Hose'a 2 - Bible en Guidar

Pay an metiŋgin na Yizrel

¹ Əŋɗa net mə Israyelɗe wassoŋ diyɗa va hoyoŋko a məlpa, məs kawɓapi əsla gagdak nan ɓa, may əŋɗan ɓa. Wagap təki mənah sit na: «Ɗiy naw kənanən ɓa», kawnah siti na: «Kirtin Maŋgəlva madarani».

² Mə Yudeɗ dit mə Israyelɗe wakkalaŋ sapə, waɗiyaŋ ɗəf taka aketi, wazəmən dələv vani. Vi pay na Yizrel wasan metiŋgini.

³ Mənah sit milmiŋgiɗkum mezeŋgleketi, gəm sit milmiŋgiɗkum muguluŋgit tamə: Ruhama: ɗiy naw məs nəŋgələ.

Israyel, guluk məkuta

⁴ Mətawwən akat mokum, mətawwən akata, vi guluk nawtə ɓa, naw pak zələt nan ɓa. Tətor zəga naku natəŋ səka harata, gəm an naku a gizbe tam sə weleŋgit bide.

⁵ Vas ɓa na wanəggbuk zəga səzat kappat zət mekeleŋ zawzawə, wanəkkpaŋgat va pay muwəta, wanəkkpaŋgat va kapta-muyã, wanəɗɗət va təki kpokpõhõ gəm ka in kawbayət dit meme.

⁶ Nula na sasẽhit kirtət ɓa, vi uwa nawku a gizbeŋgə.

⁷ Vi met təkuwək a gizbe, akən təɗi daway net tərbək wili Vi tənah na: «Wanəzbet gəreŋgiɗwa, məzuvayaŋ way dit iŋkile, zeŋze də helege na ngərayã, may mẽl dit zəgeɗ nawsa nawa.»

⁸ Vini, nədamsan tive nat dit gedirgeɗi, wanəmpa mambara, tərəh na batamət əmpa ɓa.

⁹ Watəzbet gəreŋgiɗta, tərufne ɓa, watəkeyeti, tərih na ɓa, watənah na: «Wanəmndak ana zəlu maddaabəŋ da, vi moggon nəsaw adak lahəŋ day ki kakaŋka.»

¹⁰ Təsən lahəŋ na, intə nədapsət haykəmari, mbazla na meketepe, mẽl ɗololo ɓa; nənzlərgən sətək təbəz babar də meleŋge, yaŋ aɗɗaŋ wəza sən Ba'al dəndəni.

¹¹ Vini wanəmndaw ənda haykəmari naw də pay nani, mbazla na meketepe naw aka pay nani, wanətor zeŋze də helege na ngərayã naw səzat məs dədawɗaman zət kəta.

¹² Kakaŋ wanərban ərba wil nat a maheret gəreŋgiɗta, ya ɗəf tay nawtərət səvaw ɓa.

¹³ Wanəɓətgən ənnek nat pakə, wəzləra nata, təlaper də pay naffet nata, gəm dit wəkkalɗe na wawya nata.

¹⁴ Wanəmmus guli na megezlembirke nat dit en net sokoyeɗ en tədawnəh na: «Zəga na makaryam an məs gəreŋgiɗu avayaŋgi.» Wanəkkpaŋget ka wəleŋɗe ngərrəɓ ɗarə, zəgeɗ nawra nawzimnini.

¹⁵ Wanəzga' sət pay net Ba'alɗe, a təki tədawzlə sit tursan: aka təzaɓanək zət də ndama nata, dit verzleɗ nata, tənzat ammbet gəreŋgiɗta, naw ndət zəgət kiywa! Vaski Yawe aɗiymani.

¹⁶ Vini, wanəmbəɗata, wanəkdahət a kapta-muyã, wanəpel sət a makrata.

¹⁷ Sədak nədamndagan sət guli na megezlembirke nata, walaŋ na Akor wakkpaŋ maddamba na zəga tədaɗɗum nawrəha, watəyə gəlya adak va aka pay na gore nata, va aka pay an təpeŋ əgilyet sə Eziptə.

Pay naɗɗa əslere

¹⁸ Yawe aɗiyman na, pay nan watəyu na «zəlwa», watəyu ɗah əmpa na Ba'al nawa ɓa.

¹⁹ Wanəzargən iya net Ba'alɗe sə mata, kaɗɗumoni iya net əmpa ɓa.

²⁰ Waniynan wənmiyna dəpas dit zəgeɗ nawra, biŋgeɗ na disiŋ, zəgeɗ mukroket naka dəlvafuŋ; bile, masalam gəm əlpa, viyit ɗiy nawa; wanəŋgroɓe, assoŋ na aka dələv əmpa ɓa, wanəɗɗa dəvoŋgoŋgən fedeŋge.

²¹ Wanədahuk ka guluk naw faɗə, wanədahuk ka naw də təstəsə gəm də tiveni, də əŋgla gəm ulasahã.

²² Wanədahuk də gesiŋgesiŋ, wakəsən Yawe.

²³ Yawe aɗiyman na: aka pay nan na, wanəzlan sən disiŋ aka wəray nani, disiŋ wazlan sən dəlvafuŋ aka wəray nani.

²⁴ Dəlvafuŋ tam wazlan sit may haykəmari, mbazla na meketepe, gəm mẽl ɗololo, net tam wazlan sənən Yizrel.

²⁵ Wanəzlga ka naw aka dəlva, wanula sasãhət Lo-Ruhama, gəm wanənah sən Lo-Ammi na: «Ɗiy naw kənanəni», nan tam wanah na: «Maŋgəlva nawa».