Hose'a 12 - Bible en Guidar

Ɗiy məs vurumɗeŋ səza wətəŋ neti

¹ Ɗiy na Efrayim azzəŋgaŋgək kiyu dit tepelkeɗi, mə Israyelɗe tam də uwawəna. Yuda nan tay ədaw də Maŋgəlva tagay, tay ɗew ndərəsl də Salala.

² Efrayim, tay əzgəl kizən də səmyã, tay ənzan ammba barkataŋ nammba pay nampum hurruɓu; tay uwet tepelkeɗ gəm gagayə. Aziwginik wənmiyna də Asiri, tay əka mẽl sən Eziptə.

³ Yawe tay də wən nawtaw aka Yuda, gəm kawsilyen aka Yakob sən wədaw nani, wapsən aza wəza an agəɗə.

⁴ Səddəvət man ambəɗan məlməni, may agayək də Maŋgəlva gala agəɗ gawla.

⁵ Yaŋ agay də maslay, askak wəlani, ahəmə gəm akkamani, arəh a Betel, adaki Maŋgəlva apel də mənamə.

⁶ Yawe Maŋgəlva net məzəlpaŋ na disiŋ, Yawe yi vaski iya nani.

⁷ Nok amndok aza Maŋgəlva noko: arma wətaf də əssa təstəsə, əga nok dəsan aka Maŋgəlva nok təpelle.

⁸ Zəga nawsla gagdak məhonzokko yi ava Kana'an, vurum adaŋgla.

⁹ Efrayim amna: «Sessel nəbək arya, nərahək arya sən kiywa, addəv wəza naw pak kawrəhi heslepe nawnəh na mambrayi ɓa.»

¹⁰ Intə Yawe Maŋgəlva nok təŋ gala kəsok aka dələv na Eziptə. Wanəmsak əɗiyuk addəvit gizlirkeɗe va aka pay mələmə.

¹¹ Wanəpel sit məskəleŋɗe, wanuwan ula, gəm də met məskəleŋɗe nədawsla kiyva wəna.

¹² An Galad də mambray yi, sessel akkpaŋgaŋgək ɗarə; awbeweŋ ətaw wəlet wasliɗe a Gilgal ɓa, matuyeɗe net kpewkpew va gərmeŋge aket barayɗe a gulyo.

¹³ Yakob anzanək aka muyã na Aram, Israyel agəɗək wəza ammbat gulku, viyət gulki ataɗə.

¹⁴ Də məskəleŋgi Yawe apeŋgən Israyel sə Eziptə, məskəleŋgi yi dəga.

¹⁵ Efrayim adan sənək gədəv Maŋgəlva fiyõh fiyõhũ: Daya waggbo' mbel nan aziyəŋ akani, wamndeget wil nan akani.