Ibriɗe 4 - Bible en Guidar

¹ Adan aynan səmək man mətoŋgən addəv əffet nani, məzi səm zəm kana, vi ɗəf təttaka səmmbokum adawbew dawtoŋ ɓa.

² Vi nam pak məprəmək alabara nenek va neti. Aprəmənka, ya dətər sit wəray ɓa, vi dərmanən wən nan də wətaf ɓa.

³ Mənam məs mətafə, mənam tat ətoŋ addəv əffet na Maŋgəlva, va anah na: Va nəsway addəv ədagədəv na: Sessel atoŋgoŋ na addəv əffet naw ɓa, dəka Maŋgəlva agrakək wəza nan far səza azəməɗ dəlvafuŋ.

⁴ Vi apelik aka pay naffet a təki maɓɓan na: «Aka uvoŋ mabuhuloni Maŋgəlva affet səza wəza nan pakə.»

⁵ Gəm əmpa addəv ɗereweləŋ na: Sessel atoŋgoŋ na addəv əffet naw ɓa.

⁶ Vas kan na, adan tay ziw ɓəlɓəl ɗiy meɓɓet dətoŋgoŋgən adaka, ɗiy en dəprəmən Alabara Nenek daabəŋ dətoŋgoŋ addəvən ɓa vi dətafaŋ ɓa.

⁷ Ndəni kan Maŋgəlva aɗi pay maɓɓani, ndəni adawyaŋ na (dəpaŋka). Apelik wən nan dərɓaga wəzva diyɗa, də ma Davit dawnəh na: Dəpaŋ an kəprəmənək wəlani, kədaɓɓəlanən mokrokum ɓa.

⁸ Va Yosuwa atoŋgitik ɗiy vet addəv əffet van kəta na, Maŋgəlva apel na wən na pay maɓɓan dərɓaga as əmpa ɓa.

⁹ Vas kan na pay naffet məstaka va pay mabuhulon tay zaɓɓa viyit ɗiy na Maŋgəlva.

¹⁰ Vi ɗəf dətoŋ addəv əffet nani, wafet səza wəza nan va Maŋgəlva affet səza wəza nani.

¹¹ Məgəmsəm zəm kan ətoŋ addəv əffet vanəs kana, vi ɗəf adazbər sən zev əggbak mas ɓa.

¹² Wəpel na Maŋgəlva madarani, tay əɗɗa wəza, man hoɓhoɓ dayki masalam məs man sula pakə. Tay ətoŋ hã a walaŋ megenege gəm əmpəs na ɗəfa, a walaŋ mesleŋsleŋ də ofunufunu na ɗəfa. Va wənah na Zeŋgille də Əmpəsa. Tay əpəkat an makra ɗəf adaɗɗa gəm an adaɗɗumo.

¹³ Zəga tay dəɗam ara Maŋgəlva ɓa. Zəga pak appakayi ama harani. Səni mənam pak mədaŋɗan an məgəɗə.

Wəza na məsdələv na Kristu adayək ki na daya net məsdəlveŋge ( 4:14—7:28 ) Yesu daya net məsdəlveŋge metiŋgini

¹⁴ Adan mənam tat də daya net məsdəlveŋge metiŋgini, ana Yesu Wətən Maŋgəlva məs dəgap a təki nassa na Maŋgəlva, mərmasəm ətaf mədawpel wən nanəŋ ɓəlɓələ.

¹⁵ Daya net məsdəlveŋge nam waɓap ulasahã akam addəv əddak namə, vi nak pak mərakani va nam addəv zəga pakə, ya nan dəgəɗ mambray ɓa.

¹⁶ Mədder səm kan kiyəm foŋgo aza mazaŋga na mbəlembəle vi mərahgən ulasahã gəm mbəlembəle, mərahgən əbbah də pay an aŋgələ.