Hose'a 10 - Bible en Guidar

Əgrak na wəzba gəm na məlyã

¹ Israyel guli moggon na megezlembirke, məzuwa kirtini. An kirtin awanən ziti, ndən uwet matuyaɗe; an dələv nan tay əzaɓa, ndən əbay gawla sit serekɗe.

² Mekret arayka, kakaŋ waslanən heslepe neti: nan wakrap matuyaɗe neti, wazet serekɗe neti.

³ Yaŋ aɓɗaŋ na, kakaŋ na: «Məlĩ nam tay ɓa, adan mawgəslne' sən Yawe ɓa na, məlĩ mi adawtər səm di?»

⁴ Apeleŋgik ɗarə, aswayaŋgək ɗarə, aɗɗaŋgək wənmiyna ɗarə, wətawwən tay əgilyen va kevile məs muwən adawgilyen aket bareyɗe a gulyo.

⁵ Ɗiy na Samari tahəŋ gərəŋ aka wən nat wət wasliyək na Bet-Awen, vi ɗiy nat tahəŋ a gəlabay aka wən nani, məsdəlveŋge nan wakkereŋ aka wən na gagdak nata, vi gagdak nat azəka!

⁶ Nan van pak kawkani a Asiri ka əvəl sən məlĩ Yareb. Efrayim waslet wil akani, wil wadannən Israyel aka wən na keket nan an azbə.

⁷ Na Samari azək də məlĩ nan va oŋgofoko aket iŋkile.

⁸ Kawzeti gəleɗe-nettuyeŋge na Awen, mambray na Israyel; gedirgeɗ dit dewregeɗe waslerneheŋ aket matuyeɗe neti, wanahaŋ sitin mossorgoɗe gugriɗ na: məɗupmə! May sit mossorgoɗe na: Məɓəsl akamə!

Israyel wabəl an məs azlgə

⁹ Təŋ də wən na Gibeya kəgəɗ mambraya Israyel, kədder səkan ɓa, təsi yi wəlpa dərufgin məbayaŋ gəbayəŋ a Gibeya ɓa sa?

¹⁰ Aza əŋgla naw na, wanəzga' siti, ɗiy wasapaŋ aketi aka wən na mambray net wəlan sulaŋka.

¹¹ Efrayim, bəlata miyagan lewlewi, aŋgələk ərga haya. Adan nərəh lelew na wəlani, nəklak wəlaŋga nense sən Efrayim awlani, Yuda nense, Yakob əziyani.

¹² Məzlək təstəsə, wakəkkalaŋ zəga na mabardaw moggoni; Məkkpãy guli meleketeni; kakaŋki kan pay nawkayan Yawe, hã gap adazzan wərban sukum təstəsə.

¹³ Daraw kinseŋgi, yaŋ kəkkalanən mambraya, kəzəmaŋgək uwa na tepelke. Vi kəbayək vok aka wəɓap noko, aka əŋɗa net məzəlpaŋ nok diyɗa.

¹⁴ Gogoyo wasil aweleŋgit ɗiy noko, hã gap walaŋgəleɗe gugriɗ na korgu nok adakkahãŋ kakãhə̃, va Salman azan Bet-Arbel pay nalpa, atakeɗ may met kirin aket kirtiti.

¹⁵ Aski Betel agəɗ sukum vi mambray nokum man awsla ɓa: a bapummo məlĩ na Israyel adawbay mani.