Ibriɗe 11 - Bible en Guidar

Əday na ətafa ( 11:1—12:29 ) Ətafa

¹ Ətafa ndəni tive narban na is tat də zəga kədawga van avok səkayə. Tive nawsən gesiŋ net zəgeɗ məs hara ɗəf awlet ɓa yi.

² Ətaf vani dəɗɗa məpel aket ɗiy en lahəŋ moggoni.

³ Də ətafi məsən na, də əpel na Maŋgəlva yi zəga məzəməɗ pak asan də tiveni. Mərəhək na, an haram adawla pak dəde səza an məs haram awlan ɓa.

⁴ Də ətafi Abel azaɓ-Maŋgəlva na sləma dayki an na Kaynu sən Maŋgəlva. Vi wətaf nani Maŋgəlva anah na ɗəf təstəsi, ataf əvəl nani. Də ətafi, də amtə zlan na apel əmpa.

⁵ Maŋgəlva apeŋginik Enok a disiŋ məza ndən əmta ɓa, vi wətaf nani. Ɗəf tay dəmsak ərəh Enok əmpa ɓa, vi Maŋgəlva apeŋginike. Vi tak əpeŋ nan na, Əver anahək akan na: Wən nan lewi ara Maŋgəlva.

⁶ Məza ətaf ɓa na, ɗəf asan na lew ara Maŋgəlva ɓa. Vi ɗəf dədadder aza Maŋgəlva pak dəsən na Maŋgəlva tay, afaɗ sit ɗiy məzukayanəni.

⁷ Ammba ətafi, Maŋgəlva assak sən Nuwe aket zəgeɗ en naɗɗaŋ məza hara ɗəf dule tagay ɓa, yaŋ Nuwe agəm əpel na Maŋgəlva məza də əsmay ɓa, azaɓ bəlay vi kawkõhgən gəla nani. Də əɗɗa vaski atawwən aka dəlva, akkpaŋ məzəmgəla na təstəs nawrəh də ətafa.

⁸ Də ətafi Abraham azlan ama iya, aprəm ma Maŋgəlva, yaŋ ammbat aka dələv an adawrəh nawzəmgəla, ndən mbat məza də əsən na aŋga adaddan di ɓa.

⁹ Də ətafi ammbat əsan va malaka aka dələv miynan napsəni, asan addəv gizlirke də Isak gəm Yakob, dəssoŋ məzəmaŋgəla aza iynama vanəs sap ndəndəni.

¹⁰ Vi tay əga walaŋgəla-metiŋ məs məɗi gabban gboloŋgboloŋgu, məs Maŋgəlva sən kiyən avere, arka.

¹¹ Də ətafi, Sara tamə'e, də təgal diyɗa pak, təɓap ərah uwa, vi təziwik aka əpel na məs diynan mani.

¹² Vini yi'e, səza ɗəf təttaka məs dəsan va məmtəni, kirin diyɗa nawsla ki vet dit ngərzleɗ na disiŋ agilyoŋgu, aŋɗaŋ ɓa va hoyoŋko na məlpa.

¹³ Addəv ətaf amtaŋ baymeti məza ərəhnən gesiŋ na iynama van ɓa, sə dərɓaga awlanəni, asɗanən səka faraɗa, asənnən na molhoyeɗiŋ gəm melekeɗ aka dəlva.

¹⁴ Vi məpeleŋ vasna, tay ərbanən ta' na, tahəŋ addəv əkayanən dələv nawsan ka neti.

¹⁵ Ya va dələv məs agilyoŋ səddəvən tay aka maɗɗulet na kəta wakayaŋ tive namnda adaka.

¹⁶ Gesiŋ nan na, ammba dələv moggon day nassan ka net adawgayaŋgə, ammba dələv net na disiŋ. Ndəni kan wil awdanən Maŋgəlva an məyani na Maŋgəlva neti ɓa, vi azaɓ sitik walaŋgəla-metiŋ.

¹⁷ Də ətafi adan məsla naza Abraham, apsən Isak sən Maŋgəlva ka əzaɓ-Maŋgəlva. Wətən an karmalay apsən sən Maŋgəlva ka əzaɓ-Maŋgəlva, də arah iynama na Maŋgəlva zlaŋgə.

¹⁸ Sən aski mənah sən na: Də Isak kədawrəh kirin nawya kirtuko.

