Ibriɗe 3 - Bible en Guidar

Daya na Kristu adayək ki an na Moyis gəm ki na Yosuwa ( 3:1—4:13 ) Yesu adayək ki Moyis də gagdaka

¹ Milmiŋgiɗwa, mənokum ɗiy salala, məs də haran net addəv iya dəde sə disiŋ, məɗɗumon wən na Yesu məs Maŋgəlva aslən dəsangən daya net məsdəlveŋge məs mətafə.

² Vi tay əɗɗa zəga təstəsə aza Maŋgəlva, muwelni vi wəzaŋka, va Moyis asan təstəs aka wəza eŋgil ana Maŋgəlva da pakə.

³ Mərkə gəla adayək ki gəla də gagdaka. Vaski yi'e Yesu adayək ki Moyis də gagdaka.

⁴ Gəla pak ɗəf dədawziwgəni, ya Maŋgəlva yi dədawziwgən zəga pakə.

⁵ Moyis təstəsi addəv gəla na Maŋgəlva pakə. Gawla na Maŋgəlva yi, apelik wən net zəgeɗ məs Maŋgəlva adarbet addəv pay məs dədazani.

⁶ Ya Kristu na Wətən Maŋgəlva yi aka gəla nani, mənamtə gəla nan vani, an mənam tat əsok zəm də gegesiŋ gəm məppan ərma ənnek na əga nam ɓa.

Maŋgəlva tay əpsit əffet sit en məzəprəmən mani

⁷ Əmpəs Salala amna: An kəprəmənək wəla Maŋgəlva dəpaŋka,

⁸ kədaɓɓəlanən mokrokum va aka pay nawɓoŋ aka pay nawsla agəɗ a kapta-muyã ɓa.

⁹ A təki efiŋgiɗkum arakawəni, də əsla an nazawa, awleninik wəzeɗe naw

¹⁰ gap əzva kaklaw poɗo. Ndəni kan gədəvu adə aketi, yaŋ nənah na: Tahəŋ wəzlaɓaŋ də wəɗum neti, dəsənən tive naw ɓa.

¹¹ Va nəsway addəv ədagədəv nawa: Sessel atoŋgoŋ na addəv əffet naw ɓa.

¹² Milmiŋgiɗwa məzi zukum, vi ɗəf təttaka səmbokum adawsan də makran mbərayən məza də wətaf ɓa ɓa, kapan Maŋgəlva madaran ɓa.

¹³ Pay pak məsəɓ sən zukum va adawɓap ənahaŋ na pay dəpaŋka. Vi makra ɗəf səmbokum adaɓɓəl sən ərah na mambray ɓa.

¹⁴ Vi mənam pak məkkpaŋgək ɗiy na Kristu, an mərmak wən nan də makram taka məppan ɓa va mərma wən nan aka wətəŋ nani.

¹⁵ Ya tay mənahən na: An kəprəmənək wəlan dəpaŋka, kəɓɓəlanən mokrokum va aka pay nawɓoŋ ɓa.

¹⁶ Vi mədəŋgaŋ dəprəməni gəm dəsilginin əɓoŋ di? Ya namna en məs Moyis agilgit sə Eziptə pakəŋ ɓa sa?

¹⁷ Aket mãy gədəv Maŋgəlva adə gap əzva kaklaw poɗo di? Namna aket məs dəɗɗaŋ mambraya, məs dəzbəraŋ a kapta-muyã dəmtaŋ ɓa sa?

¹⁸ Ya sit mədəŋga asway sit na atoŋgoŋ na addəv əffet nan ɓa, an sit ɗiy en dəɓoŋgoŋ naki ɓa di?

¹⁹ Mulaka dəɓap ətoŋgoŋ a təki naffet nak ɓa, vi dətafaŋ ɓa.