Hose'a 11 - Bible en Guidar

Əŋgla na Maŋgəlva viyit ɗiy nani

¹ Gala Israyel asan gawla na, nəŋgluwəka, sə Eziptə nəya wətuwa.

² Addereŋgək səba məzuyeti: sit Ba'alɗe azaɓaŋ sitin maŋgəlva, sit zeŋgilet zəgeɗ azlaŋ sitin tursan.

³ Intə niyagan sən ədaw sən Efrayim, nərma veti. Ya dəsənən na nəzəgək sləma aketi ɓa.

⁴ Nəkek də maɗɗula va ɗəfa, də helege na əŋgla nəgdehe, nəsawsitik va məmbu' muzliya a ma wəlani, nətəl sən zəga nawzəma.

⁵ Amndoŋ na a Eziptə ɓa, Asiri yi dədawsan məlĩ neti, vi aɓoŋgoŋgək damndoŋ azawa.

⁶ Masalam wakəlvəɗ a walaŋgəleɗe gugriɗ nani, wazet məzuganəni, wazim aka an armaŋ a mekreti.

⁷ Ɗiy naw aktuhənək gəɓet dazbawa: iyeti, ɗəf tay dədawsilyen ɓa.

⁸ Mbar nədapsuk di Efrayim, mbar nədawɓap əppok di, Israyel? Mbar nədakkpoŋgok va walaŋgəla-metiŋ na Adma di? Nəgəɗ suk va na Seboyim sa? Makraw tay əgəbəɗa, də as pak əŋgla naw akok ɓəlɓəli yi.

⁹ Nəkiy na herɗe akok ɓa, nəmndaw na əzan Efrayim ɓa; vi Maŋgəlva nani, ɗəf nan ɓa; a waloŋkum na, salala nani: nəde na dit herɗe ɓa.

¹⁰ Wadawaŋ ammba Yawe. Wahəmaŋ va ɓoolu adawhəma; vi an tay əhəma, kirtin wannekenən zit dazzoŋ səma pehe.

¹¹ Wazzoŋ sə Eziptə də wəkker va honzurɗe gəm səka dələv na Asiri va mukuɗuŋguleɗi, Yawe aɗiyman na: wanikiy dəssoŋgən eŋgil anetda.