Hose'a 9 - Bible en Guidar

Zəga net ɗiy na Maŋgəlva tay əza pakə

¹ Israyel kənneken zuk sam hã kiyuk zlazlaɓ va ɗiy meɓɓet ɓa, vi kələk faraɗa səza Maŋgəlva noko kəgəɗək polkoyo, may kəŋgələk əfaɗ suk aket kelleɗe na haykəmari pakə.

² Kelle də təki nawɗot mbazla azgil na ɓa, mbazla na meketepe wambəɗeti.

³ Aɓapaŋ na kassoŋ də gəla aka dələv na Yawe ɓa: Efrayim wamil a Eziptə, a Asiri wazəmaŋ zəga nawmə'a.

⁴ Apesleŋ na mbazla sən Yawe ɓa, əzaɓ-Maŋgəlva net anneken na zən ɓa, wasan va way na gəlabay azeti, en dəzəmaŋ pak arnokoŋko, vi way net sən gidivti kaka'ə, atoŋ na addəv Gəla na Yawe ɓa.

⁵ Miy kədaɗɗaŋ pay na wawya, gəm pay na wəzləra na Yawe di?

⁶ Yeŋ anzoŋguk sən əraya, Eziptə wakkeleti, Memfis wandike. Ŋzewɗe wataknən arya na sləma neti, tintif watak gizlirkeɗe neti.

⁷ Pay nawzəm sahã agapka, pay nampəlkiya agapka: Israyel dəsəna! Məskəleŋ akkpaŋgək mətemni, ɗəf məs əmpəs gərəŋgərəŋgə, vi heslepe nok dədayə gəm ərma mama nok adayka.

⁸ Məzuga na Efrayim na də Maŋgəlva nawi, məskəleŋgi yi, mazzaɗɗe mənslənit aket tiveɗ nan pakə, məwak səni hã səddəv gəla na Maŋgəlva nani.

⁹ Akkpumoŋguk addəv əray va aka pay na Gibeya. Waɗɗumonən mambray neti, wanəmpəlkiya na mambray neti.

Ba'al-Pe'or

¹⁰ Va megezlembirke awra nərəh Israyel, va mədəvərziyo na sokoyo, də wətəŋ nan nulek efiŋgiɗkum. Səza agapaŋ a Ba'al-Pe'or, appannək ki zit sit ərba wili, akkpaŋgaŋ daryawɗe va zəga an aŋglaŋgə.

¹¹ Efrayim, gagdak nan waveŋ va bəŋga, təŋ səza uwa nani, səza daway nani may səza əsɗa nan addəvət mani.

¹² An aɓeygitinik kirtit dayday na, wanəzet tak dəgapaŋ ɗiy ɓa. Aw! Əray aketi hara, pay nədawzar səzeti!

¹³ In ula Efrayim na va Tir, va guli net gogozleɗ məmpet a təki zazay na kapta-muyã, Efrayim appetik kirtin sən məbay ɗəfa.

¹⁴ Apsit an napsiti Yawe, apsit gəla uwa gəlet kirin məki daway gəm bide məkkpe'ti.

¹⁵ Mambray net pak arbanək zən a Gilgal: vi aski nəzele; aka mbərayən na wəza neti wanərɓehet siŋgil anawda, niŋgliw na əmpa ɓa; deyeɗe net pak məɓoŋtiŋgə.

¹⁶ Məbayni Efrayim, suwerin aŋkəlka, awə na kirtin kpak ɓa. An awək dayday na, wanəbey en aŋgəl səddəvən.

¹⁷ Maŋgəlva naw wandole, vi dəprəmnən man ɓa, waddoŋ slorslor aret ɗiy-ɗarə.