Ibriɗe 8 - Bible en Guidar

Əday na Kristu tay əki əhhaɗa ( 8:1—9:22 ) Yesu yi Daya net məsdəlveŋge namə

¹ Aŋki ki wən na əpel nam pakə: Mənam tat də zev Daya net məsdəlveŋge vanəs gesiŋ məs dəsan aka va dəzəŋ na mazaŋga na məlĩ Maŋgəlva a disiŋ,

² ka daya na wəza naddəv gəla na Maŋgəlva gəm naddəv gizlirke an gesiŋ məs Maŋgəlva aziwgin ndən sən kiyən məza ɗəf titir ɓa.

³ Daya net məsdəlveŋge pak məɗiyən napsən əvəla gəm əzaɓ-Maŋgəlva yi; vasna wəray nan wasan nawrəh zəga naɗɗa əvəla.

⁴ Va Kristu tay aka dələv na, kəta asan na məsdələv dayday ɓa, vi gəla wəza van ɗiy məzəɗɗaŋ əvəl va aza mahenziŋ aŋgəl agəmnənka;

⁵ Ya əɗi ki Maŋgəlva adawɗiyaŋ na tay va foto, va zeŋgile zəga aza zəga an na disiŋ. Va əpel an Moyis arah səma Maŋgəlva narka gizlirke, aɓsən na: Awla, kəɗɗagən təɗe' va an mərban suk aka mossorgo metiŋ.

⁶ Ya kakaŋ na, wəza an dəday pelepele məpsən Yesu, vi metive na wənmiyna an moggon day yi, məs dəziw aka iyna ma an moggon dayi.

⁷ Vi va wənmiyna an maddaabəŋ van tay də heslepe ɓa na, kəta wəray naddəɗan də masula'ən asan na ɓa.

⁸ Vi əhãy adawhẽyẽti amna: Awle, Daya amna, pay tay əzzani, məs nədaynan wənmiyna meleketen dit ɗiy na Israyel gəm dit ɗiy na Yuda.

⁹ Asan na va wənmiyna məs niynə dit efiŋgiɗit pay məs nərma vet nawgilgit səka dələv na Eziptə ɓa. Vi ndəɗaŋ sən kiyit van dəziweŋ addəv wənmiyna naw ɓa, vini naw tam nəppeti Daya anahə.

¹⁰ Daya amna: Aŋki wənmiyna məs nədayna dit ɗiy na Israyel dərɓeget əvoŋɗeski, Daya anahə wanəpsit mahenziŋɗe nawa, a makreti gəm aka maɗɗulet nədawverti, wanəsaw Maŋgəlva neti, net wassoŋ ɗiy nawa.

¹¹ Dəf tay səmmbet nayagan sən ɗəf naka dələv nani awaniɓa məlmən dawnah sən na: asən Daya ɓa. Vi ndəɗaŋ pak wasənwəni, təŋ səka muzliya hã gap aza ɗəf metiŋgin na walaŋti.

¹² Vi wanəwəl sãhã aket viyit heslepeɗe neti nəɗɗumet na mambrayɗe net ɗah əmpa ɓa.

¹³ Adan Maŋgəlva apel aka wənmiyna meleketeni, akkpaŋganək an daabəŋ ka məzvani. Ya an dəkkpaŋ məzvani gəm dədawgala go'oy aza əhhiya.