Hose'a 1 - Bible en Guidar

Əkay guluk na Hose'a gəm gəla nani ( 1:1—3:5 )

¹ Əpel na Yawe an apel sən Hose'a wətən Be'eri, aka pay net may Oziyas, Yotam, Akaz, Hizkiya milyeŋge na Yuda, gəm aka pay na Yerobo'am wətən Yo'as məlĩ na Israyel.

Daŋgla na məskəleŋ, əslən na Maŋgəlva maddaabəŋ

² Wətəŋ əpel na Yawe də ma Hose'a: Yawe aɓsən Hose'a na: «Doko, agəm guluk məku a gizbe, kirin kədawwa dəndəta, dəssoŋgən kirtət məku a gizbe, vi dələv tay əku abe abe də əmzləh səmmba Yawe.»

³ Ndən mbat agəmət Gomer wətən Diblayim. Təɗi daway, ndət bok sən wiyna.

⁴ Yawe aɓsən na: «Alvan na Yizrel, vi abe aŋ siɗikke əmpa na, wanəssõhõn wən net mbel na Yizrel a ma gəla na Yehu, wanəbayma əzəm məlĩ sə Israyel.

⁵ Pay nan na, wanəŋzlu bile na Israyel a walaŋ na Yizrel.»

⁶ Təɗiyək daway əmpa, ndət bok waŋkə, yaŋ aɓsən na: «Alvat na Lo-Ruhama (Məza məŋgluti ɓa), vi nəzban na ulasahã aka Israyel ɓa, nəvvuyon sən na əmpa ɓa.

⁷ Gəla na Yuda hara na, wanula sasãhni, wanəkõhgən də va Yawe Maŋgəlva nani; də bile yi nədawkõhgən ɓa, də masalam ɓa, wəlpa ɓa, dit pilseŋge ɓa, dit məŋkoroŋ pilseŋge ɓa.»

⁸ Təvokək mat Lo-Ruhama səmet bide, yaŋ təɗi daway, ndət bok wiyna.

⁹ Yaŋ amna: «Alvan na Lo-Ammi, va wənəh na: ɗiy nawəŋ ɓa, vi ɗiy naw kənanən ɓa, naw pak nəsaw na sukum ɓa.»