Ibriɗe 9 - Bible en Guidar

Əɗi ki Maŋgəlva aka dəlvafuŋ gəm a disiŋ

¹ Wənmiyna an daabəŋ tay də wən məɗiyən aka əɗi ki Maŋgəlva gəm gəla na Maŋgəlva aka dəlvafuŋgu.

² Vi mənsləni gizlirke na gabaga gədəven sula. An daabəŋ məyani na təki salala, addəvən na, təki tay nawɗi lalamɗe gəm tabəl dit memtekeɗ mipsin Maŋgəlva akani.

³ Dəɓɓa məzlzlara masula'əni, gizlirke məs adawyaŋ na təki an salala dədayi,

⁴ də zəga nawzla tursan na meleŋge gəm akoti na wənmiyna məkkəɗ sən meleŋge. Addəv akoti vani, hinziw na meleŋge tay adak də manhu addəvən, gəm zleŋge məndəfən na Aron, gəm kalaɓɗe sula də wənmiyna aketi.

⁵ Aka akoti vani, kerubaɗe dədarbanən gagdak na Maŋgəlva ateŋginik persleket aka man məs adaksu'oŋ mbel adak vi kavvuyon mambray net ɗiyi. Ya wəray tay nawpel akan kakaŋ taka taka ɓa.

⁶ Adan zəga pak azaɓək gərak vaska, məsdəlveŋge tahəŋ wətoŋgoŋ addəv gizlirke an daabəŋ pay pakə, vi kaɗɗa wəza neti.

⁷ Ya gədəvən mətawan masula'ən na, abbər daya net məsdəlveŋge kaka' dədawtoŋ adak təl taka kaka' ama wəzva. Tay ətoŋ dit mbel kepsin Maŋgəlva vi ki zək nani gəm vi mambray məs ɗiy adaɗɗaŋ məza də wəŋgla net ɓa.

⁸ Vaski Zeŋgile Salala adarban səm na tive nadda a təki salala an dəday dəɓəl əkol ɓa hã kakaŋka adan gizlirke na gabaga an daabəŋ tay tagayəŋ ɓa.

⁹ As zəga dədarba vi pay an kakaŋki, tay əŋgla ənah na: Əvəla gəm əzaɓ-Maŋgəlva məɗɗet aɓapən na əzaɓan makra ɗəf məzəkkam dəsangən təstəs ɓa.

¹⁰ Aziweŋgik aka wən na zəga nawzəma də zəga na əsa gəm əɗɗa ubburɗe temtemi, es əsərək net ɗiyi dəzəmən təki hã gap aza pay na wənmiyna meleketeni.

¹¹ Ya Kristu adeke, ndəni daya net məsdəlveŋge na moggon temtem dədazzani. Atoŋguk addəv gizlirke metiŋgin gəm an gərrak nalma də Maŋgəlva məs wəza na va ɗəfi ɓa, va ənəh na, məs səka dəlvəŋki ɓa,

¹² məza də mbel net porsokɗe mãy net kirit wasliɗ ɓa, ya də mbəl na ki zən tusso atoŋ təl taka addəv gəla na matuya viyit ɗiy pakə, arəh səm əkõh an faɗə.

¹³ Vi an mbel net porsokɗe gəm net medgeɗgeɗe mãy an moŋglo na bəlata məzlan məndolun aket ɗiy məs mambrayɗe akkpaŋget salala gəm abburti,

¹⁴ an vaski na mbel na Kristu dədawtəraŋ wəray day pakə. Də Əmpəs nassa hã faɗi apsən zeŋgilen sən Maŋgəlva va zəga mamayã məza heslepe azan ɓa nawzaɓ-Maŋgəlva abbur əɗɗum na makram səzet wəzeɗe mimtit vi məgəɗ səngən wəza sən Maŋgəlva madarani.

¹⁵ Sən aski asan metive na wənmiyna meleketeni, amtə na vi kawmet ɗiy səka mambray net aɗɗaŋ addəv wənmiyna məzvani, en məyeti, ərahaŋ iynama nawzəmgəla an faɗə.

¹⁶ Vi a təki əmanma ɗəf asani, aslək əsənən na ɗəf an dəman man van amtəka.

¹⁷ Əmanma adawsan də ətər wəray na, an ɗəf van amtəki; ya tay də ətər wəray an ɗəf dəman man van tay madaran ɓa.

¹⁸ Vaski wənmiyna an məzvan zək nan məziwgini məza əksu' mbel ɓa ɓa.

¹⁹ Səza Moyis aŋɗan an məziwgin sit ɗiy pak va aza mahenziŋ, ndən mbel net kirit wasliɗe mãy net porsokɗe gəmə, siske agim iŋkile, deɓekeɗ pepreŋɗe na time gəm isop aksu' aka ɗerewel zək nani gəm aket ɗiy pak,

²⁰ amna: Eŋ mbel na wənmiyna məs Maŋgəlva aɗi sukum wən nanəŋ.

²¹ Siske aksu' mbel sən gizlirke na gabaga gəm sit zəgeɗ naɗɗa wəza nawɗi ki Maŋgəlva.

²² Ya də mbeli adabburun zəga pak va aza mahenziŋ, məza əksu' mbel ɓa na əvvuy mambray tay ɓa.

Əzaɓ-Maŋgəlva na Kristu adayək kiyit en meɓɓəti ( 9:23—10:39 )

²³ Ya an zeŋgile zəga an dəsan a disiŋ abburuk dit matuyaɗe asna aslək an dəsan gesiŋ zək nan a disiŋ dəsangən mubburun də əzaɓ-Maŋgəlva an dəsan na sləma dayə.

²⁴ Vi Kristu dətoŋ addəv gəla matuya məs məɗɗan də vet ɗiy məs dəsan zeŋgile zəga an gesiŋ ɓa. Ya a disiŋ zək nan atoŋguk, karban zən aba Maŋgəlva kakaŋ vimə.

²⁵ Dətoŋ vi kapsən ki zən təl ɓayɓay va daya net məsdəlveŋge adawtoŋ aza əzva pak addəv gəla matuya dit mbel məza nanəŋ ɓaŋ ɓa.

²⁶ Vasna, kəta wazəmsãhã təl ɓaɓayə təŋ səza ətəŋ na dəlva. Vi təl taka kaka' arbə də əkgrak na paya vi kavvuyon mambray də əzaɓ-Maŋgəlva məs adə də zək nani.

²⁷ Va məɗiyən sit ɗiy pak namta təl taka səɓɓan na ətawwən aketi,

²⁸ vaski yi'e Kristu apsən ki zən təl taka vi kaskoɓ mambray net ɗiy diyɗa, ya warban zən masula'ən, vi wən na mambrayi əmpa ɓa, vi kawkõhgit ɗiy məzuganəni yi.