŋ na herɗe nawəŋ.

⁶ Wanəslən aket ɗiy mbəreyit ɗarə. Wanəɗi sən wən dəlgən aket ɗiy en məs gədəvu adawda aketi, vi dəmõhetgini dəɗɗagən popoho aketi, gəm dəndepetgin va adawndapan dələv aka tive.

⁷ Ya nan vaski adaɗɗum ɓa; makran vas adawtawan ɓa: vi tay əɗɗum a makran ka kawzeti gəm kakkẽh ɗiy diyɗa.

⁸ Vi tay ənah na: deyeɗe net məzəlpaŋ naw va məlyeŋgeŋ ɓa sa?

⁹ An dərah walaŋgəla-metiŋ na Kalno na an dərah Karkemisi yi ɓa sa? An nəgəɗ sən Hamat va nəgəɗ sən Arpati yi, may an nəgəɗ sən Samari na va an nəgəɗ sən Damasi ɓa sa?

¹⁰ Vaski nəzi vaw aket dəlveŋge net meŋgilveɗ en ɗarə məs zəgeɗkamaŋgəlva net aday kiyit en na Yerusalem də Samari.

¹¹ Va an nəgəɗ sən Samari gəm sit meŋgilveɗ nani, nəɗɗa na sən Yerusalem gəm sit meŋgilveɗ nan vas ɓa sa?

¹² An Daya agrakək wəza nan pak aka mossorgo na Siyon gəm a Yerusalem, wakkpaŋ aka məlĩ na Asiri, aka va adattəman a makran nawslan kizəni gəm aka ula neŋgres nani.

¹³ Vi anahək na: Də gbogboŋ na vaw nəɗɗa gəm də maɗɗula nawa, vi nawelen wəna. Nəddergitik meŋge net ɗiyi, nəmõhək arya neti, va məskə wəla gbogboŋ nəkgbuk ɗiyi.

¹⁴ Vaw agəmək arya net ɗiyi va səddəv gəla na bəŋga. Va adawndaŋ ɗeŋzle en də meti, nəzəmək dəlvafuŋ baymani məza tay an məs dəɓlan persleken taka dayday ɓa, tay dəkol man ɓa, tay dəhəm ɓa.

¹⁵ Zlimbe waɓaygən kiyzən aka ɗəf məbəl zəga dəndən sa? Slohõ nantar wəleŋɗe wawla zən dayki ɗəf məzərman sa? Tay va tandaŋ məzuslan ɗəf məzərga zəga dəndəni! Awaniɓa va zleŋge adawslan ɗəf məzəɗɗa wəza dəndəni!

¹⁶ Vini Daya Maŋgəlva, Məzuɓappak adawslən wətar aket ɗiy məkirit vetiski, a gəla gagdak neti, offo warəm va aka gəla.

¹⁷ Əkeɗeɗe na Israyel, wakkpaŋ offo; Maŋgəlva salala wakkpaŋ hərzləm offo wazle gəm waterne tintifɗe dit degirgeɗ nan, aka pay taka,

¹⁸ wazan lelew net wəleŋɗe nan na muyã dit en nawzəma, wazan wəlaŋ zə ɗəf də zeŋgilen pakə. Dələv wasan va məsgbəgba' məzurrumo.

¹⁹ Mambərgit wəleŋɗe na muyã nan wassoŋ siɗikke wiyən musɗuko waŋɗeti.

En dəndəwəɗaŋ a Israyel

²⁰ Pay dəpaska, en dəndəwəɗaŋ a Israyel gəm en dəkohõŋ siddivit ɗiy na Yakob, wappanən gabba ərma vet aza ɗəf an dədawvirti. Aza Daya Maŋgəlva Salala na Israyel adarmanən vet kpakə.

²¹ En dəndəwəɗaŋ wamilyoŋ; en dəndəwəɗaŋ na Yakob wamilyoŋ aza Maŋgəlva gbogboŋgo.

²² Israyel, an ɗiy nok anzləraŋgək va hoyoŋko a məlpa zlaŋgə, en dəndəwəɗaŋ kaka dədawmilyoŋ azani. Əza tay məzaɓan gərak narban təstəsə.

²³ Vi əray məzaɓan gərakəs na, Daya Maŋgəlva Məzuɓappak waprikgin aka dələv pakə.

Kədawgeslne'əŋ sən Asiri ɓa

²⁴ Sən aski Daya Maŋgəlva Məzuɓappak anah na: Ɗiy naw məs dəssoŋ a Siyon, kədawgeslne'eŋ sən Asiri ɓa, tay əvəruk də tandaŋ, tay əslan zleŋge nan akok va net mə Eziptiɗ lahəŋka.

²⁵ Vi abe aŋ siɗikke na, gagay naw wagrakə, ədagədəv naw wakkpaŋ əzeti.

²⁶ Ndəni Daya Məzuɓappak aslan azlawar nan vi karga Asiri, va aɗɗa aket mə Madiyanɗe aka milɓe na Oreb; waslan zleŋge nan aka pehe va aɗɗa aka tive na Eziptə.

²⁷ Pay dəpaska, waprikgin zəga nawsla nan səka ki voko gəm zuk məs aklak suk a mawəloko, zuk aklak suk van wagəsl sən əkər noko.

Məzuzel tay əgap a Yerusalem

²⁸ Məzuzel agapək a Ayat, atoŋguk kəla Migron gəm aziyik zəgeɗ nan a Mikmas.

²⁹ Akkaɗaŋgək ki təki zlururu: ateheŋ a Geba. Rama akkersəməka. Gibeya na Sawlu anzanka.

³⁰ Ɗiy na Bat-Galim, məŋgəsl vaŋvəla. Asla zuko Laysa. Aw Anatot.

³¹ Madmena atərayka, ɗiy na Gebim tay əkayaŋ təki nawɗama.

³² Dəpaska'a məzuzel adawziw a Nob. Waslan van, van kətəmkətəmə vi karma mama azat waŋ na Siyon, mossorgo na Yerusalem.

³³ Daya, Maŋgəlva Məzuɓappak, yaŋ əmbroh gaslembeɗ va əhay na buna; wəleŋɗe məɓeyit apɗoŋgoŋko, en məɓeyit dayə, abzlaŋgək afuŋgu.

³⁴ Tay əɓzliw wəleŋɗe na muyã də zlimbe, liban tay əskot səba məs gbogboŋgo.