Hose'a 8 - Bible en Guidar

Məs dəzlgə səmyã wakkalan barkataŋ

¹ Affon gozloro! Va gazla, vaski wəray adawteh aka gəla na Yawe, adan aggaraŋ ki wənmiyna nawa gəm aggaraŋ ki mahenziŋ.

² Wahəmaŋ suwən na: «Maŋgəlva nawa, məsənkuko, mənam mə Israyelɗe!»

³ Israyel azganək moggoni: kəta məzuzel dərɓahani!

⁴ Aɗiyaŋgək milyeŋge məza wən nan səzaw ade ɓa, aɗiyaŋgək deyeɗe məza in əsənən ɓa. Avotoŋguk meŋgilveɗ net də təbəz babar gəm meleŋge neti, vi kawzan kiyti.

⁵ Məzgani wət wasliy noko, Samari! Asilginək ədagədəv naw aketi. Hã pay gbəŋgbar kan kədassoŋ məza heslepe ɓa di?

⁶ Sə Israyel məkini, ɗəfi dəzaɓa, Maŋgəlva yi ɓa; ha'aw wət wasliy na Samari petepete adakrapa.

⁷ Vi səmyã adazlgaŋgə, barkataŋ adakkalanəni. Haykəmari net apok na ɓa, an apokko, agəɗ na gəpa ɓa, ya an agəɗək gəpa, molhõyẽɗ dədawzəməni.

⁸ Məsulupni Israyel: kakaŋ tahəŋ aret ɗiy-ɗar va zəga ɗarə!

⁹ Vi net apeŋgeŋgik a Asiri, assoŋ na kiyit va koro nawra, Efrayim albahək beyneŋgiɗni.

¹⁰ Də əvəl na makaryam adapsitin dəlveŋge dayday na, kakaŋ wanəkkeleti, abe siɗikke wakkereŋ sən əslan gagdak na məlĩ net deyeɗe.

¹¹ Efrayim awetik matuyeɗe vi kavvuyon mambraya, ya yaŋ matuyeɗe vet akkpaŋgaŋ ka tive na mambraya.

¹² Kəta nəver sən mahenziŋ naw diyɗa zlaŋgə, kawleti yi va sə guw məkiyti.

¹³ Azaɓaŋ suwənək Maŋgəlva temtemi, ndəɗaŋ əzəm slu nani, Yawe dətef ɓa; kakaŋ na tay əɗɗumon heslepe neti, tay ətawwən aka mambray neti. Wamilyoŋ a Eziptə.

¹⁴ Israyel azgətək ki an dəzəməɗa, arkək gəla na məlĩ sən kini. Yuda tam awetik walaŋgəleɗe net korguɗe. Ya wanəslən offo addəvit walaŋgəleɗe nani, offo wapalket gəleɗe mogget neti.