Ibriɗe 7 - Bible en Guidar

Melkisedek, məlĩ məsdəlvi yi

¹ Melkisedek vani məlĩ na Salemi, məsdələv na Maŋgəlva Məsəɗəɗi. Ambatək ələm sən Abraham aka Abraham van adawmilyen səma wəgay məs aska wəlet məlyeŋge, yaŋ aɗɗa sən əzaɓa,

² Səni Abraham apsən makəlaw na zəga məs arah pakə. Dabəŋ nani, iya nan man aka wənah na «məlĩ na təstəsə», gəm əmpa na məlĩ na Salem, va wənah na, məlĩ na zazaya.

³ Ɗəf dəsən afən ɓa, man ɓa, mazlalwãn ɓa, pay muwan ɓa, pay amtə ɓa. Agilik va Wət Maŋgəlva, wasan məsdələv na Maŋgəlva hã faɗə.

⁴ Mula gagdak na ɗəfəs məs dəhəm Abraham apsən makəlaw zəga na sləma na ərəh nan səma wəgaya.

⁵ Ya net kirtin Levi məs dəssoŋ məsdəlveŋge, mahenziŋ apsitik tive dəgəməngən makəlaw na zəga səvet ɗiyi, va wənəh na səvet milmiŋgiɗti, də assoŋ zev Abraham zlaŋgə.

⁶ Melkisedek nan zev Levi ɓa, ya atafək makəlaw zəga səva Abraham, aɗɗa əzaɓ aka ɗəf an dərah iynama.

⁷ Əŋzla ma tay ɓa, daya dəɗɗa əzaɓ aka sawã.

⁸ Aŋ na məzutafaŋ makəlaw na zəga ɗiy məs namtaŋgə, ya aŋkəŋ na ɗəf məs məsənən na madarani iyi.

⁹ Va wənah na: Adan Abraham apsən makəlaw zəga nani, Levi məzutaf makəlaw zəga pak apsənək dəka an na Abraham vanəska.

¹⁰ Vi Levi tay addəv afən səkay aka Abraham aləm də Melkisedek vani.

¹¹ An wəza net məsdəlveŋge kirtin Levi təstəsi vi asan gabba mahenziŋ məpsit ɗiy na, wəray mi əmpa nawɗi məsdələv maɓɓan məs dəgil va Melkisedek məza əwelin səddəv zev Aron ɓa di?

¹² Vi an wəza na məsdələv addəɗka sessel waddəɗan mahenziŋɗe.

¹³ Ya ɗəf an məs ɗerewel adawpel akanəŋ na, səddəv mahəlfa məs məɗiyə ɗah ɗəf nan aka wəza na matuya ɓa yi.

¹⁴ Vi məsənni lewlew na, Daya nam səddəv mahəlfa na Yuda muwani, mahəlfa məs zəga tay Moyis apel akan dəwəl sən wən net məsdəlveŋge ɓa.

Məsdələv maɓɓan va Melkisedek

¹⁵ Aŋki dədarban wənəŋ appaka ta' əmpa: an məsdələv maɓɓan dəde van agilik va Melkisedek,

¹⁶ dətoŋ addəv wəza na məsdələv də tive na mahenziŋ na walaŋgit ɗiy ɓa; yaŋ atoŋ də gagdak na zeŋgile məs agrak na ɓa.

¹⁷ Vi məpeli akan na: Məsdələv kənan hã faɗ va Melkisedek.

¹⁸ Mahenziŋ an lahəŋka, məzgani vi əddak nani gəm ətərwəray nan ɓa.

¹⁹ Vi tay an mahenziŋ aknahan ɓa, ya an məs mədawga day adeke, məs mədawzar aza Maŋgəlva ndəndəni.

²⁰ An dəday kiyən pak na, əsway na Maŋgəlva tay akani, məsdəlveŋge en meɓɓet na məɗiyit məza də əsway ɓa yi.

²¹ Ya Maŋgəlva aɗiyək Yesu aka wəza na məsdələv nan də əswaya, yaŋ amna: Daya aswayka, akkpaŋgan na əɗɗum nan ɓa. Məsdələv naw kənan hã faɗə.

²² Vaski Yesu aziwgin səm wənmiyna moggon day ki an lahəŋka.

²³ Zəga an duɗakan əmap na: ɗiy diyɗa dəssoŋ məsdəlveŋge vi əmta dədawtekit dasso faɗ aka wəza na məsdəlva.

²⁴ Ya Yesu, nan tay madaran hã faɗə, wəza na məsdələv nan agrak na ɓa.

²⁵ Vi vaski waɓap əkõhgit ɗiy məs dəzaraŋ dəndən aza Maŋgəlva ha faɗə, adan madarani hã faɗə nakkam ammbeti.

²⁶ Zev Daya net məsdəlveŋge aski dəslə səmə; salala, məza heslepe ɓa, məza haramba ɓa, awɗakək dit məs mambrayɗe, məslani a disiŋ ki disiŋ.

²⁷ Nan tay də wəray va net deyeɗe net məsdəlveŋge meɓɓet nawzaɓ-Maŋgəlva pay pak ammbet mambrayɗe nan tagay asna ammban net ɗiy pak ɓa. Təl taka aɗɗa as ka faɗə də əpsən ki zəni.

²⁸ Vi mahenziŋ aɗiyit ɗiy də əddak net dəssoŋgən deyeɗe məsdəlveŋge. Ya əpel na əsway na Maŋgəlva məs dəde dərɓaga mahenziŋ, aɗiyək Wətəni dəsangən məsdələv an gərrak hã faɗə.