Hənhən 9 - Bible en Guidar

Maslay masle'it tay əffon gozloro

¹ Maslay masle'it affonək gozloro nani: Yaŋ nəwəl ngərzla abət afuŋ sə disiŋ. Məpsəni lekile nawkol ma vov na delŋgeɗeki.

² Akoluk ma vov na delŋgeɗeki, yaŋ enene agilyoŋ sədak va en sə mavoro metiŋgini. Pay attirik siti, semyã pak vaska'e.

³ Yaŋ zaray agil səddivit enene neki, atəray aka dəlvafuŋ. Məpsəni əɓap məstaka dəndən net hərziyeɗi naka dəlvafuŋ.

⁴ Mətekti dawka met aza kevile naka dəlvafuŋ, aza zəga meddəkani mãy aza wəlaŋga, abbər azet ɗiy məs tahəŋ də tampoŋ na Maŋgəlva a mirbizit ɓa kaka'ə.

⁵ Zaray nan, məpsəni tive nawbay ɗiy ɓa, abbər əzimgit sãhã zəga na təla sle'i. Əzəmsãhã nan tay va əzəmsãhã na ɗəf məs hərziya aharə.

⁶ Pay dəpas na, ɗiy wakayanən əmta, ya arəhən na ɓa. Waŋglaŋ əmta, ya əmta wanzan siti.

⁷ Zaray nan tay va pilseŋge məzumbataŋ ama əgaya, mətərkiya tay aket va kəɓəs na mətərkiya na meleŋge iyi, haret tay va haret ɗiyi.

⁸ Muhur kiyit tay va muhur kiyit gili, slayi tay va slayit ɓooluɗi.

⁹ Baray tay a makret va təbəza, ɓaɓəlma persleket tay va ɓaɓəlma mawta net pilseŋge danzoŋ dəndən əmbat ama əgaya.

¹⁰ Kuturit tay va net hərziyeɗ aka əhõ, azet kuturtiski gagdak asan nawzəmgit sãhã sit ɗiy gap təla sle'i.

¹¹ Məlĩ net tay na, maslay na delŋgeɗeki adawyanən də ma Ibriɗ na Abadon, də ma Gərek na Apolliyon.

Maslay masle'it tay əffon gozloro

¹² Əzəmsahã an daabəŋ atoŋko vaska, əzəmsahã temtem sula tay əzzoŋ səbbərən əmpa.

¹³ Maslay ma sləre'it affonək gozloro nani: Yaŋ nəprəm wəla ɗəf əzan səzet mohoŋɗe na gəlamatuya na meleŋge məs dəsan aba Maŋgəlva naka.

¹⁴ Tay ənah sən maslay masləre'it məs də gozloro avan na: Appet maslayɗe poɗo məs minet dit ngiyamɗe a məlpa metiŋ na Efrat neki.

¹⁵ Məppeti maslayɗe poɗo neki, azaɓanənək zit vi ənziya na pay nani, əvoŋ nani, təla nani, əzva nani, məs adawbayaŋ ɗiy taka səddəv əprasl hoku na əŋɗa neti.

¹⁶ Mənah suwi əŋɗa net vandayɗe net məŋkoroŋ pilseŋge, tay gabal təl gabal səkat sula (200 000 000).

¹⁷ Vaŋki pilseŋge dit ɗiy məŋkoroŋ pilseŋge arban addəv ula: Tahəŋ dit lukutɗe nawgay azet pepreŋɗe va offo, tirtir va təki a disiŋ gəm va maməlma. Kiyit pilseŋge tay va kiyit ɓooluɗi. Beret tay əpor offo, enene gəm busuku.

¹⁸ Sit gəbayɗe hokuŋki, offo, enene gəm busuk məs beret adawporo, taka səddəv əprasl hoku na əŋɗa net ɗiy amtaŋka.

¹⁹ Vi gbogboŋ net pilseŋge vet aza meti, gəm aza kutirti. Kuturit agilyoŋgu va dohõŋɗe, tahəŋ də kiyti, dəndəni adawɓap mbərayən sən ɗəfa.

²⁰ Ɗiy məs dəmbraŋ tamə, məs dəmtaŋ sit gəbayɗe ɓa, dəɗiyaŋ marava səket wəzaɗe net aɗɗaŋ də vet ɓa, dəzbanən əgagdeket tuyeŋɗe, zəgeɗkamaŋgəlva na meleŋge awaniɓa na təbəz babara, na təbəz pepreŋge, na gərma awaniɓa na wəlaŋga, məs awɓapaŋ ula ɓa, əprəm ɓa, ədaw ɓa.

²¹ Dəɗiyaŋ marava səka əbaygəbay net ɓa, səka garzlaw net ɓa, səka ɗarɗar net mãy səka əhãl net temtem ɓa.