Hose'a 6 - Bible en Guidar

¹ «Mide, məmndamsəm aza Yawe, vi ndəni dəbakamə, ya wanzaɗmə, argəməka ya waynan səm huwweɗ namə.

² Dərɓaga əvoŋ sula, wambəlgəmə, pay mahokon na, wasilgəmə, waməsam madaram abani.

³ Məsok səm zəm sok əsən Yawe: əgilye nan sesseli va bapummo, wade azam va buwən adazzani, va buwən maŋgalaw na mawala adalɓan dəlvafuŋ.»

⁴ Efrayim, mi nədawgəɗ suk di? Is Yuda, mi nədawgəɗ suk di? Moggon nokum akaw tay va slaybuwən na mompummo, va minɗe məzuziyaŋ, məzəssaraŋ go'u.

⁵ Vini yi nərge də met məskəleŋɗe, nəbey də əpel na mawa: wətawwən naw wagil pasakə.

⁶ Ulasahã nəŋgələ, əzaɓ-Maŋgəlva yi ɓa, gəm əsən Maŋgəlva nəŋgəl dayki əvəl nawzla kurmbuɗuku.

Zəgeɗ daryawɗe a Israyel

⁷ Net van va Adam, aggaraŋ ki wənmiyna, adaki aɗɗaŋ mbərayən azawa:

⁸ Galad walaŋgəla-metiŋ net məɗɗaŋ mbərayni, arnokuk dit mbeli;

⁹ va vanday net məvoŋgoŋ tive, vanday net məsdəlveŋge tay əbay ɗiy aka tive na Sikem: awle zəga narba wil məs aɗɗaŋgə!

¹⁰ Nəwələk zəga na dərwa a Israyel: Adaki Efrayim agəɗ polkoyo, ndəni arnokon Israyel.

¹¹ Nok pakə Yuda, məzaɓani əbəl viko. Pay nədaziwgin wən net ɗiy nawa.