Ibriɗe 6 - Bible en Guidar

¹ Vas kan na, məppan səm əyak an kiyən kiyən aka wən na Kristu, mətoŋ səm aza əyak net ɗiy gugriɗe, məza əmnda aka əyak an dətəŋ gabban ɓa, va: əɗi marava aket wəzeɗe mbəreyti, ətaf Maŋgəlva,

² əyak aket baptemɗe, wəɗi va ɗəf aka ɗəfa, wəsilye net ɗiy mimtiti gəm ətawwən an faɗə.

³ Aski an mədaɗɗa an Maŋgəlva aŋgerke.

⁴ Vi tuwahĩ azet ɗiy dərahaŋ ɗah əkeɗeɗe'e, dənanən əvəl na disiŋ gəm dərahaŋ Zeŋgile Salala,

⁵ dənanən əpel nenek na Maŋgəlva gəm gbogboŋ na dələv an dədazzani,

⁶ də as pak yaŋ azbəraŋgə, wasan sit tuwãh ka namsakaŋ əɗi marava. Vi ndəɗaŋ sən kiyit tay əmsak əkkpa'ən Wətən Maŋgəlva aka məzliwrihe, əkkpaŋganən zəga ɗar ama heret ɗiyi.

⁷ An dələv tay əba iŋkile na buna, tay əgilgit zəgeɗ na ma bardaw nawtər wəray sit ɗiy məzənsenini, ndən ərəh hara əzaɓ nan səza Maŋgəlva.

⁸ Ya an tay əgilgit gedirgeɗ dit tiŋtifɗe, kawlani va zəga ɓa, wali ərəh mefɗeke ɓa, əgrak nan əzlani.

⁹ Ya nokum na bayneŋgiɗu na makrawa, məsənək gesiŋ də mədawpel vas pak na, aka tive moggon kənanaŋgə, an nawkõhõ.

¹⁰ Maŋgəlva mbərayni ɓa, azgət na ki wəza nokum ɓa gəm əŋgla məs kərbanən aka iya nan kəbbahaŋ sit ɗiy salala lahəŋka hã gap kakaŋkəŋka.

¹¹ Məŋgəl kan na naway di pak sə walaŋkum dəsok zən əmbat abe abe addəv an adawga hã aza əgraka,

¹² məza zukum baybay ɓa, məgəm tilit ɗiy en dərahən an Maŋgəlva aynan man sit sən ətafa gəm sən əsok ziti.

Iynama na Maŋgəlva addəɗ na ɓa

¹³ Pay Maŋgəlva aynan man sən Abraham, adan ɗəf an metiŋgin day tay nasway də iya nan ɓa, aswayək də zək nan tusso.

¹⁴ Amna: Gegesiŋ əzaɓ nədawzoɓoko gəm əwok nədawoko.

¹⁵ Adan Abraham aɓəsa, iynama nak akkpaŋsənək gesiŋ.

¹⁶ Ɗiy tay əswayaŋ də mədaykiti, vi kawziwgin əŋzlama pak na ndəɗaŋ əkkpaŋ aza əswaya.

¹⁷ Maŋgəlva aŋgələk ərban gegesiŋ na iynama nan məs awpəl sit məzəmaŋgəla, ndəni atoŋgən əswaya.

¹⁸ Zəgeɗ tahəŋ sula məza awpəlaŋ ɓa, ndəɗaŋgə iynama gəm əswaya, Maŋgəlva awəna wən dənɗaŋ ɓa, tay əsɓamən diyɗa mənam məs məppan zəga pak vi karma əga an məs anah napsəmə.

¹⁹ Tay azam va təbəz gagdak nawziwgin zeŋgilem gədəŋgədəŋ va nawziwgin bəlay məzutoŋ balsən məzlzlara duɗakan gədəv gəla metiŋ gəla na Maŋgəlva na disiŋ,

²⁰ a təki Yesu atoŋ viyəm daabəŋ kiymə, akkpaŋ daya net məsdəlveŋge hã faɗ va Melkisedek.