¹⁹ Abraham aɗɗumuk na, Maŋgəlva waɓap əsilgin ɗəf məmtən daydayə, addəv əɗɗum vaska amsak ərəh wətəni.

²⁰ Də ətafi yi'e Isak aɗɗa əzaɓ aka Yakob gəm aka Esaw sən an nabe.

²¹ Də ətafi, aka Yakob asan ama əmta, aɗɗa əzaɓ aket kirtin Yosef takataka, appu' sən Maŋgəlva səka ɓe'e aka zleŋge nani.

²² Də ətafi, aka Yosef asən na go'oy aza əmta, apel wən na əgilye net mə Israyelɗe sə Eziptə gəm aɗi sit wən aka wən net sleŋsleŋɗe nani.

²³ Də ətafi, migil Moyis aɗamanən zəga na təla hoku səza muwani, vi awlanənək lelew na wətiti, dəgeslne'eŋ sənən an məlĩ aɗi wən nan ɓa.

²⁴ Də ətafi, səza Moyis aɓayə, aɓoŋ dawyan na wətət wətən Farawən.

²⁵ Ɗəɗah sən wəzəmsahã dit ɗiy na Maŋgəlva ki wənan nek də mambray gap pay siɗikke.

²⁶ Aɗi ərba wil na Kristu azan va arya metiŋgin dayki arya na Eziptə, vi haran tay sekke aka zəga nawrəh na vani.

²⁷ Də ətafi azar sə Eziptə məza əgeslne sən ədagədəv na məlĩ ɓa, tay ziw ɓəlɓəl va ɗəf məzula məs hara ɗəf awlan ɓa.

²⁸ Də ətafi, aɗɗa əzləra na Pak gəm aksu' mbeli ka Maslay na əmta adawrəŋgit tiziɗe na Israyel ɓa.

²⁹ Də ətafi, akkaɗ ki pehe pepreŋge va kəɓəs na dələv məklakani, mə Eziptiɗ tamə əyagan na yaŋ məlpa asulupe.

³⁰ Də ətafi korguɗe naka Yeriko aɓəsl səza məsulək kiyən pay buhulu.

³¹ Də ətafi Rahap məkuh a gizbe, təzə dit ɗiy məɓoŋgit ɓa, vi tətefik məkkeseŋ mammba təki də zazaya.

³² Mi nawnah əmpa di? Pay agəssuwək nawpel taka taka aket mãy Gedeyon, Barak, Samsoŋ, Yefte, Davit, Samiyel gəm aket məskəleŋɗe.

³³ Də mbəlembəle na ətafi ndəɗaŋ vetis amõhnin dəlveŋge. Aɗɗanənək an təstəsə, arəhən an Maŋgəlva anah na wapsiti. Aynanənək met ɓooliɗi.

³⁴ Amtanənək offo gidigidi, akõhoŋguk səma masalam. Arəhaŋgək gbogboŋ sə dərɓaga əzga gbəgba'a, assoŋ guromɗe addəv əlpa, askanənək wəlet məzəlpaŋ net ɗiy-ɗarə.

³⁵ Gil atafənək Maŋgəlva, arihinik ɗiy net en dəmtaŋgə, vi ɗiy vet asilyoŋguk səka əmta. Zel meɓɓet addəv əzəmsãhã amtaŋ, dəŋgəmaŋ əman kiyit ɓa, vi dərəhaŋgən əsilye səka əmta an moggon day pakə.

³⁶ Ɗiy meɓɓet əmpa məmasi aketi, mərgeti, muɓrukti gəm məzgeti a fərsəna;

³⁷ məsketi dit gərmeŋge, mərsleti; amtaŋgək ama masalam; assoŋguk slorsloru, aguloŋguk lukut na gəba net timiŋgiɗi awaniɓa na deɓeke net gəlewi; məmohẽti, məsərni meti, məzəmgiti sãhã,

³⁸ ndəɗaŋ məs ənziya egge tay nek azet ɓa. Assoŋguk slorslor a kapta-muyã gəm aket mossorgoɗe, addivit bətəŋɗe gəm addivit vovɗe naka dəlvafuŋ.

³⁹ Ndəɗaŋ baymet pak, an arahaŋgək əpel moggon aket vi ətaf neti, dərəhən gesiŋ naddəv iynama van ɓa.

⁴⁰ Vi Maŋgəlva azaɓanək zəga moggon diyɗa vimə. Maŋgəlva dəŋgəl dəssoŋgən təstəs takirgit məza də mənam ɓa ɓa.