Ibriɗe 13 - Bible en Guidar

Əŋgla na Maŋgəlva ( 13:1-19 ) Mbarmbar ɗəf adanneken zə Maŋgəlva di

¹ Əŋgla na məlma dəsan a walaŋkum.

² Kədazgətaŋ də wətaf melekeɗ anokumda ɓa. Mbəlembəle ndəni ɗiy meɓɓet atefin maslayɗe anet da, məza əsənən aket ɓa.

³ Məɗɗum aket ɗiy na fərsəna, va a fərsəna kənanaŋ dənɗaŋ. Məɗɗum aket ɗiy adawzəmgitin sahã, adan nokum van mənokum tat də zukum.

⁴ Məɗi ki əɗigəla pakgukum, əkuh a gizbe adawsan ɓa, vi məɗɗaŋ ɗarɗar gəm məkuhwaŋ a gizbe, Maŋgəlva watawwən aketi.

⁵ Əŋgla net deleɗ adawgəm maɗɗulokum addəv ədaw nokum ɓa, mənnek də an navokum, vi Daya zək nan amna: Awwo, nəppok na ɓa, nəzgok na ɓa!

⁶ Waməɓap ənah də gegesiŋ kan na: Daya iyi məzəbbah suwa, tay məs nədawgeslne' sən ɓa. Mi ɗəf adawgəɗ su di?

⁷ Məɗɗumon wən net ɗiy gugriɗ nokum məs dərban sukumən əpel na Maŋgəlva. Məɗɗumon va ənziya net agrakə, məzban ətaf neti.

⁸ Yesu Kristu məstakayi na ɗəfɗaŋga dəpaŋka gəm hã faɗə.

⁹ Kədappanən zukum əza sit əyakɗe temtem net ɗiy-ɗar ɓa. Moggoni mbəlembəle na Maŋgəlva dəzɓangən makramə məza mahenziŋ net ɗiy aka wən na zəga nawzəm ɓa. Dətər sit wəray sit məs dəzbanən ɓa.

¹⁰ Mənam tat də matuya məs məsdəlveŋge məɗɗaŋ wəza addəv gizlirke nalma də Maŋgəlva tahəŋ də tive nawzəm an dəsan adak ɓa.

¹¹ Vi gəɓa zit zəgeɗ memeyẽɗ məs daya net məsdəlveŋge adawka mbel net addəv gəla na Maŋgəlva vi navvuy mambrayəŋka, tay əzlenin a ma poho na dibirgidiki.

¹² Vi vaski Yesu amtək a ma poho na walaŋgəla, vi kaskoɓ mambray net ɗiy də mbel nani.

¹³ Məgilsəm əlma dəndən a ma poho na dibirgidiki, də wəslet wil nani.

¹⁴ Vi mənam tat də walaŋgəla-metiŋ afuŋ aŋ nassan faɗ ɓa, mənam tat əkayan walaŋgəla-metiŋ an nazzani.

¹⁵ Də iya na Yesu, məpsən səm əvəl nawɗi kiya sən Maŋgəlva məza əppan gabban ɓa, va ənəh na əpel na mam məzuya iya nani.

¹⁶ Kədazgətaŋ ki əɗɗa moggon gəm əbbah sən zukum addəv əsap nokum ɓa, vi əzaɓ-Maŋgəlva zev aski dədannek zə Maŋgəlva.

¹⁷ Məprəm met ɗiy gugriɗ nokum də əzban an adarban sukuməni. Vi Tahəŋ wəga zeŋgilokum məza wəfet ɓa, adan waŋɗanən wəza net aba Maŋgəlva. Vasna waɓap əɗɗanən wəza van də zit neki məza də wərwər ɓa vi asan na ka nawtər sukum ɓa.

¹⁸ Məkkaman Maŋgəlva viyəm pay pakə. Vi məsənka makram bari də əɗɗum nawdaw də tiven addəv zəga pakə.

¹⁹ Məɗɗa vaska, in tat ənah sukum zu soksoku, vi nəmil go' a walaŋkum.

Əgrak əkkama ( 13:20-21 ) Əkkama

²⁰ Kəta Maŋgəlva afən zazaya məs dəsilgin Yesu Kristu, məzutaɗa net timiŋgiɗ metiŋgin sə walaŋgit ɗiy mimtit də mbel na wənmiyna an faɗə,

²¹ dəkkpaŋgokum nawɓap əɗɗa an moggon pak naɗɗa əŋgla nani; dəɗɗa an nannek zən gesiŋ addəvəm də Yesu Kristu, məs gagdak asan ka nan na sete hã faɗə. Amin!

Əgrak əpele ( 13:22-25 ) Əgrak əpele gəm əsɗa

²² Milmiŋgiɗwa, in tat əkkamokum kəɓəsnəngən wən nawəŋka! Əpel siɗikke yi nəslən sukum lahə.

²³ Nəŋgəl kəsənəngən na, məppani məlməm Timote sə fərsəna. An adek go' na, aməmbat ulukum matakə.

²⁴ Məsɗet ɗiy gugriɗ nokum gəm ɗiy salala baymeti. En na Italiya tay əsɗokuməni.

²⁵ Mbəlembəle na Maŋgəlva dəsan də munokum pakə.