Ibriɗe 1 - Bible en Guidar

Ətoŋ addəvən: Kristu na ərba na Maŋgəlva an gərraki ( 1:1-3 ) Maŋgəlva apel səmək də ma Wətəni

¹ Far lahəŋka, Maŋgəlva apel sitik migilim təl ɓaɓay də tive temtem diyɗa də met məskəleŋɗe,

² ya aza wəgrak na pay nan kan na, Maŋgəlva apel səmək də ma Wətəni, məs aɗi aka zəga pakə, ndəndəni Maŋgəlva azəməɗ zəgeɗ pakə.

³ Ndəni əkeɗeɗe na gagdaka, agilik va Maŋgəlva səɗeki, tay ərma dələv də əɓap na wəpel nani. Sə dərɓaga abbur mambraya, asanək a disiŋ aka dəzəŋ na məlĩ Maŋgəlva.

Daya na Kristu adayək kiyən net maslayɗe ( 1:4—2:18 ) Wətən Maŋgəlva adayək kiyit maslayɗe

⁴ Wətən Maŋgəlva adayək kiyit maslayɗe də gagdaka hã Maŋgəlva ta'sən iya an dəday ki an neti.

⁵ Sən maslay awan anah sən ɗah na: Wətu kənani, nok nəwəkuk dəpaŋka di? Gəm əmpa na: Naw wanəsaw sən ka Afəni, nan tam wasan su ka Wətuwa dit?

⁶ Ya dərəŋ na, aka Maŋgəlva aslən Wətən an daabəŋ nan aka dəlva, amna: Maslayɗe na Maŋgəlva pak dukdukoŋ abani.

⁷ Aket maslayɗe na, əpel nan yaŋka: Ndən dədakkpaŋget maslayɗe nan səmyã, məɗɗaŋ wəza nani hərzlum offo.

⁸ Aka Wətəni, aɗi man na: Mazaŋga na məlĩ nok aziwik hã faɗə Maŋgəlva, zleŋge na təstəsə, ndəni zleŋgə nawzəm məlĩ noko.

⁹ Kəŋgluwək əɗɗa təstəsə, kəzelik mambraya. Vini Maŋgəlva, Maŋgəlva nok awelko, annekenək zuko dəwəpsuk gagdak an dəday ki məs apsit ɗiy məs dədassoŋ də isi.

¹⁰ Yaŋ anah əmpa na: Daya, istə də wətəŋ nan kəzəməɗək dəlvafuŋ, disiŋ pak wəza na voko.

¹¹ Net wahhiyaŋgə, noko wakəsoko. Net waŋgisiɓeŋ baymet va lukutɗe,

¹² va lukut metiŋgin kədektimti. Waddəɗaŋgə, ya nok kəkkpaŋ na ɓa, kəgal na ɓa.

¹³ Sən awan səret maslayɗe anah ɗah na: Asok aka dəzəŋ nawa, hã gap an nəvoŋgitik məzuzelɗe nok ammba təlko di?

¹⁴ Namna baymet pak əmpəsɗe en məzəɗɗaŋ wəza, məslinit aka wəza ammba moggon net ɗiy en nawrəhaŋ hara əkõh netiŋ ɓa sa?