Hose'a 14 - Bible en Guidar

Alabara aka wən nawɗi marava gəm iynama ( 14:1-10 )

¹ Samari araygənəka, vi aɓoŋguk aka Maŋgəlva nani: kawbeyti ɗiy nan də masalam, kaŋkinti kirtin na met bide, gil nan də daweyɗe kawbekti.

Wənzaɗ net ɗiy makra ɓəɓəlɗe

² Israyel amndok aza Yawe Maŋgəlva noko, vi heslepe nok ataŋgbaygukko.

³ Məmil aza Yawe, məgapgən sən əpeləŋka, mənah na: «Avviyon mbərayən pakə, ataf an moggoni; waməpsuk əpel na mam ka zəga nawzaɓ-Maŋgəlva a gəlet medgeɗgeɗe.

⁴ Asiri aɓap na kawkõhgəm ɓa, məpeŋ na aka pələs ɓa gəm wamənah əmpa na “Maŋgəlva namə” sən an məgəɗ də vam ɓa, vi azoki mitiwe adawrəh ula sasãh kaka'ə!»

⁵ Wanənzeɗ səka əskot neti, wanəŋgliw də makraw taka: ədagədəv naw azarək səketi,

⁶ wanəsaw aza Israyel va minɗe, waffuĩ va kidorgom, wampa suwerin va wəleŋɗe na Liban,

⁷ məskaɗe nan wassoŋ səɓuh səɓuhə, lelew nan va na hereme, əŋgənən va wəlaŋga na Liban;

⁸ En dəssoŋ də gəla ara zeŋgilen wamndoŋgu, wenseŋ haykəmari, waffiyoŋ va megezlembirke, sləmet wagil va mbazla na Liban.

⁹ Miy naw azet zəgeɗ dəgilyoŋ va meŋgilveɗ əmpa di Efrayim? In nəzlani, ətaɗən. In tat məndufu va wəleŋɗe lelewɗe, səzaw uwa nok adazzani.

¹⁰ Naway də maɗɗula nawelet zəgeɗiŋ də kiyən nawsənit di? Vi tive na Yawe sarra yi, ɗiy təstəs wadawaŋ dəkani, en məɓoŋgit hara na, wataŋgbayãŋ akani.