Ibriɗe 10 - Bible en Guidar

¹ Mahenziŋ na, ərəh an nazzan kaka' adarban ɓa, na an gesiŋgi dayday ɓa, vi aɓap na əɗɗa ka ɗiy dədazzoŋ aza Maŋgəlva dəssoŋgən təstəs kpak vi adawzaɓaŋ-Maŋgəlva dəvan dəvan aza əzva pak məza meŋge nan ɓaŋ ɓa.

² An vaski ɓa na, kəta kappani əzaɓ-Maŋgəlva, vimi di na, ɗiy məzuɗiyən ki Maŋgəlva vas arahaŋgək ubbur təl taka wã'ə, kəta waɓapaŋ əɗɗum aka mambray a mekret əmpa sa?

³ Əzaɓ-Maŋgəlva adawdaŋ temteməs na, tay vi kaɗɗumon sit ɗiy mambray net məs adaɗɗaŋ aza əzva paki.

⁴ Vi mbel net medgeɗge gəm net porsokɗe aɓapən navvuyon mambray kpak ɓa.

⁵ Sən aski, dawtoŋ aka dələv na, Kristu anah sən Maŋgəlva na: Kəŋglu əzaɓ-Maŋgəlva ɓa, mãy əvəl məpsuk ɓa, yaŋ kəɗɗa su zu va ɗəfa.

⁶ Əvəl nawzla kurmbuɗuku gəm əzaɓ-Maŋgəlva navvuyon mambray dənnek sukun zu ɓa.

⁷ Yaŋ nənah na: In yakəŋkə, vi aka wən nawi məverin addəv ɗerewel na: Nədeke, aw Maŋgəlva, vi kaɗɗa əŋgla noko.

⁸ Anahək addəv dərban na disiŋ na: Əzaɓ-Maŋgəlva, əvəl temtemi, əvəl nawzla kurmbuɗuku, əzaɓ-Maŋgəlva navvuyon mambraya, mok tay aket ɓa, vi dənnek sukun zuk ɓa, də məɗɗet va mahenziŋ anah zlaŋ.

⁹ Yaŋ anah kan na: In yakəŋkə, nədek vi kaɗɗa əŋgla noko. Azanək an daabəŋ vi kawɗi an masulani.

¹⁰ Addəv əŋglaski mərah əbbur də əvəl na zə Yesu Kristu, aɗɗa təl taka ka faɗə.

¹¹ Məsdələv pak tay ziwwe pay pak əɗɗa wəza nani gəm əzaɓ-Maŋgəlva dəvan dəvan pay pakə məs awɓap navvuyon mambray kpak ɓa,

¹² Kristu, nan dərəŋ na, səza azaɓ-Maŋgəlva navvuyon mambray təl taka, asanək ka faɗ aka dəzəŋ na Maŋgəlva

¹³ dəmbər na, tay əga ka məzuzelɗe nan dəkkpaŋgaŋgən ka təki nawɗi təlni.

¹⁴ Vi də əzaɓ-Maŋgəlva təl taka kaka'i abbur ɗiy pakə, akkpaŋget təstəs hã faɗə.

¹⁵ Vi Zeŋgile Salala nan pak tay əpel səm akan na: Sə dərɓaga anah na:

¹⁶ Aŋki wənmiyna məs nədayna viyti: Ɗərɓeget əvoŋɗeski Daya anahə: wanəpsit mahenziŋɗe nawa, a makreti gəm aka maɗɗulet nədawverti.

¹⁷ Nəɗɗumet na mambrayɗe gəm heslepeɗe net əmpa ɓa.

¹⁸ Adan vaski na, a təki əvvuy mambray agəɗə, aɗɗaŋ əvəl navvuyon mambray əmpa ɓa.

Məzar səm aza Maŋgəlva

¹⁹ Milmiŋgiɗwa, vi mbel na Kristu məs dəziyaŋ kan mərah tive nawtoŋ a təki məs salala an dədayə.

²⁰ Mənam tat də tive meleketeni gəm madarani, məs akol balsən məzlzlara, va ənəh na də gəɓa zəni.

²¹ Mənam tat də daya net məsdəlveŋge, ndəni məɗiyən aka gəla na Maŋgəlva.

²² Məzar səm kan aza Maŋgəlva də makram barə gəm məknahəm də ətafa, makram mubburun səza heslepe naddəv əɗɗum pakə, gəɓa zəm məslslayən dit iŋkile salala;

²³ məzban səm ərban əga nam məza əddak ɓa, vi məs diynan səm mani, nan akkpaŋgan man ɓa.

²⁴ Məzgə səm sləma a walaŋ zəmə vi kahhaɗam addəv əŋgla gəm addivit wəzeɗe moggeti.

²⁵ Mədappan gabba wəkkal nam va ɗiy meɓɓet adaɗɗaŋ ɓa, ya məsɓan səm zəm dərəŋgə, adan mənokum tat ula pay na Daya tay əgapəŋ ɓa.

²⁶ Vi an mənam tat əɗɗa mambray wa'wa' dərɓaga məsən gegesiŋ lewlewi, əzaɓ-Maŋgəlva tay navvuyon mambray van əmpa ɓa,

²⁷ ya wən mətawən tatwãh gəm offo kaka dədawge ɗiy məɓoŋgit kawzimti.

²⁸ Ɗəf tay dədakkaɗ ki mahenziŋ na Moyis sa? Əmta nani, an miziweɗe sula awaniɓa hoku anahaŋgək na vaski yi ɓa.

²⁹ Tatwãh metiŋgin awani əmpa aza əɗɗum nokum, məza arəh na ɗəf dəndappan Wətən Maŋgəlva, dərnoket mbel na wənmiyna məs arah ubbur dənɗaŋgə, gəm dəran Əmpəs na mbəlembəle ɓa di?

³⁰ Vi məsənək ɗəf məs dənah na: Naw wanəmpəlkiya, intə nawfaɗ səni. Gəm əmpa na: Daya watawwən aket ɗiy nani.

³¹ Wəbəta ava Maŋgəlva madaran wən nan tuwãhi sawɓa.

³² Məɗɗumon aka kətafaŋ baba'ə, səza kərahaŋ əkeɗeɗe ləŋgə, kətəŋgaŋ əlpa tatwãh gədakə.

³³ Mərokumi gəm məsəri mokum a ma heret ɗiyi; ya də as pak kəbbahaŋ sitinik ɗiy məzuzəmaŋ sãhã va nokum.

³⁴ Makrokum assokumək vi məke ɗiy meɓɓet a fərsəna. Məmõhni arya nokum, də as pak kəɓəsənək wən nani, vi kəsənənək na mənokum tat də arya an moggon day nanziya.

³⁵ Kədappanən ətaf nokum ɓa, vi wakərəhaŋ zəga na vokum diyɗa.

³⁶ Wəɓəsi məs wəraykum asan azani vi kaknahan əŋgla na Maŋgəlva, gəm kawrəh an aynan man naɗɗa.

³⁷ Vi: Siɗikke dəmbərə, siɗikke, siɗikke kaka' ɗəf an nazzan adawgapa, anzi na ɓa.

³⁸ Ɗəf naw təstəsə, də wətaf adawsan madarani. Ya an amilik dərɓe, zu asana nek dəndən ɓa.

³⁹ Nam na, ɗiy nawmilye dərɓe mənan kawza ɓa, mənam tat də ətaf nam pay pak vi əkõh na zeŋgilemə.