Hose'a 7 - Bible en Guidar

¹ Gala nədaŋgla ənzaɗ Israyel, yaŋ heslepe na Efrayim arbə gəm mbərayən na Samari: ha'aw, aɗɗaŋgək wəza də tepelke; mahãla tay ətoŋ addəvit gəleɗe, masapeɗ tahəŋ əmõhẽtin ɗiy aka tive.

² Awnahaŋ a mekret na mbərayən mədaɗɗa ɓa, nəɗɗumonək akawa, kakaŋ na wəzeɗe net akaraŋgək kiyiti, yeŋ ama harawa.

³ Də mambray net adannekenən zə məlyã, ɗiy gugriɗ tamə, də uwawən neti.

⁴ Ndəɗaŋ pak məkuwaŋ a gizbeŋgə. Tahəŋ va magulo nawda peŋ duroɓduroɓu, məs mədə peŋ appan gabba əzaɓ offo təŋ səza məslãh gəpa hã gap əhəs nani.

⁵ Pay na wəzləra na məlĩ na, ɗiy gugriɗ azgaŋgək gbəgba' sən tatrah na mbazla, atəl van sit məmasaŋ aka ɗəfa.

⁶ Vi azaraŋgək go'o va offo na movoro, mekret tay aka əvoŋ tive neti: ədagədəv net kim gippe; də mompummo na tay əzla va hərzləm offo.

⁷ Ndəɗaŋ pak dəroɓ dəroɓəŋgə va movoro offo: tay əzimnin mətawaŋwən neti, milyeŋge net pak askotoŋko, ɗəf tay təttaka səret dədawhəm su ɓa.

⁸ Efrayim aslãhək dit ɗiy meɓɓeti, Efrayim tay va peŋ-məslepreke mədan məza məkkpaŋgani ɓa.

⁹ Molhõyẽɗ azəmənək gbogboŋ nani, nan awsənən ɓa; əgal adek akani, ya awsənən ɓa.

¹⁰ Əkaɓ na Israyel tay əpel akan tusso ama harani, ya dəmil aza Yawe Maŋgəlva nan ɓa; də as pak dəkayan ɓa.

¹¹ Efrayim tay va bəŋga na wandala tiɓiɓɓe maɗɗulan tay ɓa: Eziptə ayaŋgə, yaŋ addoŋ aza Asiri.

¹² Pay adaddoŋgu, wanəzlzlar weŋge naw aketi, waniyo' va biŋgeɗ na disiŋ, wanəzga' sit va wən nan aprəm addəv əkkal neti.

¹³ Əray aketi, vi anzoŋ faraɗa səzawa, əray neti, vi aɓoŋgoŋgək akawa! Wanəbit kəta, yaŋ net awaŋ wən akawa.

¹⁴ Səddəv kpukpum na mekret adakkamawən ɓa, an tay əɓuhun met aka zəga nawvoŋ neti, may əntarnən ziti aka wən na haykəmari gəm mbazla na meketepe gəɓet adaktuhoŋ vas səzawa.

¹⁵ Naw nəyegetike, nəsɓanək veti, ya tahəŋ əɗɗumoŋ mbərayən akawa.

¹⁶ Tay əkkpaŋgaŋgə, ya azawi ɓa, tahəŋ va bəle mbərayən. Deyeɗe net waskotoŋ a ma masalam sən əpel nawku na meti, mə Eziptiɗ wamasaŋ aketi.