Hose'a 4 - Bible en Guidar

Alabara aka Israyel ( 4:1—13:15 ) Ətawwən na Maŋgəlva aket ɗiy nani

¹ Mə Israyelɗe, məprəm əpel na Yawe: Yawe tay də wən nawtaw aket ɗiy dəssoŋ aka dəlva, vi wən gesiŋ tay ɓa, moggon tay ɓa, may əsən Maŋgəlva tay aka dələv ɓa.

² Ɗew sənən mefɗeke, uwawəna, əbay gəbaya, wəhãla, əku a gizbe, əsuk met ɗiyi, əbay kiya akan akani.

³ Vini yi, dələv van adawhəm na gəlabaya, ɗiy nakan waddakaŋ pak sap dit zəgeɗ nawra, dit biŋgeɗ na disiŋ; may kilfeŋge na pehe dayday wahhiyaŋgə.

Dolgoy amet məsdəlveŋge

⁴ Ya ɗəf adarma mama ɓa, adawzelen wən na ɗəf ɓa. Ɗiy nok agulyoŋguk va ɗiy mərmaŋ mama aza məsdəlva.

⁵ Wakətaŋgbãy də kapaya, məskəleŋ na nok da pak wataŋgbay də dəfɗa; wanəzat mok faɗə.

⁶ Ɗiy naw azaŋka vi dəsənwən ɓa. Adan kəzganək əsəna, wanəzgoko, kəsok na məsdələv naw əmpa ɓa: kəzgətək ki mahenziŋ na Maŋgəlva noko, naw pak wanəzgət kiyit kirtuk mezeŋgleketi.

⁷ Va assoŋ diyɗeŋki, aɗɗaŋgək mambray akawa, wanəkkpaŋgan gagdak net ka ərba wili.

⁸ Ammba mambray net ɗiy naw adawzəmaŋgə, heret sekke ammba heslepe neti.

⁹ Əray məstaka dədawrih ɗiy də məsdələv pakə. Wanəzga'sit aka wən na ədaw neti, wanəmndagan sit aza wəza neti.

¹⁰ Wazəmaŋgə ya abaŋ na ɓa, waɗɗaŋ polkoyo ya anzləraŋ na ɓa, vi appanənək əprəm ma Yawe.

¹¹ Polkoyo gəm mbazla də an na meketepe pak azlzlaɓanən ki ɗəfa.

¹² Ɗiy naw tahəŋ əssohõnən ma wəlaŋga neti, ya kivan məzuboton siti. Vi əɗɗum na polkoyo azetike. Də əɗɗa polkoyo agohoŋ səza Maŋgəlva neti.

¹³ A dadwar kiyit mossorgoɗe gugriɗ adawzaɓaŋ-Maŋgəlva, aket mossorgoɗe adawzlaŋ tursanɗe ammbet wəleŋɗe gugriɗe adawyaŋ na Elon, libne, Ela vi zeŋgile net moggoni. Sən aski, kirtukum muguluŋgit adaɗɗaŋ polkoyo, gil net kirtukum adawkuwaŋ a gizbe.

¹⁴ Nəzga'sit na kirtukum muguluŋgit aka wən na polkoyo net ɓa may sit gil net kirtukum aka wən na əku net a gizbe ɓa. Vi məsdəlveŋge sən kiyit tay əbiteŋ dit gil məpolkoyeɗ na matuya kawzaɓ-Maŋgəlva matakə. Ɗiy məs dəsənən əgohon wən ɓa na wazaŋgə.

¹⁵ «An is Israyel, is tat əɗɗa polkoyo, na Yuda adaɗɗa ɓa! Kədaddoŋ a Gilgal ɓa, kəpeŋgeŋ a Bet-Awen ɓa, kədaswayaŋ na: Də Yawe madarani ɓa.»

¹⁶ Va wasli məɓoŋni, vaski Israyel aɓoŋgu. Kakaŋ kan na, Yawe dəlgən ətaɗən awra va time.

¹⁷ Na Efrayim azbetik meŋgilveɗi: nan appani.

¹⁸ An abaynənək ma əsa mbazla net na, aza polkoyo adawtoŋgoŋgu. Deyeɗe net ərba wil aŋglaŋgə.

¹⁹ Səmyã wake aka perslekeni, wil wabeynin aka əzaɓ-Maŋgəlva net adaŋgə.