Ibriɗe 12 - Bible en Guidar

Maŋgəlva Afəmə

¹ Vas kan na, nam pak miziweɗe tahəŋ kiyəm tərwəsl va ernene, məzgan səm zəga nawsla gagdaka gəm mambray pak məs dəsərək əsulək kiymə, məɓəssəm tatwãh məs adaɗɗaŋ səmən də əsok zəmə,

² haram sekke aka məs dətəŋ gabba ətafa gəm dədaknahani, ana Yesu, ndən məs dəppan ənnek nani, dəɓəs məzliwrihe, əzele, wili, məs dəsan aka dəzəŋ na mazaŋga na Maŋgəlva.

³ Vasna, məɗɗumon ɗəf dəɓəs zev əzəmsãhã vas səvet məs mambrayɗe, ka kədappanən zukum əddak ɓa.

⁴ Vi addəv əgay nokum də mambraya, kəɓəl əlpaŋ hã gap aza əmta tagay ɓa.

⁵ Yaŋ kəzgətaŋ ki əsəɓ məs Maŋgəlva apel sukum va sit kirtin na: Wətuwa, kədawzelen əzga na Daya ɓa, kədaddakan zuk an ahãyokuk ɓa,

⁶ Vi Daya tay əzga' sən sə ɗəf məs aŋgələ, wapək ɗəf an aŋgəl pak va wətəni.

⁷ Vi kawrəh neneki kədawzəmaŋ sãhã. Va kirtini Maŋgəlva adawgəɗ sukum. Wəyin məwani məs afən azga' sən ɓa di?

⁸ An məzga' sukum va adazga' sitin ɗiy pak ɓa, asna sulomɗe kənanəni, kirtin kənanən ɓa.

⁹ Mənam tat dit efiŋgim naka dəlvəŋ ka məzəzga'səməni, mənam tat əttəman neki; dədah məɓe'səngən Afəm naddəv əmpəs dərəŋ mərahgən zeŋgile səzan ɓa sa?

¹⁰ Neti, azga'səmənək va aza əɗɗum net ammba pay siɗikke; ya nani vi ərəh nam adazga'səmə məsamgən salala va ndəni.

¹¹ Pay adazgasəməni, zəm awsan nek ɓa, gədəvəm mədan adawsani. Ya dərɓaga asna, ndən əki zazaya gəm əssa təstəs sit en dərahaŋ əzga vani.

Əhãya gəm əzga'a

¹² Məsɓan vokum ləɓayləɓayəŋka, də takprakum maŋgalɓayaŋka.

¹³ Məzban tive an moggoni, məs sarara, vi təl vədal adamsak əɗɗa ɓa, dəmbəlgəni.

¹⁴ Məkayan əssa zay dit ɗiy pakə gəm əssa salala, vas ɓa na, ɗəf tay nawla Daya ɓa.

¹⁵ Məzi zukum ɗəf səmmbokum adawmilyen dərɓe kappan mbəlembəle na Maŋgəlva ɓa; ɗəf səmmbokum adawsan va gaslamba tatrah məzugilyeni, kattepet ɗiyi, kaslsləret diyɗa ɓa.

¹⁶ Məzi zukum, ɗəf adawsan addəv əkuh a gizbe mãy əzelet zəgeɗ na matuya na Maŋgəlva ɓa, va Esaw məs dəvəl daya nan ammba zəga nawzəm kaka'əŋ ɓa.

¹⁷ Vi kəsənənka, sə dərɓagan na, aka aŋgəl dərahgən əzaɓ nawzəmgəla, məzgani, dəɓap əddəɗan əɗɗum na afən ɓa, də ahəm dit sin zlaŋgə.

¹⁸ Vi nokum kəddereŋ aza gesiŋ nawla də hara ɗəf va: offo məzuzla, təki tiŋgbizlim, guzliyo, barkataŋ,

¹⁹ ɓaɓəlma gozloro, wəla ɗəf ɓa; ɗiy məs dəprəmən aɓoŋguk daprəm əpel maɓɓani əmpa.

²⁰ Vi dəɓap əɗɗanən an aɗi sit naɗɗaŋ ɓa, an dərəŋgən mossorgo metiŋ dəsan zəga mamayã zleŋ, kaskani dit gərmeŋge hã zamə.

²¹ Zəga mərban van nawgeslne' səni diyɗa hã Moyis anah na: Geslne aduwəka in tat əkker səni.

²² Ya nokum kəddereŋgik aza mossorgo metiŋ na Siyon gəm aza walaŋgəla na Maŋgəlva madarani, va wənah na, Yerusalem na disiŋ, dit maslayɗe nan məza aŋɗaŋ ɓa addəv əzləra.

²³ Kəzzoŋguk addəv əkkal net kirtin Maŋgəlva en daabəŋ, en məver iya net a disiŋ gəm aza Maŋgəlva mətawwən aket ɗiy pakə gəm aza əmpəs net ɗiy en təstəs dəgapaŋ aza əkõho,

²⁴ gəm aza Yesu metive na wənmiyna meleketeni, gəm azet mbel naksu' dədawpeleŋ daykiyit en na Abel əmpa.

²⁵ Məzi zukum kədawɓoŋgoŋ aka məzupel sukuməŋ ɓa! Adan məs dəɓoŋgoŋ aka məzupel sit aka dələv dəkõhoŋ səma wəzga' ɓa na, mənamtə dərəŋ məkõh kan, an məktuhuk dəɓam sən məzupel səm hã sə disiŋ.

²⁶ Ndən kan məs wəlaŋ akkergən dəlvafuŋ, apelik əpeləŋ na: Dərɓedərɓe faɗ na, dəlvafuŋ nədakkergik kaka ɓa, sap də disiŋgi yi'e.

²⁷ Əpel an məpelin na, dərɓedərɓeŋka tay ərban na zəgeɗ məzimiɗit naka dələv pak waɓzlaŋgə wazaŋgə, vi məs nawsan faɗ dəsangəni.

²⁸ Adan məlĩ məs aɓəl na ɓa mərahə, mərma səm mbəlembəle van lewlewi. Məgəɗ səm wəza nannek zən Maŋgəlva də mbəlembəle vani, də əɓe'səni gəm də əgeslne' səni.

²⁹ Vi Maŋgəlva nam offo məhhət zəga yi.