Hose'a 13 - Bible en Guidar

Əmta net ɗiy məɓoŋgit aka Maŋgəlva

¹ Pay Efrayim adawpele, akiyək geslne a Israyel, araygənək zən də Ba'al, yaŋ amtə.

² Yaŋ kakaŋ azbanənək əɗɗa mambray: aɗɗaŋgək zeŋgile zəga məhəsən na təbəz babar net də wəsən net nawzaɓ-Maŋgəlva! As pak wəza na məzaɓ-zəga yi. Aka wən net adawnahaŋ na: «Mətawaŋ wəla ɗəfa, məllamaŋ kirit wasliɗe kafyoketi.»

³ Vini adassoŋ va slaybuwən nampummo, va minɗe məzuziyaŋ əssaraŋ gu'u, va səmyã adawka eslesle sə kelle, va enene adawgilyoŋ dəma təki foŋgo naza gəla.

⁴ Intə, Yawe Maŋgəlva nok far səka dələv na Eziptə, Maŋgəlva tay kədawsən abbəru ɓa, məzukõh mbərən tay an intə ɓa ɓa,

⁵ Naw nəsənkuk far sə kapta-muyã, səka dələv mukuro.

⁶ Əgap net a təki nawzəm ləŋgə, ndəɗaŋ kpe'i, adan abaŋgə, mekret ufkuku, vini azgətaŋ kiywa.

⁷ Wanəkkpaŋ azet va ɓoolu; va balgam aba tive, wanəgə.

⁸ Wanəzlah sit va zəga darawən mənde kirtini, wanəŋgar slu naka dadaweti, wanimpir va ɓoolu adak ləŋgə, zəga nawra wapuweti.

⁹ Azokko Israyel; vi kəsil akaw in məzutər noko.

¹⁰ Aŋgay məlĩ nok di? Ngay kan dəkõhgukgən səddəvit walaŋgəleɗe gugriɗ nok pak di? May mətawaŋwən akok en kədawnəh na: «Avay məlĩ dit dayaɗeŋ di?»

¹¹ Wanəpsuk məlĩ addəv ədagədəv nawa, wanəmndaw əgəmən dit herɗe nawa.

¹² Heslepe na Efrayim mətərni ta'ə, mambray nan məzaɓan haɗamə.

¹³ Əssa na daway wade akani; vi wiyən məza maɗɗula ɓa yi: Pay nan agapka, ya azzan ama təki nawgilye ɓa.

¹⁴ Wanəkõhgit səva təki nanziya net mimtit kəta, wanəbit səma əmta kəta, ngay gəbaymərma nok di əmta. Teki net mimtiti, ngay wəɓap nok nawbay di? Ula sahã wazə sə ma harawa.

¹⁵ Efrayim wawan zən sə weleŋgit milmiŋgiɗni, Səmyã nammba pay nampum, səmyã na Yawe wasil sə kapta-muyã: heret iŋkile nan wakkpa'aŋgə, vovɗe net iŋkile nan wasa'ãtaŋgə kawmõhti zəgeɗ na sləma sə təki azeɓet pakə.